JONE
Jone baame banya waili pii keyange dokona Yesu baa Anatunya Pii lete karenge dokome namwa isa wambunya yongo nyuo epapala namwa pipya role pyao kareya, leyapya. Wambu buku dake yaka laraminyi dupwame Anatunya Ikinyingi Pyuo Nyingi Akali epara lao, Anatumi lalu lao leyamo doko Yesu soo nyuo baa kapa ingingi lao suu pyapala kyakana renge nyerami lao Joneme pepa dake pyao reteyapya (20:31).
Pyao kanda soo dokopa Yesu baa Anatunya Pii lete karenge doko Joneme pyao reteya. Pyao retapala baame Yesumi mirakele yulu wakale wakale piyamo dupwana lao pyao reteya. Dopa lao baame Yesu Anatunya Ikinyingi dee Pyuo Nyingi Akali epara lao lalu lao leyamo dokoŋo lao lasaka piya. Lasaka pipala baame mirakele yulu Yesumi piyamo dupwana renge angi polo leya. Wambu lapome Yesu kapa ingingi lao suu pyapala baa kimbu moko minyuo peyami. Dopa piyaminyipape wambu wakale lapome Yesu mata maiyuo daa lao kapa ingingi lao suu pyaa nayami. Rombo 13-17 kukwa dokopa akali dupwame oo repeta Yesu puu maiyuo nyela epeyaminyipa Yesu banya disaepole dupwa pipya yalya kando peteyaminyi pii doko pyasi palamo. Kukwa dokopa Yesu baame banya disaepole dupwa porainyi pyambuo mona minyarambu pii lamaiyuo kareya dokona pyasi palamo. Rombo 18-21 dupwana akali dupwame Yesu puu maiyuo nyela epeyaminyi dokonape kote lao randa maiyaminyi dokonape dee Yesu isa mamando dokona kumuo palipala lopo epapala banya disaepole dupwa keta paneyamo dokonape lao pyasi palamo.
Enda kepo pyuo kareyamo dokona pii (8:1-11) Baepole lapona make dopale [|] kame pipala kanya dokona pyasi palamo. Akipamo rombo pyao kame piru karape? Renge doko Joneme wambo piyamo dokona pii paleyamo dokona lapo enakana pyao nyiyaminyi dupwame lapo yaki nyiyamipya. Dee lapome peparae pyao nyiyaminyipape panda serali lapona reta napala mendasa pao retapa piyamipya.
Joneme pii angingyuwale laokonda piya doko Koraisa baame lete renge maingi. Mendeme baa kata kinyinya renge letena renge lao suu pyaraminyi dupwa lete renge doko nyerami ingilyamo lao piyapya. Jone baame mee isa bange lapo ipwape boretepe yanga paupau lengepe mena sipisipi isingipi dee banya sipisipi dupwape isa girapope dee dokona jingipi dupwana alya minyuo kongwalunya palyapala Anatunya renge angi doko polo lamaiya.
Jonena pii doko Yesu baa Anatuko doko dee akali opetaeko ingyuo karamo, leya.
Buku Dakena Pii Palamo Dasipa
1. Pii kanda siya doko 1:1-18
2. Jone Bapitisimopa Yesumi banya disaepole wambo kanda soo kee leyamo dupwape 1:19-51
3. Yesumi panembena wambu dupwa pii polo lamaiya 2:1—12:50
4. Yesu oo repeta kumara ingiyamo dokopa baa yuu Jerusaleme dokona kareya 13:1—19:42
5. Yesu baa kumapala lopo epapala banya disaepole dupwa keta paneya 20:1-31
6. Yuu Galili dokona Yesu baa dee paneya pii dokome lao lumwa piya 21:1-25
1
Anatunya Pii Doko Wambu Yongo Nyiya
Ene busapa nayamopa Pii doko kareya. Pii doko Anatupa kareyambi. Pii doko Anatu dokonako angingyuo kareya. Ene busapa nayamopa baa Anatupa kareyambi. Anatumi keta bange peparae wasiya. Bange mendepe baa keta wasa nayamopa pulyiyande daa. Baa letena renge doko renge kuiyuo kareya. Letena renge doko isa wambu keta yanga paupau lanyi peeyakamiya. Iminjingi panda dokona yanga paupau lakamilyamopa iminjingi doko yanga paupau lenge doko kapa kunja nange.
Anatumi akali mende kingi Jone lenge doko pena leyamopa epeya. Baa yanga paupau lenge dokona waili pii lao akali peparaeme pii doko kinyilyamo lao suu pyapala mona mainyale lao karala epeya. Baa range yanga paupau lenge doko angingyuo kareyande daa. Baa yanga paupau lenge dokona lao waili pii minyuo epeyasa piya. Yanga paupau lenge angi wambu peparaena suu pingi dokona yanga paupau lanyi peenge doko isa yuu dakena epo kareya.
10 Baame isa yuu dake wamba wasiyamo dokona epo kareyamopape isa wambu dupwame baalamo lao kando soo nyii nayami. 11 Banya yuu range dokona epeyamopape banya wambu dupwame baa yako lao nyii nayami. 12 Yako lao nyii nayaminyipape wambu baa yako lao nyepala banya kingi doko kapa ingingi lao suu pyapala mona maipa piyami dupwa Anatunya wane wanake ingyuo karena lapa piya. 13 Isa akalimi ranjama rongo pilyamo yanengena yulu palyuo manjo nyero lao suu pyapala manjo nyingi dopa pyuo manjo nyiyaminde daa. Anatumi nakama manjo nyiya.
14 Pii doko baa isa wambunya yongo nyepala namwa pipya role pyao kareya. Kinyinya rengepe mona keyange palyuo ipingi rengepe baa keta palyuo simbuyamopa ama yanga paupau lao kareyamo kandeyama. Baa Ikinyingi mendaki dokona Rakangeme yanga paupau lao karenge renge doko baa keta pyamalyiyamo kareya.
15 Joneme baasa kando dopa lao pii ketae palyuo leya. Mendende enakana eparamo doko baa wambowana karenge dokona namba baapa manda manjo kapa kara nalyo leyo kande doko akali dakeŋe leya.
16 Mona keyange palyuo ipingi renge baa keta palyuo simbulyamopa imambunya renge keyange dupwa namwa peparae konda pyuole jepa pingi. 17 Mawa Pii doko Mosese keta jiya. Enakana dokopa mona keyange palyuo ipingi rengepe pii angi kinyinya renge dokope Yesu Koraisa baa keta paleyamopa epeya. 18 Mendeme Anatu kanda nange. Ikinyingi mendaki iki doko Rakangena mona enge dokona karenge dokome baa apiyakalende lao rolo leya.
Jone Bapitisimo Nyakamaingi Baame Waili Pii Lao Kareyamo Doko
(Mat 3:1-12; Mak 1:1-8; Lu 3:1-18)
19 Juu wambumi purisi lapope Lipae rara dokona lapope Jerusaleme karo Jone baa apa pyuondepe lao piso sela pena leyami. 20 Dokopa Joneme kalyama napala dopa lao polo leya. Namba Koraisa daa, leya. 21 Dokopa nakamame piso soo, Dokonako suu pyao emba Ilainjape? leyami. Baame, Namba daa lyakande, leya. Anatunya pii nolako lao epara leyami emba akali dokope? leyami. Baa isingi lao, Daa leya. 22 Dokopa emba apipi lao rolo langipi. Piso sela pupwape lami dapwa nakama pii mende isingi lamairama ingilyamo. Emba rangesa suu pyao apiyakalende karene lao rolo langipi leyami. 23 Dokopa baa dopa leya. Anatunya poropeta akali Aisayame.
Yuu muiyane dokona pii mende, Kamongona kata doko rolo pipwape,
Lao karara leyamo doko namba,
leya.
24-25 Dokopa Parisi akali dupwame pena leyamisa epo kareyami akali dupwa dee kamba piso siyami. Emba Koraisa ingya naope Ilainja ingya naope Anatunya poropeta akali pii nolako lao karara leyami doko ingya naope pyuo karare ramo doko akipamo embame bapitisimo nyakamyuo karene? leyami. 26 Joneme nakama isingi dopa lamaiya. Namba ipwana bapitisimo nyakamyuo karo. Nyakamyuo karapunupape nakama karaminyi raka dokona mendali karamo doko nakama kando see nalyaminyi. 27 Namba wambole ipunupa enakana epelyamo dokosa leto. Banya kimbu suu lyolo doko namba kwaenge dokome kapa polaro ingya nalyamo leya.
28 Yuu Betani ipwa Jotane dumarena singi Jone bapitisimo nyakamyuo kareya yuu dokona dopa lao kareyami.
Anatunya Sipisipi Ikyane
29 Dokopa yangama dokopa baa kareyamo dokona Yesu epeyamo kandeya. Kandapala, Anatunya Sipisipi Ikyane isa wambu dupwana koo dupwa nyuo lanyakao para doko kandalapa. 30 Akalinde enakana eparamopa baa wambowana karenge dokona namba baapa manda manjo kara nalyo leyo kande doko lyakande. 31 Baa apisi lao soo gisa nayonopape Isaraele wambu baa soo nyinyale lao ipwa dokome bapitisimo nyakamyuo epeyo leya.
32 Lapala Jone dopa lao lao roleya. Imambu doko yaka wayamu dopale ingyuo yake panda piso lupyuo epo baa keta kareyamo kandeyo. 33 Nambame baa apa pyuonde lao soo gisa nayo. Soo gisa nayonopape namba ipwa dokona bapitisimo nyakamila puu leya dokome namba dopa langiya. Imambu doko lupyuo epo akali mende keta kareya kande dokomeko wambu dupwa Imambu Poo Pyasi dokome bapitisimo nyakamyuo karara langiya. 34 Dokonako ingyuo baa Anatunya Ikinyingi doko kandapala rolo leto, leya Joneme.
Yesumi Disaepole Lapo Kanda Soo Rombo Palyiya
35 Dokona yangama dokopa Jonemoo banya disaepole lamape role pyao kareyami. 36 Dokopa Yesu kata epo peyamo kandapala, Anatunya Sipisipi Yakane doko karamo kandalapa leya. 37 Leyamopa disaepole akali dolapo pii doko sepala Yesu peyamo dokona enakana peyambi. 38 Yesu kapu kyuo nakamba enakana epeyambi doko kandapala nakamba lamaiyuo, Aki kotala epelyambinyi? leya. Dokopa nakambame baa lamaiyuo, Rapae (pii doko Mana Lenge dopakale), emba anja palenge? leyambi. 39 Baame nakamba lamaiyuo, Kandala mwua leya. Baa Paleya doko kandala papala poo keloke yuu kwuayamo dokopa baamoo role pyao peteyami.
40 Akali lama Jonena pii sepala Yesu peyamuli pyuo peyambi dokona mende Enduru lenge Saimone Pitana yangonge doko. 41 Baa aopa yangonge Saimone koto kando nyepala dopa lamaiya. Nambwa Mesaya doko kando nyelambano, leya. (Mesaya doko Koraisa dopale.) 42 Baame Yesu kareyamo dokona Pita lanyuo peya. Yesumi baa kandapala dopa leya. Emba Saimone Jonena ikinyingi lyasili. Emba kingi Sipasa larama leya. (Kingi Sipasa doko wambu kingi kana dopale.)
Yesu Baame Pilipapa Natanielepa
Rombo Palyiya
43 Dokona yangama dokopa Yesu Galili dokona paro lao suu pyapala Pilipa koto kando nyepala namba paronuli pyuo ipupi, lamaiya. 44 Pilipa baa yuu Betesaita range Enduru Pitapana yuu anda repe repe pyuo karenge dokonako palenge. 45 Pilipame Nataniele koto kando nyepala baa dopa lamaiya. Moseseme Lowa buku dokonape dee Anatunya poropeta akali dupwapeme pepa pyao akali mende epara leyami kande doko Yesu Nasarete range Josepena ikinyingi doko kando nyelamano leya. 46 Natanieleme baa lamaiyuo, Yuu Nasarete dokona aki renge keyange mende pulyingisi? leya. Pilipa baa lamaiyuo, Kandambana bwua leya.
47 Yesumi Nataniele epeyamo kandapala baasa kando lao, Doko Isaraele akali angiŋi panga see nange lyakande leya. 48 Natanieleme baa lamaiyuo, Apa pipyasa embame namba letepe? leya. Yesumi isingi lamaiyuo, Pilipame emba ene kee lapa napyamopa isa piki rengesa isarena pisipinyi dokona emba kandapu leya. 49 Natanieleme baa lamaiyuo, Rapu Pingi emba Anatunya Ikinyingilyamo emba Isaraele wambu dupwana Kiŋilyamo leya. 50 Yesumi baa dopa lamaiyuo, Namba emba isa piki lungwalungwa pisipinyi kandapu, lapunu pii dokona dopa lao suu pilipi? Dake kandapala letenyakao doŋo rengya yulu wakasa lapo kando sere leya. 51 Lapala baame dopa lamaiya. Kinyi kinyi langilyu, yake kata lumbwaramopa Ikinyingi Akali kararamo mare dokona Anatunya aŋala dupwa lupyuo epo pulyuo pao pyuo kararami kandare leya.