7
A tarai la anatarna sen a warwara ane God
(Matiu 15:1-9)
1 A Parisaiola pa tena asaerla tagun a warkurai misaot e Jerusalem, la han taum tetek e Iesu, 2 7:2 Luk 11:38pa la oroi dingla na kakak a asaer ane Iesu, la hangan ka ana dur a kunla, bel la gos nigon pas a kunla. 3 A Parisaiola pa tarai Juda rop bel lar hangan ning bel la gos kunla, anasa la sira mur a asaerla ana nunla a tarai tagun nating. 4 7:4 Matiu 23:25Ning la ulak miting na pukna na sisiurai, lar gos nigon pas ot a kunla, lamur lar hangan. A galis a asaerla otleng la sira muri, la sira gos a kapla, a kurola pa ketella. 5 A Parisaiola pa tena asaerla tagun a warkurai la deken e Iesu mang, “Sur asaning anum a kakak a asaerla bel la sira mur a asaerla ana nundala na tarai tagun nating? La hangan ka ana dur a kunla.” 6 Pa e Iesu i keles la mange, “A warwara ane Aisaia i momol ot, ning i warwara na propet nigo tar omulo a tena asasongola mang,
‘A tarai ne la hanrawai iau ka ana pahanla,
ika a balanla i bakbak kol kusun iau.
7 La lotu oros ka tetek iau,
anasa la asaer a taraila ana warkuraila ka anuna taraila.’
8 Mulo ka han kusun tar a Warkuraila ane God, pa mulo mur kama asaer anuna taraila.”
9 Pa e Iesu i atai la mange, “A momolna ot, mulo longor orsan a warkurai ane God, sur mulor mur a asaerla ana numulo a tarai tagun nating. 10 7:10 Lo 5:16E Moses i atongi mange, ‘Ur hanrawai e tamam pa e tnam.’ Kisim Bek 20:12
Pa i atongi otleng mang, ‘Esining ir warwara laulau oe tamana pa e tana dir umkoli.’ Kisim Bek 21:17
11 Ika mulo, mulo asaer a taraila mang, i wakak ka ning tik ir atai e tamana pa e tana mang, ‘Asaning ar nangan mu ono, ia ka saran tari tetek e God.’ 12 Ana asaer ning, mulo sairasi sur gong i nangan e tamana pa e tana. 13 Ning mulo toli larning, mulo anatarna pas a warwara ane God, pa mulo mur ot a asaerla ning mulo kibasi tan anumulo na tarai tagun nating. Pa galis a ututna otleng larne ning bel i tostos mulo sira toli.”
A ututna ning ir adur tik na matana e God
(Matiu 15:10-20)
14 E Iesu i kabah ulak a kunum a tarai teteki, pa i atongi mang, “Mulo rop mulor longor iau, pa mulor talapor ana nuk a warwara. 15-16 7:15-16 Aposel 10:14-15Asaning tik ir ien pasi pa i kas ting na balana, bel ir aduri na matana e God. Ika asaning i purum kusun a nuknukna, i ning ir aduri na matana e God”.*7:15-16 Dingla na tena tastasmai ana Buk Tabu la nuki mang dingla na warwara otleng i kes te na ves ne, i manglarne: “Esining a talngana kaning, i wakak sur ir longor ono.”
17 Ning e Iesu i han kusun a kunum a taraila, pa i kas uting ui na rumai, anuna kakak a asaer la dekeni ana warwara larlar ne. 18 Pa i atai la mange, “I mangasa mulo otleng bel mulo talapor? I mangasa bel mulo tasmani mang a ututnala rop ning i kas ting na balan tik, bel ir aduri na matana e God? 19 Anasa bel i kas uting na nuknukna, i kas ka uting na balana pa ir kepseni.”
Ning i atong a warwara ne, i atong talapori mang a utna na hangan rop i wakak. 20 I atongi otleng mange, “A utna ning i purum pas miting na nuknukin tik, i ning ir aduri. 21 Ine a ututnala ning i sira purum miting na nuknuk a taraila: a nuknuk laulau, na toltol a pamuk, a kinkinau, umkol a mainla, a toltol laulau ana ta hane anuna tik o ta barsan anuna tik, 22 a toltol a muk, a laulau a ginina, a asasongo, a nuknuk sur a toltol ning a tarai lar meme ono, a ram, a arle, a toltol na dat abarah a pukulundi, pa longlong a toltol. 23 A ututna laulaula rop ne la purum miting na nuknuk a taraila, pa ir adur la na matana e God.”
A tortorot ana hane ning bel a hane Juda
(Matiu 15:21-28)
24 E Iesu i han mitingia, pa i hanot milau a hanua Tair. I kas uting na ning a rumai. Bel i mang sur tik ir tasmani, ika bel i tolsot sur ir mumun. 25 Ning a hane, a natna hane a mot kaning ono. Ning i longor a warwara oe Iesu, aiap ka i han pa i punga tuntudu salanigo ta e Iesu. 26 A hane ning, a hane Ponisia miting na papar Siria, bel a hane Juda. I nunung e Iesu sur ir kepsen a mot kusun e natnalik.
27 Pa e Iesu i atai i mang, “Dir tabar masur nigon a kakakla. Bel i tostos sur dir los pas a utna na hangan ana kakakla pa dir migeni tana papla.” 28 Pa hane i kelesi mang, “Leklek, a momolna ot ning. Ika a papla otleng ting nahai a logo, la sira ien a mumut a utna na hangan ana kakakla.”†7:28 A kakakla i warwara larlar ana tarai Juda. Pa papla i warwara larlar ana taraila ning bel a tarai Juda. A utna na hangan i warwara larlar ana saning e Iesu i toli tetek a tarai Juda. 29 Pa e Iesu i atai i mange, “Ana num a wakak a arkeles, ur han ka, a mot ka purum tar kusun e natumlik.” 30 Ning a hane i ulak, i oroi e natnalik, kaning i borbor tar ting na logo ngasna. A mot ka purum kusuni.
E Iesu i alangolango pas ning a barsan a talngana i kutkut pa i ngatlau
31 E Iesu i han kusun a hanua Tair pa i han potor e Saidon sur a puka tasi Galili, pa i hanot ting na papar Dekapolis.‡7:31 Dekapolis a kamkamna mang ning a bonot a tatatnan hanua. 32 A tarai la ben pas ning a barsan a talngana kutkut tetek e Iesu, pa la nunungi sur ir suah a kuna ono. 33 E Iesu i ben masik pasi kusun a kunum a tarai, pa i suah naur a pitlai kuna ting na naur a talngana barsan ning. Lamur i namis pas, pa i tong a laigerem a barsan ning. 34 I tadai usaot na langit, i los wuwu pas, pa i atai i mang, “Epata!” A kamkamna mange: “Ur Sapang!” 35 Pa talngana i talapor, a laigeremna i tapalas pa i warwara talapor kakat.
36 7:36 Mak 1:43-45Pa e Iesu i sairas rakrakai a taraila sur gong la atai tar tik ono. Ika ning i sairas la, bel la longor pasi, a warwara ono i han sarara ka. 37 7:37 Aisaia 35:5La ning la longor a utna ne, la kulkulan kol ono, pa la atongi larne, “E Iesu i tol wakak pas a ututnala rop. I awakak pas a talngana kutkutla sur lar longor, pa ngatlaula sur lar warwara!”
7:4: 7:4 Matiu 23:25
7:10: 7:10 Lo 5:16
7:15-16: 7:15-16 Aposel 10:14-15
*7:15-16: 7:15-16 Dingla na tena tastasmai ana Buk Tabu la nuki mang dingla na warwara otleng i kes te na ves ne, i manglarne: “Esining a talngana kaning, i wakak sur ir longor ono.”
†7:28: 7:28 A kakakla i warwara larlar ana tarai Juda. Pa papla i warwara larlar ana taraila ning bel a tarai Juda. A utna na hangan i warwara larlar ana saning e Iesu i toli tetek a tarai Juda.
‡7:31: 7:31 Dekapolis a kamkamna mang ning a bonot a tatatnan hanua.
7:36: 7:36 Mak 1:43-45
7:37: 7:37 Aisaia 35:5