1 Anatunya yuu kyau yapasi Sayone dokona

wambu dupwa kamenge karasarami byara pyalapape.

Kamongona yuu gii doko repeta epara dokona

Juta wambu dupwa peparae pakame kumuo walu walu lalapape.

2 Dokopa yuu gii doko iminjo kwuamembe lapala

kopa soo pyarambwara.

Aimbu ama soo kaeyo doko yuu kyau dupwa minyarambu nyuo imisa pupurapala

yuu sembelyamo pingi dopale ingilyamo.

Wamba randa dopale yale mende epa nange dokona

dee rengyana dopale mende epa nalu nao narako.

3 Dokopa isareme rao otenge dopale ingyuo aimbumi ee wara pisi dupwa nao otarami.

Aimbumi ene nao panya parami dorena doko ee Etene yale seramo

wambo kalyuo nao parami dorename ipwa kama pyasi sili laramo kandarami.

Dokona bange mende aimbu dupwame yaki nyeraminyi yoko pyuo see nara.

4 Nakama mena ose lenge kambu nyera.

Yanda pelana piso puu lao makandenge dopale ingyuo makandarami.

5 Aimbu dupwa yuu kyau ketae dupwana makandenge dokopa

uliuli kilya kalu lao epele lao

isareme isako poro paro lao renge dopale ingyuo pira.

Nakama akali yanda pinya nyuo suku pyuo karenge dopale ingyuo maki maki pyuo kararami.

6 Aimbu dupwa repe repe pyuo eparami dokopa wambu peparae pakapala

nakamana lenge kambu dupwa kumasi ingyara.

7-8 Nakama yanda pingi akali dopale ingyuo kana rondo dupwana pulyuo

yanda pimwai pyalana pili lao pyuo pirami.

Nakama peparae kata parami dokona

kanda kanda suku piro karo papala

mendasa longapala alowa pyuo ruku raka pyuo paa narami.

Nakama panya paraminyi dokona bange mende sera ramo dokona

karo kaeya napala mee yalapala puu pao parami.

9 Dopa pyuo aimbu dupwa taone andake dokona pyalana makando pao

kana kame dupwana pulyapala yalala pao

anda dupwana pulyuo papala

waa nenge wambu dopale ingyapala windowa kata dupwana kolo parami.

10 Dopa piraminyisa yuu muu dupwa piku piku laramopa

yake doko romo romo pira.

Piramo dokopa neta kanape dolapo iminjiramopa

bui dupwa yake dokona raa narako.

11 Kamongo dokome yuu gala lele lao banya ami akali dupwa dopa pinya dapa pinya lao pii poraiyuo lamaira.

Yanda singi banya pii warombo singi dupwa

ama malu mee dupwa porai wakasako.

Kamongona yuu gii doko koo mangepe nao randa nyuo epara dokona

api mendeme paka nao mona porayapala kararase?

12 Dopa piramopape epapu dakepa Kamongo dokome lao,

Nakamana koo dupwana angi poraiyuo suu pyaokondali pyuo kondapala

nenge naa nao ee lao yamarangyuo kondome kumuo namba karo dokona kapu kyuo ipupwa, leya.

13 Nakamana komau doko mee langa kangwa napala

nakamana mona anda angi kinyi kinyi kondalapape.

Nakamana Kamongo Anatu keta kamba range kapu kyuo ipupwape.

Anjiki pipala sakao pyuo nyingi renge doko baa keta simbwaro karenge.

Baa waiya lao imbwa napala banya lalu lao lenge pii dupwa mee suu pyaro karalu karenge.

Baame yuu peparae koo dupwa kame sepala randa maiya nange.

14 Mende ramo namwana Kamongo Anatumi randa jelana suu pyara doko alowa pipala

namwa keyange keta pyambuo ee nenge dupwa ama malu jera.

Dokopa namwame nengepe waenepe dupwa Kamongo doko mairama.

15 Yuu kyau Sayone dokona byara pyao dokopa

wambu dupwa nenge wasaka pyuo nyuo malu palyuo epena lamailapape.

16 Wambu dupwa epena lao nyuo malu palyapala

Kamongona lao wato larami dokona rapa rapa pilapape.

Wambu andapae dupwa lanyuo epo

Wane wanake kuki dupwa nyuo malu palyuo

dee wane nyaŋa dupwa opetaeko nyuo malu palyuo pirami.

Kamame akali endape ene doo nyepala pisirami dupwa

nakamana anda yaki nyepala ipupwapeko.

17 Purisi akali Kamongome yulu pyakamyuo

tembole anda kolandenge dokopa mena pyao kiso maingi rate dokopana kanya dokona yulu pingi dupwame

ee lao ateŋa dapa lao lalapape.

O Kamongo, embena wambu dupwa kando sakape.

Yuu wakale wakale dupwana wambu dupwame namwa kando giyalya giyana pyuo kilya kando

nakamana Anatu doko anja karamo laope laa nana, lape.

18 Enakana Kamongo dokome banya yuu doko suu pyao kondo karapala

banya wambu dupwa kondome kumuo piya.

19 Baame nakama isingi lamaiyuo,

Epapu nambame nakama witi jingipi ipwa waenepe olipi ipwangepe dupwa jeronopa

nakama nao sikya piramopa kararami.

Dokopa wambu rara menge dupwame dee nakama kilya kando laa narami, leya.

20 Aimbu dupwame nakama pyalena lao dulurena karo epeyaminyi dupwa

lapo yuu muiyane dokona pena laro.

Dee lapo wambo epeyaminyi dupwa Kumungi Ipwa dokona ralinya nembaro.

lapo enakaminyi dupwa Ipwa Kota Metiteraniane dokona ralinyi nembaroko.

Dokopa nakamana yongo kumasi dupwa rumbyuo ai pyara.

Nambame dopa pyuo dupwa pyao kokwa sero doko nakama peparae

kando piyaminyi dokona isingi yano nyakarosa pira.

21 Dokona yuu dupwa paka nalapape.

Kamongo dokome nakamana lao yulu peparae pyakalyamo dokona

rae maiyuo karalapape.

22 Mena dupwa paka nalapape.

Rambi andenge yuu dupwa kyaka yoko pyakalyilyamo.

Isa dupwa jingi lyilyamoko

piki isape girapo isape dupwa ando jingi malu lyuo karaminyi.

23 Sayone wambu dupwa rae maiyuo karalapape.

Kamongome nakama reke lao apunda kamame andake dee kamame kuki jii napala

mee kapa manda minyuo jiya.

Enakana apunda kapa andake kulimbuo

dee wambape dopa pyuo jinginyili pyuo jiya.

24 Dokopa witi lukungi mare dokona nenge dupwa soo simbwara.

Girapo olipi kingingi mauli pete dokona waene welepe ipwange dokome soo simbuo pyoko pyoko lao epo nyisa pao karara.

25 Aimbu malu dupwame nakamana ee jingi nao oteyaminyi

ee kana dupwana nakamana bange isa peyamo peteyami dupwa nambame nakama yano pyakao jero.

Doko nambame aimbu malu dupwa nakama keta peeyo lyakande.

26 Epapu nakama nenge malu seramo napala sikya piramo kararami.

Nakamana Kamongo Anatu yulu keyange nakamana lao pyakayamo doko lakandarami.

Dokona rara lapome nambana wambu dupwa dee kamba kilya kando laka narami.

27 Dokopa Isaraele wambu dupwa, namba nakama pipya repeta

karalyane lao serami.

Namba Kamongo nakamana Anatu doko iki dokona

wakale mende kara nalyamo lao serami.

Dokopa wambu dupwame nambana wambu dupwa dee kamba giyalya giyana pyuo kilya kando laka narami, leya Anatumi.

28 Enakana nambame nambana Imambu wambu dupwa peparaena maralyinya laro.

Dokopa nakamana ikinyipi wanenepe dupwame nambana pii boo pyao larami.

Nakamana alemo dupwame kombeya pirami.

Nakamana wanyane akali dupwa pii repa repa pyuo kandarami.

29 Dopa piramo yuu gii dusipana mee kendemande enda akalipi dupwa keta opetaeko

nambana Imambu maralyinya laro.

30 Repe repe lamaiyuo dokopa yake dulunya yulu andake wambu dupwame kando yamarangwarami dopale pyuo

isa yuu dokona wambu kandena lao yulu andake lapo lasaka pyuo piru.

Ranjama kulimbuo soo isare rao isare sukwa doko kopa soo rali pyuo pira dusipa kandena lao lasaka piru.

31 Neta doko iminjo rali pyuo

kana doko ranjama ingyuo pira.

Wambo dopa piparamo dokopa enakana Kamongona yuu gii koo randa doko pyaka sera.

32 Dokopa mendeme Kamongona kingi lapala baa lete wai pyao nyakapili lao lara ramo doko baa nyiso pyuo nyera.

Kamongome leyamuli pyuo

yuu kyau Sayone dokonape dee Jerusaleme dokonape lapo mee lete kararami.

Dokopa Kamongome wambu lapo rombo palyuo nyeramo dupwa kuma nao lete kararami.