65
Anatumi Baa Mata Maiyuo Rangena Kata Peyami Dupwa Koo Keta Palyiya
Kamongome nambana wambunya ateŋa pii doko sepala yano pyalana rapa rapa piro kareyonopape angi laa nayami letamo. Nakamame namba anja karene lao koto kandamilinya kareyonopa nakamame kotalana suu pyao kara nayami. Nambame dae karo lapala nyiso yano doko pyalana lao kareyonopape yuu liti andake range karaminyi peparaeme ateŋa lao piso see nayami. Nambame nambana wambu mona kana pokapala rangena suu pilyu ote lao rangena kata wapuo pelyaminyi dupwa yuu peparae nyisarowale lao rapa rapa piru karenge. Nakama elya pali napala namba imbu singi nyakao pyuowako karaminyi. Nakamame semango imambu suu pyapala mena yakape yaonge mare dupwana yao maiyuo karaminyi. Dopa pyuo dokopa loma soo semango yao maingi kana pyare lasi dupwana rendamu pingi dupwa kiso maiyuo karaminyi. Yuu gii kukwa dokopa kananda yanyandape dupwana papyuo wambu kumasinya imambu dupwame ropaka epo kemali kongwalupi pyuo langiraminyi pimana lao sela pao karaminyi. Wambu dopale dupwame mena minjupi mena ipwangepe anatu ingyuo imambu bange wakale dupwa loma soo kuiyuo maiyaminyi dupwape nao papyuo pyuo karaminyi. Dopa pingi wambu dupwame wambu menge kando lao, Namwa angi yapasi ingyuo karamwano pilyamoŋo warendasaramiŋi repeta epa nalapape, letaminyi. Wambu dopa pilyaminyi dupwame nambana gyaa kata sisuku pyambwakaminyisa nambana imbu singi nakama keta palamo doko isare ingyuo rao kookana lokwasi lapala waiya lao awa awa pyuo otara ingya nalyamo.
65:6-16 Anatumi kote laope lete nyuope lalu lao lenge pii laparae dae palamo.
Yake Yuupi Enenge Ingyuo Wasara
17 Kamongome dopa letamo. Nambame yake yuupi enenge ingyuo wasaronopa wambowana pingi dupwa dopale kandape panda dapale kandape lao suu pyaa narami, letamo. 18 Nambame pyuo wasakaro dokona lao rae maiyuo kenane pyao karalu kararami. Nambame Jerusaleme enengende wasarono dokona raeme kumungi renge iki simbwaro seramopa banya range wambu dupwa raeme kumarami. 19 Yuu enengepe dokona wambu dupwape kandarono dokopa namba range keta rae maingi renge palyuo simbwara. Yuu dokona ee lengepe dee mende pirasa nyisinya lao pisingipi mende see nara. 20 Wane wanakepe ene nyaŋasa dokopa kuma narami. Wambu peparae palyuo karo emo kumungi kakapu kumarami. Wambu ee kana andete (100) nembo pisirami dupwa kandarami dokopa mapwae parangepeko lao kandarami. Ee kana andete (100) dusipa karapa nao wambo kanya pyapu lao kumarami ramo dokopa nambame nakama keta randa palena lapisa pilyamo larami. 21 Wambu dupwame anda pipala dokona nakama rangeko paliraminyipa wambu wakale mendeme panda nyakami narami. Wambu isa girapo ee wara pipala nakama rangeme jingi lyuo ipwa waene wasapala rae maiyuo naraminyipa mendeme nyakami naramiko. 22 Nambana wambu dupwa makwa isa ingyuo karo kuku pyaraminyipa nakama bange nyelana randa nao yulu andake piyami dupwa nyepala rae maiyuo minyuo kararami. 23 Yulu pirami dupwa mona karo andaramopa nakamana wane wanakepe dupwa randa andake nyii narami. Nambame nakamape dee ene manjo para pyao paraminyi dupwape yuu gii ene eparamo dupwana elyape keta piso puu paro. 24 Dopa pyuowako dee nakama nambapa lao ene ateŋa lao otapa naraminyipa kanyasa isingi yano pyakamiru. 25 Yana suwa kararope sipisipi yakane dupwape nenge mendakinya narami. Mena laene dupwame bulamakao nenge rambi yanda dupwa nengenyili pyuo nao kararami. Kau dupwa wambu nalanako pinginyili pyuo paa napala anjiki pyuo serami. Sayone nambana yuu kyau poo pyasi dokona koo renge dee randa nyingi rengepe mende see nara.