4
Yesuꞌa Samaliya kotega a kanomo ha paiꞌniya gemae
Falasi mono vayaꞌmogi afiyana Yesuꞌa asole vayaꞌmo apavalelineno geꞌamo neꞌafiya vayaꞌmo alino hamaleno apateteno aniꞌmo faleno apateꞌniye. Ani kava huꞌniya kavatetiꞌmo Yoniꞌa ago aeno agaseꞌniye, huꞌa hapa paiꞌnageꞌa afiꞌnae. Afiꞌnayaꞌmonanafa Yesuꞌa agaiꞌamo aniꞌmo faleno oꞌapateꞌnifa geꞌamo neꞌafiya vayaꞌmogigeꞌmo aniꞌmo faleꞌa apateꞌnae. 3-4 Yesuꞌa Falasi vayaꞌmogi afiꞌnaya apaipa apakesamo apaketenoꞌaeꞌmo Yutiya kotegatiꞌmo ataleno Galeliya kotegamo halate aino atagi neno ugefeꞌmo huꞌniye. Gotiꞌa Samaliya kotega folagapiꞌmo ka valino ateꞌnigeno uꞌniye. Samaliya kotega mago taonimo agiꞌamo Saika kotegamo uno avaꞌyi huꞌniye. Ani haopalega Yekopuꞌa mago mopamo alino mafaꞌneꞌamo Yosefeꞌmo amiꞌniya mopamo haneꞌniye. Ani haopalega Yekopuꞌa keli kafi maleꞌniya ani kotuꞌmo haneꞌnigeno Yesuꞌa yatala kateꞌmo eꞌniyaꞌmofeꞌmo agufafilagati alaga haeꞌnigeno eno ani ani kotu haopaleꞌmo itopaleꞌmo maiꞌniye. Yegemo lamino falesiyafeꞌmo hogo huꞌniya afinaꞌmo maiꞌniye. Fai maiꞌnigenoꞌaeꞌmo mago Samaliya a kanomoꞌmo aniꞌmo he fisiyafeꞌmo eꞌnigenoꞌaeꞌmo, aniꞌmo he fika namiyo, huno ha paiꞌniye. Geꞌamo neꞌafiya vayaꞌmo neꞌyaꞌmo miya faisayafeꞌmo taonifilagamo ago utageno agaiꞌageꞌmo maiꞌniye. Yu vayaꞌe Samaliya kotega maiꞌnaya vayaꞌeꞌmo magokepiꞌmo lokaeꞌa oꞌmaiꞌnafa apaote apaote huꞌa maiꞌnayaꞌmofeꞌmo ani a kanomoꞌa geꞌaleꞌmo aeno atagaina hunoꞌaeꞌmo, kagaemo Yu nofi vekamo maiꞌnanageꞌna nagaemo Samaliya a kanomo maiꞌnovana na kava higekaeꞌmo aniꞌmo he fika namiyo, huka nehane, huno ha paiꞌniye. 10 Ha paiꞌnigenoꞌaeꞌmo, kagaemo Gotiꞌa fiku hapa maeno neꞌapamiya yaꞌmo ageteka aniꞌmo he fika namiyo, huno ge huꞌniya vekamo ageka aeto huꞌnanesinana agaefeꞌmo namiyo, huka afi gesanageno kanage kanage huno haineno emineꞌneꞌeya aniꞌmo kamiꞌniyesine, huno ha paiꞌnigenoꞌaeꞌmo 11 Ala nene, paketi oꞌaliꞌnanaꞌmofeꞌmo yatala kelimo haneꞌnigi haiyatetiꞌmo ani kanage kanage huno haineno emineꞌneꞌeya aniꞌmo he figane. 12 Laginago vekamo Yekopuꞌa mani keli kotuꞌmo hakino lateꞌniye. Agaemo aniꞌmo he fino nege mafaꞌne anagaꞌamogi aniꞌmo he fiꞌa nege yuna afu anagaꞌamogi nege huꞌa neꞌnae. Kagaemo Yekopuꞌa aeꞌna agaseꞌnove, huka nehapiye, huno afi geꞌnigenoꞌaeꞌmo, 13 ina lagimo mani aniꞌmo neꞌnesafigeno halate anifeꞌmo hapaugiyaꞌmonanafa 14 ina lagimo nagaemo aliꞌna apamisuva aniꞌmo aliꞌa nesafigeno halate magoꞌe huno anifeꞌmo alagi ohapaugiye. Nagaemo aniꞌmo aliꞌna apamisugeno apaipafiꞌmo haneꞌneno meti anikana huno haineno afaꞌa maisaya yaꞌmo alino apamisigeꞌa alagepa huꞌa maige maige huꞌa maigae, huno ha paiꞌnigenoꞌaeꞌmo, 15 Ala nene, nagaemo anifeꞌmo oꞌnahausigeꞌnaeꞌmo eꞌna maniletiꞌmo aniꞌmo he ofisuvafeꞌmo ani aniꞌmo he fika namiyo, huno ha paiꞌnigenoꞌaeꞌmo, 16 uka anaukamoꞌmo avalelika eno, huno ha paiꞌnigenoꞌaeꞌmo, 17 Anauꞌnimoꞌmo oꞌmaiꞌniye, huno ha paiꞌnigeno Yesuꞌa, anauꞌnimoꞌmo oꞌmaiꞌniye, huka hana gemo lama ge hane. 18 Faefuꞌa veleꞌmo maiꞌnanageno hemenimo kagaeꞌeꞌmo lokaetana maiꞌnaꞌa vekamo anaukamoꞌmo oꞌmaiꞌniye. Lama ge naha paiꞌnane, huno ha paiꞌnigenoꞌaeꞌmo, 19 Ala nene, ago kageꞌnovana kagaemo kaune vekamo maiꞌnanageꞌna kageꞌnove. 20 Muki laginago vayaꞌmogi mani aveleꞌmo Gotifeꞌmo mono huꞌnayaꞌmonanafa lapakaemo Yu vayaꞌmogitapa hutapaeꞌmo, Yulusalemu taonifikeꞌmo Gotifeꞌmo mono hiyo, hutapa nehae, huno ha paiꞌnigenoꞌaeꞌmo 21 Yesuꞌa, Ane, geꞌnimo alagepa huka afiyo. Mago afinaꞌmo afole aisigeꞌapaeꞌmo mani aveleꞌmo muki yaꞌmo Afoꞌamofeꞌmo mono osuge Yulusalemu taonifiꞌmo mono osuge hugae. 22 Lapakaemo Samaliya vayaꞌmogitapamo ina lafeꞌmo mono nehupi hutapa alagepa hutapa oꞌageꞌnae. Lagaemo Yu vayaꞌmogita ina lafeꞌmo mono nehupi huta ago ageꞌnone. Yu vayaꞌaitegatiꞌmo alagepa gemo aino atagu faesigeno Gotiꞌa apakufamo alino katino apateteno hapau vaigiye. 23 Goti Aunemeꞌamoꞌmo lama ge mono nehaya vayaꞌai apaipafiꞌmo aliꞌyaꞌmo alisigeꞌapaeꞌmo muki yaꞌmo Afoꞌamofeꞌmo apaipa apakesafatiꞌmo mono huteꞌa Goti geꞌamo lama gelefeꞌmo mono hisaya afinaꞌmo afole aigefeꞌmo nehiyaꞌmonanafa hemenimo ago afole aiꞌniye. Muki yaꞌmo Afoꞌamoꞌa ani agufa vayaꞌmogi agaefeꞌmo mono hisaya agufa vayaꞌmo kahauya huno apakesiyafeꞌmo nehiye. 24 Gotiꞌa aunemeꞌe vekamo maiꞌniyaꞌmofeꞌmo agaefeꞌmo mono nehaya vayaꞌmogi apaipa apakesafatiꞌmo mono nehuꞌa lama gelefeꞌmo mono hugae, huno ha paiꞌniye. 25 Ani a kanomoꞌa, ago afiꞌnovana Mesaiya vekamo agiꞌamo Kalaisiꞌa enoꞌaeꞌmo muki ani agufa gemo laha paigiye, huno ha paiꞌnigenoꞌaeꞌmo, 26 Kaha nepaiya vekamo agaekeꞌmae, huno ha paiꞌniye.
27 Ani afinaꞌmo Yesu geꞌamo neꞌafiya vayaꞌmo aiꞌa atagi neꞌeꞌa agayana a kanoꞌeꞌmo kege nehaꞌageꞌapaeꞌmo eꞌa anaketeꞌapaeꞌmo lusi kava huꞌa hapau aiꞌnae. Hapau aiꞌnayaꞌmonanafa na agufa yaꞌmo aligefeꞌmo nehane, huꞌa afi okege na kava higeka mani a kanoꞌeꞌmo kege nehane, huꞌa afi okege huꞌnae. 28 Eꞌa avaꞌyi huꞌnagenoꞌaeꞌmo ani a kanomo ani keꞌamo ateno atagi nenuno taonifiꞌmo maiꞌnaya vayaꞌaifeꞌmo, 29 mago vekamoꞌa muki akeyaꞌvilaga huꞌnova kavaꞌnieꞌmo ava gemo huno naha paiꞌniyanagi utapa ageyo. Ani vekamo Kalaisi neꞌmo maiꞌnisifi huꞌna nagesa afuve, huno hapa paiꞌniye. 30 Apakaemo taonifatiꞌmo ataleꞌa Yesutegamo uꞌnae. 31 Neꞌageꞌapaeꞌmo geꞌamo neꞌafiya vayaꞌmogi, Tisao, huꞌa, neꞌyaꞌmo alika no, huꞌa ha paiꞌnagenoꞌaeꞌmo, 32 lapakaemo neꞌyaꞌnimo haneꞌniyana ani neꞌyaꞌmo alagi oꞌageꞌnae, huno hapa paiꞌniye. 33 Apakaiꞌapi apakaiꞌapimo ge huge afige huꞌapaeꞌmo, mago vekamoꞌa neꞌyaꞌmo ago alinineno amiꞌnigeno neꞌnifi, huꞌnae. 34 Yesuꞌa, alino nateꞌnigeꞌnaeꞌmo eꞌnova vekamoꞌa hauꞌniya kavaꞌamo nehuꞌna namiꞌniya aliꞌyaꞌnimo aliꞌna hano huꞌna atesuva aliꞌyaꞌmo nagaemo neꞌyaꞌnigana huno haneꞌniyaꞌmofeꞌmae. 35 Lapakaemo hutapaeꞌmo, loleꞌe loleꞌe kaimo utesigeno neꞌyaꞌmo afu legeꞌa neꞌaliya afinaꞌmo afole neꞌaiye, hutapa nehafiye. Muki hoyaꞌafiꞌmo ageyo. Neꞌyaꞌmo ago afu leꞌniyanageꞌa alisaya afinaꞌmo afole aiꞌniye. 36 Hoyafatiꞌmo neꞌyaꞌmo neꞌaliya vayaꞌmogimo miyaꞌapimo alige maige maige huꞌa maisayafeꞌmo neꞌyaꞌmo alige huꞌa neꞌaliye. Neꞌyaꞌmo neꞌaliyaꞌmofeꞌmo avina yaꞌmo nehakalaya vayaꞌe neꞌyaꞌmo neꞌaliya vayaꞌeꞌmo magokepi apamogaga aigae. 37 Vayaꞌmogi, mago vekamoꞌa avina yaꞌmo nehakalegeno alu vekamoꞌa neꞌyaꞌmo neꞌaliye, huꞌa nehae. 38 Ani gelefeꞌmo nagaemo aliꞌyaꞌmo oꞌaliꞌnaya hoyafatiꞌmo neꞌyaꞌmo alisayafeꞌmo aliꞌna lapateꞌnove. Alu vayaꞌmogi hoyafiꞌmo aliꞌyaꞌmo aliꞌnagetapa lapakaemo ani hoyafatiꞌmo neꞌyaꞌmo neꞌaliye, huno hapa paiꞌniye.
39 Ani a kanomoꞌa Samaliya taonifiꞌmo maiꞌnaya vayaꞌaifeꞌmo, agaemo muki akeyaꞌvilaga huꞌnova kavaꞌnieꞌmo nava gemo huno naha paiꞌniye, huno hapa paiꞌniyaꞌmofeꞌmo asole Samaliya vayaꞌmogi Yesufeꞌmo apakesa afiꞌa fatago huꞌnae. 40 Huꞌnayaꞌmofeꞌmo Samaliya vayaꞌmogimo agaetegamo uꞌa ha paiꞌapaeꞌmo, kahao ke honanagi eka lagaeꞌeꞌmo magokepi lokaeka maiyo, huꞌa ha paiꞌnageno Yesuꞌa uno apakaeꞌeꞌmo lole afinaꞌmo magokepi lokaeno maiꞌniye. 41 A kanomoꞌmo hapa paiꞌniya geletiꞌmo mago vayaꞌamo apakesa afiꞌa fatago huꞌnayaꞌmonanafa Yesuꞌa uno hapa paiꞌniya geletiꞌmo magoꞌe huꞌa asole vayaꞌmogi agaefeꞌmo apakesa afiꞌa fatago huꞌnae. 42 Apakaemo a kanoeꞌmo, kagaemo laha paiꞌnana geletikeꞌmo lagesa afita fatago osuꞌnonaꞌmonanafa agaiꞌa avayafatiꞌmo laha paiꞌniya gemo afitetaeꞌmo lagesa afita fatago nehune. Ma mopafi vayaꞌai apakufamo alino katino neꞌapateno hapau neꞌvaiya vekamae, huta lagesa afita fatago nehune, huꞌa ha paiꞌnae.
Yesuꞌa gamani vekamo mafaꞌneꞌamo alino hageno ateꞌniya gemae
43 Yesuꞌa ani koteꞌmo lole afinaꞌmo maiteno apataleno Galeliya kotegamo uꞌniye. 44 Agaemo, Gotitegati gemo alini eꞌa aeꞌa hakalo huꞌa hapa nepaiya vayaꞌaifeꞌmo koꞌapileꞌmo maiꞌnaya vayaꞌmogimo ala apakiꞌapimo noꞌapamiye, huno hapa paiꞌniyaꞌmofeꞌmo apataleno Galeliya kotegamo uꞌniye. 45 Galeliya kotega maiꞌnaya vayaꞌmo uꞌa Yulusalemu taonifiꞌmo hopa afinaꞌmo maiꞌneꞌapaeꞌmo ageꞌnageno Yesuꞌa hopa afinaꞌmo muki alu kava alu kavaꞌmo huꞌnigeꞌa ageꞌnae. Ageꞌnayaꞌmofeꞌmo koꞌaleꞌmo uno avaꞌyi huꞌnigeꞌapaeꞌmo aliꞌa falu fala huꞌa ateꞌnae. 46 Yesuꞌa Galeliya kotegamo uno avaꞌyi huteno ani Kena taonifiꞌmo mago afinaꞌmo anilafatetiꞌmo nofi alagafati aniꞌmo alino hamaleno ateꞌniya taonifiꞌmo halate uꞌniye. Mago gamani vekamo ani taonifi maiꞌnigeno mafaꞌneꞌamo Kapeneyamu taonifiꞌmo maiꞌniyana kaita hauꞌniye. 47 Yesuꞌa Yutiya kotegatiꞌmo ago ataleno Galeliya kotegamo maiꞌniye, huꞌa ha paiꞌnageno afitenoꞌaeꞌmo Yesufeꞌmo, mafaꞌneꞌnimo faligefeꞌmo nehigi uka alika hageka ategapiye, huno ha paiꞌnigenoꞌaeꞌmo 48 Yesuꞌa, lapakaemo muki vayaꞌmogitapamo noꞌagaya naune kavaꞌmo hisugetapa oꞌagesayana nagaefeꞌmo lapakesa afitapa fatago osugae, huno ha paiꞌnigeno 49 gamani vekamoꞌa, Ala nene, mafaꞌneꞌnimo ago faligefeꞌmo nehigi nagaeꞌeꞌmo magokepi egetaꞌao, huno ha paiꞌnigenoꞌaeꞌmo, 50 mafaꞌnekamo kaita ohauꞌnigeno afaꞌa maiꞌniyanagi uvo, huno ha paiꞌnigeno Yesu ha paiꞌniya geꞌaeꞌmo agesa afino fatago huteno ataleno uꞌniye. 51 Egaꞌamo katega neꞌvigeꞌapaeꞌmo aliꞌyaꞌamo neꞌaliya vayaꞌmo neꞌageno uno fotu huteꞌapaeꞌmo, mafaꞌnekamo afa maiꞌniye, huꞌa ha paiꞌnageno, 52 haiya kanaleꞌmo kaitaꞌamo hageꞌnigeno alagepa huno afaꞌa maiꞌniye, huno apafi geꞌnigeꞌapaeꞌmo, yegemo lamino faleꞌnigeno hani hugefeꞌmo huꞌnigenoꞌaeꞌmo amuko hauꞌniya yaꞌamo hano huꞌnigeno afaꞌa alagepa huno maiꞌniye, huꞌa ha paiꞌnae. 53 Afoꞌamoꞌmo, Yesuꞌa ani kanaleꞌmo, mafaꞌnekamo kaitaꞌmo hano huꞌnigeno afaꞌa maiꞌniye, huno ha paiꞌniya geeꞌmo agesa afiteno agaeꞌe muki afamo anagaꞌmogiꞌeꞌmo Yesufeꞌmo apakesa afiꞌa fatago huꞌnae. 54 Yesuꞌa Yutiya kotegatiꞌmo ataleno Galeliya kotegamo eꞌniya afinaꞌmo lole afinaꞌmo noꞌagaya agufa aune kavaꞌmo huꞌniye.