2
Nunumuꞌmo hisaya kavafeꞌmo huꞌniya gemae
Nagaemo, Goti vayaꞌamogimo hogoteꞌa muki vayaꞌaifeꞌmo Gotifekeꞌmo aukaya huꞌa ge huge nunumuꞌmo huge nunumuꞌmo huꞌa apatege hao ke hege huꞌa maiyo, huꞌna lokiya gefatikeꞌmo nehuve. Gamani vayaꞌe muki yagaiꞌa neꞌapataya vayaꞌefeꞌmo nunumuꞌmo huta apategetao alagepa huta magokepi lokaeta maiꞌneta Gotifeꞌmo mono nehuta muki vayaꞌaitegamo fatago kavaꞌmo hugunanagi. Lagufamo alino katino nelateya Gotiꞌa ani agufa kavafeꞌmo hauꞌnigenoꞌaeꞌmo kanale kavaꞌmo haneꞌniye, huno nehiye. Agaemo muki vayaꞌai apakufamo alino katino apatesigeꞌa lama geꞌamo afiꞌa aeto hisayafeꞌmo hauꞌniye. Gotiꞌa magoke vekamo maiꞌnigeta lagaemo maiꞌnonanageno agaeꞌeꞌmo magokepi lokaeta maisunafeꞌmo magoke vekamo folagate vekamoꞌa ma mopafi vayaꞌai agufamo aliꞌniya vekamo Kalaisi Yesuꞌa maiꞌniye. Agaemo muki vayaꞌaina miya faino apatesiyafeꞌmo agaiꞌa agufaꞌamo Gotiꞌmo amiꞌnigeꞌapaeꞌmo Gotiꞌa lekana pai maleꞌniya afinaꞌmo geꞌamo aeꞌa hakalo huꞌa hapa paiꞌnae. Ani kavatefeꞌmo lekana paino nateꞌnigeꞌna geꞌamo aeꞌna hakalo huꞌna hapa nepauva vekamo maiꞌneꞌna apa vekaꞌamoꞌna alu nofi vayaꞌmogimo apakesa afiꞌa fatago hisayafeꞌmo lama geꞌamo aliꞌna apaya neꞌmalova vekamo maiꞌnove. Aigofe gemo nosufa alagi lama gemo nehuve.
Nahauꞌniyanageꞌa muki vemogimo lole apakesamo oꞌafiꞌneꞌa apaote kavaꞌmo huꞌa apaipamo neleya kavaꞌmo ataleꞌa alagepa huꞌa maiꞌneꞌa muki haopalegaeꞌmo nunumuꞌmo hugae.
Aꞌne anagaꞌaifeꞌmo huꞌniya gemae
9-10 Ina kava huno nahauꞌniyanageꞌa aꞌnemogimo vayaꞌmogi apakesayafeꞌmo kukenaꞌapimo aliꞌa oꞌvaiꞌa alagepa huꞌa apakesamo afiꞌneꞌa kukenamo aliꞌa vaigae. Apayokapiꞌmo konali alige apakufaleꞌmo konali alige lusi moniletiꞌmo miya nefaiya kukenamo aliꞌa vaige osugayaꞌmonanafa Goti mafaꞌnemo maiꞌnone, huꞌa nehayaꞌmofeꞌmo alagepa kavaꞌapimo kukenagana huꞌa aliꞌa vaigae. 11 Aꞌnemogi Goti gemo neꞌafiꞌapaeꞌmo ge osuꞌa mono vayaꞌai apaiyafikeꞌmo maigae. 12 Nagaemo aꞌnemogi aliꞌa apaya malege ve anagaꞌaiteꞌmo yagaiꞌa apatege hisayafeꞌmo aliꞌna oꞌapateꞌnovanageꞌa ge osuꞌa afaꞌa maigae. 13 Gotiꞌa hogoteno Atamuꞌmo alo huteno Iviꞌmo alo huno ateꞌniyaꞌmofeꞌmae. 14 Sataniꞌmo Atamuꞌa humi oꞌateꞌnifa Ivikeꞌmo humi ateꞌnigeno Goti keꞌaepa geꞌamo ago amagino ataleꞌniye. 15 Amagino ataleꞌniyaꞌmofeꞌmo aꞌnemogi apakesa afiꞌa fatago huge hapau apayamopafiꞌmo hapauge apaote kavaꞌmo huge vayaꞌmogi apakesayafeꞌmo apamoꞌya aige huꞌa maime maime neꞌvisagenoꞌaeꞌmo Gotiꞌa mafaꞌneꞌamo alino ateꞌnigeno emineꞌniya kavatetiꞌmo apakufamo alino katino apateteno hapau vaigiye.