MAKE
Makeme kanda soo pepa piyamo doko waili pii keyange dakena Yesu Koraisa Anatunya Ikinyingi dokona lao palamo. Yesu baa porai renge paleyamopa yulu piya, Makeme leya. Baame imambu koo dupwa nyuo anamasi minyuo wambunya koo dupwa kame sakamyuo mana lao kareyamo dokome banya porai renge doko paneya. Yesumi baa rangena lao dopa leya. Namba Ikinyingi Akali dokome wambu koo pyuo karaminyi dupwana lao kumuo kiiramo nyero, leya.
Make baame Yesumi yulu piyamo dupwana angingyuo kyawa nyuo lapala banya mana lao pii kambumi lao piyamo dupwana lao kuki iki leya. Make baame Jone Bapitisimo yulu piyamo dokope Yesu bapitisimo nyiyamo dokope Satane baame Yesu makande piyamo dokope dusipana wambo pii kuki pyao reteya. Pyao retapala dokona piso aopa Make baame Yesumi wambu anga piyamo dupwa pyuo nyuo mana lao kareyamo dolapona lao piya. Yuu gii dupwana wambu dupwame Yesunya pii soo nyepala baame leyamuli pyuo piyaminyi dupwa banya lao konda pyuo mana nyiyami. Mana nyiyaminyipape banya yanda pimwai dupwame imbumi kumuo kareyami. Yesu Koraisa baa oo repeta kumalana koro mendakinya isa yuunya karo yulu piyamope isa mamandona kumuo paleyamope lopo epeyamope pii dusipa Make baame enakana pyao reteya.
Pii ama enakana pyasi palamo (16:9-20) Make baame pyaa naya. Akali wakale mendeme pyao reteya lao suu pilyamano.
Buku Dakena Pii Palamo Dusipa
1. Waili pii kanda soo leya 1:1-13
2. Yesu baa yuu Galili dokona panembena pii lao yulu pyuo kareya 1:14—9:50
3. Yesu Galili karo Jerusaleme lao peya 10:1-52
4. Yesu kumara doko koro mendaki paleyamopa yuu Jerusaleme repeta kareya 11:1—15:47
5. Yesu lopo epeya doko 16:1-8
6. Kamongo Yesu lopo epapala wambu dupwa keta pano lasaka piya doko. Pano epapala baa yake panda peya doko 16:9-20
1
Bapitisimo Nyakamaingi Jonena Pii Lao Kareya Doko
(Mat 3:1-12; Lu 3:1-18; Jo 1:19-28)
1 Yesu Koraisa Anatunya Ikinyingi dokona lao waili pii keyange dakena pyasi palamo. 2 Dokona lao poropeta Aisayana buku dokona pii mende palamo.
Nambame nambana waili akali doko
embena lenge kambu dokona wambo nembelyo kande.
Embena kata wapuo para.
3 Yuu muiyane dokona pii mende dopa lao kyakale lao karara.
Kamongona kata mondo lalapa,
banya kata dupwa wapuo rolae pyuo karalapa lara.
4 Aisayana pii leyamuli pyuo Jone bapitisimo nyakamaingi baa yuu muiyane dokona pano epeya. Epapala, Nakama mona kapu kyuo bapitisimo nyelapape, dokopa nakamana koo dupwa Anatumi nyuo kame sakara, lao kareya. 5 Yuu Jutia range dupwa peparaepe Jerusaleme wambu dupwa peparaepe baa kareyamo dokona peyami. Pao kareyaminyi dokopa baame nakama bapitisimo nyakamyuo kareyamopa nakamana koo dupwa polo lao ipwa Jotane dokona bapitisimo nyiyami. 6 Jone banya komau kamelena imanjimi wasisinde lisa marapu mendeme minyanyi pyuo wapungi doko wapuro kareya. Aimbupi amburali ipwangepe nao kareya. 7 Baame wambu dupwa pii boo pyao lamaiyuo dopa leya. Porakai mende nambapa kapa pii nara baa enakana epelyamo. Namba akali koo dokome pongwa napala banya kimbu suu lyolo doko polarono kapa ingya nalyamo. 8 Nambame nakama ipwa dokome bapitisimo nyakao karo. Nambame ipwame bapitisimo nyakao karapunupape baame nakama Imambu Poo Pyasi dokome bapitisimo nyakara, leya.
Yesu Bapitisimo Nyiya
(Mat 3:13—4:11; Lu 3:21-22; 4:1-13)
9 Yuu gii dokopa Yesu yuu Galili dokona yuu kuki lama Nasarete lenge doko yaki nyepala epeyamo dokopa Joneme baa ipwa Jotane dokona bapitisimo nyakamiya. 10 Baa ipwa dokona sipurao neta epeyamo dokopa yake dulu aopa lumbwapala Imambu Poo Pyasi yaka wayamu dopale mende baa keta pisinya isa lupyuo epeyamo doko Yesu kandeya. 11 Dokopa yake dokona piso pii mende epeya. Emba nambana Ikinyingi mona retelyo doko. Nambame emba raeko maiyuo karo, leya.
12 Dokopa Imambu dokome aopa Yesu nyuo lanyuo yuu muiyane dokona peya. 13 Yuu muiyane dokona Sataneme yuu akalisa kisima baa apa pilyape lao kandalana makande pyuo kareyamopa kareya. Dokopa baa mena suwape kama palenge dupwa pipya role pyapeta kareya. Dopa pyuo kareyamo dokopa aŋala dupwame baa isaro pyuo kareyami.
Yesu Baame Disaepole Akali Lapo Rombo Palyiya
(Mat 4:12-22; Lu 4:14-15; 5:1-11)
14 Yuu mendepa Jone puu maiyaminyipa Yesu yuu Galili dokona Anatunya waili pii keyange boo pyao lao epeya. 15 Baame yuu gii pyaka sepelyamo dokona Anatunya isingi yulu repetale epelyamo. Nakama mona kapu kyuo waili pii keyange doko kinyi lao suu pyalapape, leya.
16 Yesu Galili ipwa muiyane pete nemba nemba papyuo kareyamo dokona Saimone yangonge Endurupa nakambana oma nyingi yulu pyuo karo nyuu oma nyingi mende ipwa dokona pyambuo kareyambinyi kando nyiya. 17 Kandapala Yesu dopa leya. Namba paronuli pyuo ipupwape. Nakamba oma nyuo karambi doko suu pyao namba nyisaronopa akali yango nyerami ingilyamo, leya. 18 Nakamba oma nyuu dusipa aopa yaki nyepala baa peyamuli pyuo peyambi.
19 Baa kata dokona mee mende peyamo dokopa Jemesa Sepetena ikinyingi doko banya yangonge Jonepa nakambana bote dokona karo nyuu oma nyingi dusipa lee kyaso paleyambinyi pao kando nyiya. 20 Kandapala aopa epena leya. Leyamo dokopa Sepete nakambana rakange banya yulu pingi akali pipwa bote dokona kareyaminyi raka lanyi yaki nyepala baa peyamuli pyuo peyambi.
Yesumi Imambu Koo Raka Lanyi Nembeya Doko
(Lu 4:31-37)
21 Dokopa yuu Kapaneame dokona peyami. Peyaminyi dokopa yuu koro petenge dokopa sinakoke anda dokona kolando papala mana lao kareya. 22 Baa misi pii lenge akalinya pii moko minyuo laa napala baa renge palyuo lao mana lamaiyuo kareyamopa banya pii dokome nakamana monarena piya.
23 Dokopa nakamana sinakoke anda dokona akali mende kopyali imambu koo dokome soo pyale leyamo peteya. 24 Pisipala baa pii porakaiyuo kaeyo dopa pyuo leya. Yesu Nasarete range doko embame namwa apa pinya lao pilinyi? Embame namwa kokwa sela ipisi? Emba apipi lao namba silyu. Emba Anatunya akali yapasi, leya. 25 Dokopa Yesumi baa isingi pyalana pyuo lamaiya. Emba pii laa kae. Akali doko raka lanyi yaki nyinya leya. 26 Leyamo dokopa imambu koo dokome baa nyuo walu walu leya. Walu walu lapala pii porakaiyuo kaeyo lapala raka lanyi yaki nyiya. 27 Yaki nyiyamo dokopa wambu dupwa peparae mona nembapala nenge pakara pakara pyuo lao, Doko akisi? Doko mana pii enengendelamo. Yesu renge palyuo lapyamo dokopa imambu koo dupwa letamuli pingilamo, leyami. 28 Yesu baa renge palyuo yulu andake pilyamo lao aopa yuu Galili kipwa kipwa peparae dupwana kapa kapa siyami.
Yesu Baa Wambu Malu Pyuo Nyiya
(Mat 8:14-17; Lu 4:38-41)
29 Baa sinakoke anda yaki nyepala aopa Saimone Endurupana anda Jemesa Jonepa role pyao kolandeyami. 30 Dokopa Saimonena enda imwange dokona yanenge isaro rao anga piyamo siya. Siyamopa, Enda doko anga pyapya, lao Yesu lamaiyami. 31 Lamaiyaminyi dokopa baame endana kingi kii minyuo minyalyuo nyiya. Nyiyamo dokopa yanenge isare reyamo doko pyai neyamopa mee ingiya. Mee ingiyamopa enda dokome nakama nyiso nenge pyuo kareya.
32 Neta anda pao kone pupuri piyamo gii dokopa anga pingipi kopyali imambu koo dokome soo pyale leyamo karengepe baa kareyamo dokona lanyuo epeyami. 33 Wambu yuu range peparae kambu dokona kapo kareyami. 34 Wambu malu anga wakale wakale piyamo dupwa baame pyuo elya pyuo nyuo imambu koo malu dupwa raka lanyi nembo kareya. Imambu koo dupwa Yesu dopa pyuondelyamo lao siyamisa dokona baa nakama pii laa nana lao pena leya.
Yesu Baa Yuu Galili Dokona Boo
Pyao Lamaiya
Pyao Lamaiya
(Lu 4:42-44)
35 Yuu yangalana ene endenge siyamo dokopa baa sipurao kama papala yuu iki siyamo mendena ateŋa lao peteya. 36 Dokopa Saimonemoo akali role pyao kareyami dupwape baa peyamo dokona moko minyuo peyami. 37 Nakamame baa kando nyepala dokopa baa lamaiyuo, Wambu peparae emba koto papilyaminyi, leyami. 38 Dopa leyaminyi dokopa baame nakama dopa lamaiya. Yuu wakale lapo dupwana kama monale. Dupwana opetae namba boo pyao mana lamairu. Namba dopa piruŋu lao epeyo, leya. 39 Dopa lapala baa yuu Galili kapa kapa pyuo pao yuu rangena sinakoke anda dupwana pii boo pyao lao imambu koo dupwa raka lanyi nembo papiya.
Yesumi Akali Mende Pyuo Nyiya
(Mat 8:1-4; Lu 5:12-16)
40 Dokopa akali rapa neyamo mende Yesu kareyamo dokona epapala piso sokondali pyuo wapambu pii pyaro piso lao, Embame namba elya pyuo nyipuli lare ramo doko namba kapa elya pyuo nyere leya. 41 Dokopa Yesumi kondome kumapala banya kingi pyasinju lapala minyandapala baa lamaiyuo, Nambame emba pyuo nyipuli yaka leto. Emba elyape karape, leya. 42 Leyamo dokopa banya rapa aopa loo leyamopa baa elyape kareya. 43 Dokopa Yesumi akali pena lamaiyuo dokopa, 44 Namba pyuo nyipyaŋa lao akali mende lamai napipi lao laokondali piya. Emba papala anga mee ingiya doko purisi akali lasaka piri. Wamba Moseseme anga mee ingyaramo dokopa bange pyao kiso Anatu mairami leya dokoko embame maiyala puu. Dokopa embena anga mee ingilyamo doko wambu dupwa serami leya. 45 Yesu dopa pyuo leyamopape akali dokome wambu malu mee lamaiyuo, Namba Yesumi pyuo nyipyaŋa, lao boo pyao lamaiyuo peyamopa kapa kapa piya. Kapa kapa piyamo dokona wambu malu mee Yesu kandalana kareyaminyisa Yesu baa taone dupwana enakana kapa para ingya naya. Baa yuu iki siyamo dupwana kareya. Dokona kareyamopa yuu muu dupwana wambu peparae baa koto epeyami.