3
Goti mafaꞌneꞌaifeꞌmo apava gemo huꞌniya gemae
Afiyo, Afotimoꞌa lagaefeꞌmo aeto agufa kava huno hau ayamopafiꞌmo hauꞌnigenoꞌaeꞌmo, Mafaꞌneꞌnimogitapae, huno nehigetaeꞌmo lahau neꞌaune. Ma mopafi vayaꞌmogimo Gotiꞌmo oꞌageꞌnayaꞌmofeꞌmo lagaeꞌeꞌmo lageꞌa aeto nosae. Nahauꞌniya vayaꞌmogitapae, hemenimo Goti mafaꞌneꞌamo maiꞌnonanageta henagaꞌamo haiya agufa vayaꞌmo maisupi, huta oꞌafiꞌnonaꞌmonanafa agaemo emineno afole neꞌaisigetaeꞌmo agaekana huta maigune, huta afiꞌnone. Haiya agufa vekamo maiꞌnifi, huta ageta aeto hugunaꞌmofeꞌmo agaekana huta maigune. Muki vayaꞌamogimo, ani kavaꞌmo afole aigiye, huꞌa huteꞌa agava maiꞌneꞌa apamogaga neꞌaiya vayaꞌmo apaikaiꞌapimo sese huꞌa neꞌapatae. Agaemo yaveyaveꞌage aipaꞌe vekamo maiꞌniyanageꞌa agaekana huꞌa maisayafeꞌmae.
Hosu kavaꞌmo nehaya vayaꞌmogimo Goti keꞌaepa geꞌamo ago amagiꞌa neꞌatalae. Hosu kavaꞌmo Goti keꞌaepa geꞌamo amagiꞌa neꞌatalaya kavaꞌmo haneꞌniye. Lapakaemo ago afiꞌnayana Kalaisiꞌa hosu kavatimo alino atalesiyafeꞌmo emineno afole aiꞌniye. Agaiꞌa aipafiꞌmo hosu kavaꞌamo alagi ohaneꞌniye. Muki vayaꞌmogi agaepiꞌmo alagi maiꞌnisaya vayaꞌmogimo hosu kavaꞌmo nosae. Hosu kavaꞌmo nehaya vayaꞌmogimo Kalaisiꞌa oꞌagege ageꞌa aeto osuge huꞌnae.
Aise mafaꞌneꞌnimogitapae, fiku yanagetapa apateꞌnisageꞌa humi lapategayanagi. Kalaisiꞌa fatago vekamo maiꞌniya kava huꞌa alagepa kavaꞌmo nehaya vayaꞌmo fatago vayaꞌmo maiꞌnae. Sataniꞌa aepa faiꞌniya afinatetiꞌmo hosu kavakeꞌmo hume hume neꞌeya kava huꞌa muki vayaꞌmogi hosu kavaꞌmo nehaya vayaꞌmo Satani vayaꞌamo maiꞌnae. Goti Mafaꞌneꞌamoꞌmo Satani aliꞌyaꞌamo alagi alino hano huno atalesiyafeꞌmo emineno afole aiꞌniye. Ina lagimo Gotiꞌa alino apateꞌnifi Goti avina yaꞌamo apaipafiꞌmo haneꞌniyaꞌmofeꞌmo hosu kavaꞌmo akame nosae. Gotiꞌa alino apateꞌniyaꞌmofeꞌmo apakaemo hosu kavaꞌmo alagi akame osugae. 10 Muki vayaꞌmogi fatago kavaꞌmo nosaya vayaꞌmo Goti mafaꞌneꞌamo oꞌmaiꞌnae. Konagaꞌapieꞌmo nohapaiya vayaꞌmogimo ani kava huꞌa Goti mafaꞌneꞌamo oꞌmaiꞌnae. Ani kavatetiꞌmo Goti mafaꞌnemo maiꞌnafi Satani mafaꞌnemo maiꞌnafi huꞌa apakesaya kavaꞌmo haneꞌniye.
Konagatapieꞌmo lapaino, huno huꞌniya gemae
11 Lapakaemo aepa faiꞌnaya afinatetiꞌmo, konagatapieꞌmo lapau lapayamopafiꞌmo lapaino, huta lapa paiꞌnonagetapa afiꞌnae. 12 Kenikana huta oꞌmaisuna kavaꞌmo haneꞌniye. Keniꞌa hosu vekamo mafaꞌneꞌamo maiꞌneno aganaꞌamoꞌmo amagiꞌnigeno faliꞌniye. Na kava higeno kamiti amagiꞌniye. Keniꞌa hosu kavaꞌmo huꞌnigeno aganaꞌamoꞌmo fatago kavaꞌmo huꞌniyaꞌmofeꞌmo kamiti amagiꞌnigeno faliꞌniye. 13 Konagaꞌnimogitapae, ma mopafi vayaꞌmogimo apaini huꞌa lapatesagetapaeꞌmo lapau oꞌaiyo. 14 Lagaemo konagatieꞌmo lahau layamopafiꞌmo nelahaiyaꞌmofeꞌmo ago afiꞌnonana nefaliya kavategatiꞌmo ago ataleta eta afaꞌa neꞌmaiya kavategamo neꞌmaune. Konagaꞌapieꞌmo hapau apayamopafiꞌmo nohapaiya vayaꞌmo nefaliya kavategamo alagi neꞌmaiye. 15 Konagaꞌamofeꞌmo aini huno neꞌateya vekamoꞌa konagaꞌamoꞌmo kamiti neꞌamagiya vekagana huno maiꞌniye. Lapakaemo ago afiꞌnayana kamiti neꞌapamagiya vayaꞌai apaipafiꞌmo maige maige huꞌa neꞌmaiya yaꞌmo alagi nohane. 16 Yesuꞌa afaꞌa neꞌmaiya yaꞌamo lagaetefeꞌmo ataleꞌniyaꞌmofeꞌmo lagaefeꞌmo hau ayamopafiꞌmo hauꞌniya kavaꞌamo ageꞌnonanageta ani kava huta konagatimogitefeꞌmo afaꞌa neꞌmauna yatimo atalesuna kavaꞌmo haneꞌniye. 17 Haneꞌniyaꞌmonanafa mago vekamoꞌa hapa maesiya yaꞌamo haneꞌniya vekamoꞌa agesiyana mago konagaꞌamoꞌmo kafu huteno maiꞌnisigeno agetenoꞌaeꞌmo hau huno ateteno oꞌamiꞌnisiyana Gotiꞌa hau ayamopafiꞌmo hauꞌniya agufa kavaꞌamo aipafiꞌmo haneꞌnifiye. 18 Aise mafaꞌneꞌnimogitapae, lavayaꞌaletikeꞌmo geꞌagekeꞌmo hutaeꞌmo, lahau layamopafiꞌmo nelahaiye, huta osuta alagi lama ge huno lahau layamopafiꞌmo lahauꞌninageta alagepa kavaꞌmo higetao.
Goti aulagaleꞌmo koli nosaya vayaꞌaifeꞌmo apava gemo huꞌniya gemae
19 Ani kavatetiꞌmo ago ageꞌnonana lama ge vayaꞌamo maiꞌnonaꞌmofeꞌmo laipamoꞌmo falu huꞌnisigeta Goti aulagaleꞌmo atete osugune. 20 Yuꞌilaga mafaꞌnetimoꞌa, hosu kavaꞌmo nehae, huno nehisigenoꞌaeꞌmo Gotiꞌa yuꞌilaga mafaꞌnetimo ago aeno agaseno muki kavatimo ageꞌniye. 21 Nahauꞌniya vayaꞌnimogitapae, Yuꞌilaga mafaꞌnetimoꞌa hosu kavaꞌmo nehae, huno nosisiyana lagaemo Gotiꞌa laha maegaiye, huta ago afiꞌnone. 22 Lagaemo keꞌaepa geꞌamo akame nehunagenoꞌaeꞌmo amuse huno nelateya agufa kavaꞌmo nehunaꞌmofeꞌmo aukaya nehunagenoꞌaeꞌmo alino nelamiye. 23 Goti keꞌaepa geꞌamoꞌmo hunoꞌaeꞌmo, mafaꞌneꞌnimo Yesu Kalaisi agiꞌalefeꞌmo lapakesa afita fatago nehutapaeꞌmo konagatapimogifeꞌmo lapaino, huno laha paiꞌniye. 24 Muki vayaꞌmo keꞌaepa geꞌamo akame nehaya vayaꞌmo Gotipiꞌmo alagi maiꞌnageno apakaepiꞌmo alagi neꞌmaiye. Ani kavatetiꞌmo ago ageꞌnonana Gotiꞌa alino lamiꞌniya Aunemeꞌaletiꞌmo lagaepiꞌmo alagi neꞌmaiye.