1 Ana ning a Pukakiar Sabat, e Iesu i kas sur ir hangan ting na rumai ana ning a ningnigo anuna Parisaiola, pa taraila la oroi sursuri sur ta utna ning ir toli. 2 Pa ning a barsan i sasam, i sursurung a palaona i kes tar salanigo ta e Iesu. 3 E Iesu i deken a tena asaerla ana Warkuraila pa a Parisaiola mange, “Mangmangasa, i tostos ana warkurai sur dir alangolango a taraila ana Pukakiar Sabat o bel?” 4 Ika bel la kelesi. E Iesu i tong pas a barsan ning, i alangolango pasi, pa i sune seni. 5 Pa e Iesu i deken la mang, “Esi na halimulo ning e natnalik o anuna ta bulumakau ir punga tar ting na tung a malum ana Pukakiar Sabat bel ir dat kas kapit pasi?” 6 Pa bel la keles sot pas anuna kabah.

7 Ning e Iesu i kes ana utna na hangan ne, i oroi a taraila ning la hanot, la aslang pas ot a keskes salanigo. Pa i atong ning a warwara larlar tetek la mange, 8 “Ning tik ir ben pas u uting na ngasa ana tona tintaulai, gong u kes ana ngasa salanigo, sakana ir ben pas tik ning i leklek hom. 9 Pa esaning i arbebe ana ngasa ir hanot pa ir atai u mang, ‘Ur kes pisir kusun a barsan ne.’ Pa ur han ana meme sur a keskes tumo lamur. 10 Ning di ben pas u, ur han pa ur kes ana keskes tumo lamur, sur esaning i arbebe ir hanot tetek u, pa ir atai u mang, ‘Halik, ur tur pa ur han ute lanigo.’ Pa dir aleklek pas u namatanla ning mulo kes taum ana utna na hangan. 11 Anasa esining i aleklek pas i ot, dir atarna pasi, pa esining i atarna pas i ot, dir aleklek pasi.”

12 Lamur e Iesu i atai a Parisaio ning i ben pasi sur a utna na hangan mange, “Ning u mang sur ur sang a utna na hangan, gong u ben pas na halalim, na tastasimla, na maimla, pa a leklekla ning la kes milau u. Anasa la ne lar ben pas u pa lar kelesi tetek u. 13 Ika, ning u sang a utna na hangan, ur ben ka a kapan a taraila, la ning a palaonla i mat, la ning la kaukawar ka, pa a kutla. 14 Ning ur toli larne ur angis. Anasa belal utna na hangan anlai sur lar kelesi tetek u, e God ir kelesi tetek u ana pukakiar ning a tena tostosla lar laun ulak.”

15 Ning a halinla ning la hangan taum o e Iesu i longor a warwarala ne, i atai i mang, “La ning lar hangan ana ngasa ting na matanitu ane God, la angis.” 16 Pa e Iesu i atai i mang, “Ning a barsan i sang a tnan ngasa, pa i nunung a galis a tarai sur lar hanot. 17 Ning a taem ana ngasa i hanot, i sune sen anuna tena titol tetek la ning di ka nunung nigon tar la ana warwara mange, ‘Mulor han ute, anasa a ututnala ka sang rop.’ 18 Ika la rop la warwara alalar la ka. A ningnigona i atongi ka tana mang, ‘Ia ka lou pas a puka kabalapiu. Ar han pa ar oroi. A nunung u sur dir noren iau kama.’ 19 Pa ning otleng i atongi mang, ‘Ia ka lou tar ning a bonot a karabau, ar han sur ar toho la. A nunung u sur dir noren iau kama.’ 20 Pa ning otleng i atongi mange, ‘Onone ia ka taulai, pa bel ar tolsot sur ar han.’

21 “Pa a tena titol i ulak pa i atai anuna leklek ana warwarala ning. A leklek ning i balakut, pa i atai anuna tena titol mang, ‘Ur han kapit uting na tatatnan ngas pa uting na nanatar a ngas ting na hanua, pa ur ben pas a kapan a taraila, la ning a palaonla i mat, a kutla, pa la ning la kaukawar ka.’ 22 Lamur a tena titol i atongi mang, ‘Leklek, ia ka tol tar a ututnala rop ning u sune iau sur ar toli, ika dingla na pukna kaning ot na rumai.’ 23 A leklek i atai a tena titol mang, ‘Ur han sur a tatatnan ngas pa a nanatar a ngas ting na bual, pa ur angongos pas a taraila sur lar kas, sur anuka rumai ir bukus. 24 A atai mulo, bel tik ta halinla, ning di nunung nigon tar la, ir hangan ana nuka ngasa.’ ”

25 A tnan kunum a tarai la armuri taum o e Iesu. I talingir tetek la pa i atai la mang, 26 “Ning tik i mang sur ir mur iau, ika i katnan e tamana, pa e tana, anuna hane pa na natnatna, na tastasna pa anuna lalaun otleng, pa bel i katnan kol iau, ai bel anuka kaklik a asaer. 27 Esining bel i pamar pas anuna rakai kutus pa i mur iau, bel i sot sur ir hanot anuka kaklik a asaer.

28 “Ning tik ta halimulo i mang sur ir tol ta tnan rumai, ir kes kaba pa ir tol otnan nigon a matana rumai rop, sur ir tasmani mang ir tolsot pasi o bel. 29 Sakana ir tol tar ka a kama rumai, pa bel ir arop lar pasi. Pa a taraila rop ning la oroi, lar morot onoi 30 mang, ‘A barsan ne i tol tar ka a kama rumai, ika bel i tolsot sur ir aropi.’

31 “Ning ta king, ning a bonot a rip a tarai a harum ir han ana harum sur ning a king otleng naur a bonot a rip a tarai harum anunai, i wakak sur a king ning anuna ning a bonot a rip ir kes pa ir nuknuk nigo larne, la to pas naur a bonot a rip o bel. 32 Ning bel ir tolsot, ir sune anuna tena titolla, sur lar atostos warwara taum ana king, ning kaning ot bakbak, sur a bal molmol ir kes. 33 Mang otleng larning, ning tik ta halimulo bel i noren sen tar anuna ututnala rop, ai bel anuka kaklik a asaer.

34 “A sol i wakak, ika ning ka rop a makmakana, dir amakmakan ulak mangmangasa pasi? 35 Bel i to pas ta titol ting na barim pa bel i awakak otleng a kabalapiu, dir minggeni kama. Esining a talngana kaning, i wakak ning ir longor ono.”