AISAYA
Buku dake akali Aisaya lenge dokome baa poropeta akali andake ee kana 750 W.K. epo papeyamopa karo pyuo 700 W.K. ee kana dopale yuu Jerusalem dokona pii lao kareya. Buku dakena pii mendaki palipyamopape pii wakale rema liti pisi pyasi palamo.
1. Rombo 1-39 Juu wambunya iso karenge yuu Juta lenge doko Asiria wambu dupwame pyalana pyuo kareyaminyi dokopa Aisayame pii lamaiyuo kareya. Aisaya baame kando Juu wambu dupwana randa angi doko Asiria wambu porayami renge doko daa lao siya. Juu wambunya randa angi doko Anatu leyamuli pyuo pii napala kamba lao kapa pira lao suu pyaa nayaminyi doko lao Aisayame soo gisiya. Renge dusipa wambu dupwa sinya lao Aisayame pii au pyuo lao kongwalu dupwa lasaka pyuo pyuo kareya. Pyuo kareyamo dokopa mee wambu dupwape nakamana iso karenge akalipi yulu rolae pyuo kote rolae lao pyuo karalapape lao lamaiya. Anatu laramuli pyuo nakama soo pii narami ramo doko kokwa soo randa nyuo pyuo kararami lao repe repe lamaiyuo kareya. Repe repe lapala yuu rakyame dokopa yuu muu dupwana wambu dupwa peparae lambo lao mona kyuu lao sera dokopa kiŋi akali mende kiŋi Dapitinya rara dokonandeme epo au pyuo yulu rolae pyulu pyuo pira doko eparamo pii doko Aisayame nolako leya.
2. Rombo 40-55 Juu wambu dupwana malu mee yuu wakale Bapilone lenge dokona anamasi minyiyaminyi dupwame lanyuo peyaminyi dokopa kondome kumuo kareyaminyi dokona lao pyasi palamo. Yuu gii dokopa Anatu baame banya wambu dupwa mokwalana karamano rengya usale mokwaramo dokopa banya wambu dupwa nakama rangena yuu Jerusaleme dokona kamba lanyuo paramo waili pii doko poropeta akali dokome poraiyuo lamaiyuo kareya.
Rombo dasipana renge mende pyasi palamo. Palamo doko Anatu baame ee kana epapa papa piyamopa rapa rapa pyuo iso karalu karo karamo. Banya wambu dupwa nakamame wambu wakale wakale dupwa peparae Anatunya waili pii keyange doko maiyuo lamairaminyi doko Anatumi rapa rapa pinya pilyamo. Dopa pipyamosa wambu wakale wakale dupwa Juu wambu keta au pirami. Pii dakena Anatunya kendemande akali dokona lao palamoko. Pii doko Ole Tesamene dokona wambu dupwame pii lapo ama wakasa rungi rungi pisingi dokona mende doko pii dake. Rombo 53 dokona randa andake nyuo giyalya giyana pyuo kilya kando laminyipa Anatunya Kendemande baa kumulyamo lao paleya. Poropeta pii dakena lao Kurisene wambu andareleme Yesu dokona lao leya soo nyilyaminyi.
3. Rombo 56-66 Juu wambu lapo yuu Jerusaleme doko yaki nyii nayaminyipape mona kendo kareyaminyi dokona Anatumi leymuli pyuo pira dokona lao mona kyuu lao sinya lao waili pii dakena pepa piya. Nakama Anatunya mawa pii dupwa pyuo minyuo kote rolae lao karalapape lao misi lenge yuu gii dokopa Anatu lakando mena pyao kiso maiyuo ateŋa lenge yulu dusipa kame see nao minyarama lao pyasi palamo. Rombo 61:1-2 dokona pii mupwa mende Yesu baame kanda soo mana lao kareyamo dokopa banya yulu dokona lao mana lao karo leya doko palamo.
1
Buku dakeme Juta wambu Jerusaleme paleyami dupwana lao kiŋi Usaya Jotame Easa Esekaya kiŋi yulu pyuo kareyami dokopa Anatumi poropeta Aisaya Emosena ikinyingi keta epo leyamo dokona lasi silyamo.
Anatumi Banya Wambu Kando Esipyao Pii Leya
Kamongome lao, Yake yuupa dolapona nambame pii leto doko apa pyuo leene lao serambi, leya. Wane wanakepe nambame manju andanyi pyambwapu dupwame namba yanda pimwailyaminyi. Bulamakaome otange minyingi range ai singi. Dee mena donge dupwame nenge maingi mare doko soo gisingi. Menana yulu doko nyuo isa palyuo Isaraele wambu dupwame namba keta piramili doko kaelyaminyi.
Nakama mena kuiyalana pilyaminyi anda epenge dopale ingyuo karaminyi. Nakama yuu dakena wambu dupwa mona pali napyamo koona para pyasi wambu ingyuo pelyaminyi. Embena Isaraele wambunya Kamongo Poo Pyasi Anatu doko embame mata maiyuo kaelene. Koo pilini dokome emba nyuo isa pyakalopyamolamo lao silyu. Isaraele akipamo embame yanda pimwaiyuo puu pelepe. Emba dee kamba yasu kee letepe? Isaraele embena kyawa dorena wua kakupi nyuo pisapala mona suu pingipi dorena kumapyamo karene. Embena yanenge peparae mendasa iki sepa nao kwaelyamo. Mendasa yaki pyuo umbwa pyuo nyisi kara nalyaminyi, leya.
Nakamana yuu doko kokwa soo dee taone dupwa lalyasi silyamo. Rara wakale wambu dupwa epo nakamame mee lenge makando pipala kaelyaminyisa epo nakamana yuu nyepakala bange singi dupwa ukiaki minyuo apa nelyaminyi. Jerusaleme yuu taone doko iki yanda pimwai lenge lenge raminyipa ropeta ee kame piro kara nange dokona iso karenge akalinya anda kauwa ingyaro silyamo, leya. Kamongo Porai Wakasa dokome apa pilyaminyi lao kata kandala pena lao laa nayali doko Jerusaleme mende yapa ronge nyii nao yuu Sotoma Gomorapana piyamo dopale ingyuo pupyali.
10 Jerusaleme akali kanjili komiti lowa minyingi dee nakamana wambupi dupwa yuu Sotoma Gomora wambu peteyaminyi dopaleko ingyuo pelyaminyi. Dupwa Kamongome nakama kando apa langilyamo lao selapa. Banya mana letamo dokona doko mende lalyamo lao wangu lakapala selapape. 11 Baame lao dokopa nakamame rendamu pingi namba kaeya nao kiso jilyaminyi dupwana namba kyanyi kandakalene lao suu pilyamipi? letamo. Namba nakamana mena sipisipi dee mee mena bulamakaope akipi keyange kapako namba kiso jilyaminyi dusipana deyako yano pipyamo kara nalyo. Mena sipisipi bulamakao memepena ranjama jilyaminyi dusipa epapu namba nombe nombe petamo. 12 Apimi tembole anda dokona nambana lao kingi wapambupi lakao pisinya dokopa bange dupwa minyakao wamya lyuo ipupwa lao lapyasa epelyape? 13 Nakamame kiso jilyaminyi doko mee ingyuo pelyamo. Nakamana saa yakape kiso jiminyi rendamu dokome namba nyiki nyiki pipyamo karo. Nakamana Satate Kukinyape dee kana enengena nenge malu palyuo nenge nengepe dee malu palyuo andake tembole mitiŋi lengepe dupwa nakamana koo dupwame mendena ketae ingyuo pupyasa soo rae maiyaka nalyo. 14 Dopako pyuo nakamana kana enengena nenge malu palyuo naminyipape dee yuu gii poo pyasi lao nyilyamano laminyipape dupwame namba kenda jimisa selana rae mai nalyo, leya.
15 Embame kingi ketae pyambwapala ateŋa larene dokopa nambame lengeme emba kandalena eeya lara. Ateŋa malu lare panda akipare lare dusipana namba mende saka naro ingilyamo. Renge doko emba kingi ranjamako dokome karo larenesa dokona yaka laka naro ingilyamo. 16 Nakama range wate pyuokondali pipala rolae ingyuo seramo karalapape. Renge koo nakama pipya nambana lenge kambu sipyamo darena silyamo dusipa ramanyi nembapala 17 yulu keyange dupwa mana nyuo pimwali lao pipwape. Kote dokona rolo lalapape. Randa nyilyaminyi dupwa nyisalapape. Wane wanake muiyane enda waiya dupwape bange dupwa nyiso rungi pyapeta sakaminya lao karalapape.
18 Kamongome dopa letamo. Dakepa kwaelyamo dupwana rolo lamanale. Nakama koo dokome ranga yuku napyasa koo pilyaminyi dopa pilyaminyiko doŋo dopa piraminyipape nambame nakamana koo dupwa wate pyuo kewa lanyi nembakaronopa maa bilima kapa ingyuo kewa lao rao karenale. Nakamana koo dupwa kamame pingi pyao silyamo doko kaepala kwuala pao kewa lenale. 19 Nambame laro dokona iki warombo soo pyuo larami ramo doko yuunya ando eparamo amenge kapape doko kapa nao kararami. 20 Kaepala sili nasili lao soo nembo larami ramo wua nenge dokome yasuko nao kumarami lao namba Kamongo dokome dopa lapyaŋa lalapape.
Koo Renge Singi Taone Mende
21 Taone mona kare kare mondo lao piyami kande doko epapu pundange lenge kambupi nyiyaminyi. Wamba kandeyo dokopa yulu keyange rolae dokome simbwaro siya. Dopa piyamopape epapu dakepa wambunya ranjama nenge yeelyo karaminyi, leya. 22 Jerusaleme emba wamba kana kulingi kulisa palengena mendekepe dee ipwa waene yapasinya mendeke ingyuope karale kandale doko kaepala dakepa mee mendena ketae ingyuo pelene, leya. 23 Nakamanana lita akali dupwa mendale isa palyili palyili lao waa nyingi dupwana puu kulisa ingilyaminyi. Nakama karena lakaro bange sinya lao diriki pyuo nyuo lao karaminyi. Dopako pyuo dee muiyane wambu enda waiyape dupwana moŋo ipyamo minyuo kotena iminyi dupwa mondo lao lakami nalyaminyi. 24 Dokona lao dakepa Anatu Isaraele wambunya Kamongo Porai Wakasa dokome apa letamo lao selapa. Nambana yanda pimwai dupwa nakamana koo dupwana bekeme pyakaronopa dokona nakamame namba isingi randa dee jeraminde daa lao silyu. 25 Nambame epapu nakama angi pyaro. Nambame nakama akalimi kana kisalamuli pyuo kiso kwaelyamo dupwa nembo wasaronopa angi doko randa dokome lili pyuo yapalyara, leya. 26 Nambame nakama akali kyawa wamba kareyami dopale lapope mende pinya dokopa banya pii sepala piyami dopale lapope wakale jero. Dopa pirunu dokopa Jerusaleme taone doko taone keyange yulu mondo lao piminyi rolae silyamo lao larami ingyara.
27 Kamongo baa rolaena renge palenge dokome koo dupwa koo dupwa kondarami dokopa Jerusaleme doko pyuo elyape keta pisara ingilyamo. 28 Dopa pyuoko dee mendeme baapa yanda pimwairaminyi dupwa minyuo poo poo lao pyanyi reto banya kingi dokona yaki nyeramo wambu doko pyao kumakao pira ingilyamo.
29 Dopa piramo dokopa isako waingi kemali pingi lapo wara pipalape isa renge kemali pingi laponape moname nyinyi nembo kingi lao petenge lamo dupwa yamarangyuo yaki nyuo kaeyarami ingilyamo, leya. 30 Nakama yuu kulisa dokopa kapya waingi ipwa pyaa nalyamo yando nalamuli pyuope ee waingi neta kone dokona ipwa yangyuo yando nalamuli pyuo soo parami, leya. 31 Yuu anda piro singi dokona isare kainyi palyingi dokopa mendeme minyara nange kandale. Doko suu pyao akali ama porai ingyuo karo koo pyuo karaminyi dupwa yulu koo dokome nakama nyuo orambo palyuo kokwa seramo dokopa mendeme nyisalana saka narami.