18
A Bina Lava, Babilon i Taa Kawaasanan: Ri Ferawai Paap O A Bina Ve Malaan Sena Tefin Saat
1 E lumui ne kaalum e xasa angelo a sivimaan ti la xunavata. Nane toxan a vepen lava e lang faagut e a maana mu bina ri femalaan sena paanaas pana malang ina roxoyan sina. 2 E pana ling molava nane xukulai malaan:
“Fo kawaasanan!
Fo kawaasanan!
Na Babilon aava lava fo kawaasanan!
Pave a mu masalai taa taagul e maana buk vovau saat taa waan.
E maana maanu lalosaat sait, ri tafe nai lana.
3 A bina aapave a malaan sena saxa tefin saat e
a maana mu bina xapiak ri bilai fasaat pana
e ri usi a milungan sina e ri ngong pana tamai feruuxan sina.
A mu piran king ti la xavala vaxa, ri fesaxaamane.
E a maana rabuna ina faasot ri fo siak a faat xaves pana maana mo mosaat nane vubuk maraane.”
A Kelan Ina Galasaan Na Babilon
4 E mui ne langai a saxa ling fulaa ti la xunavata a kuus,
“Mi rabuna siak, savatmaan ti lana.
Savatmaan talo nami, mi taa pife milung sena vilaana saat sina
e mi taa pife siak a giisan ina fakasanaman sina.
5 Senaso a mu vilaana saat sina ri malaan sena tang put ina xawa
aava modusan sina fe laak xe laaꞌui la xunavata.
E a Piran i taa pife lamon fepalauan a vilaana saat aave fulaa.
6 A tefin aave fo vil a maana mo mosaat e ne vubuk
o a maana mo mosaat nane fo vile saxa saxa, a ulaian ina i taa taragua xe sina.
Nane fo faisoxan a neng lana lisa e
ne vubuk o a Piran taa tavai faꞌulie pana lisa ina neng taragua.
7 Nane sang fo tavai nane xa pana maana mo roxo paaliu e pana isin lava.
Rao nano, Piran, no taa tavaie pana mamaxusan e fakasanaman a fexaxaas sena.
Lana lalamonan sina, nane fuuna nanomai malaan,
‘Nenia ve, ne matalava tefin, a ‘kwiin’.
Ne taa pife waan nakmaal. Ne pi tataangiis.’
8 E voxo lana yaan saxa mon a mu fakasanaman malaan:
a maatan, taangiisan e a song, ri taa xasliue.
Nane i taa faram xapinan pana fata senaso a Piran aava tiise, a toxan a gutan molava.”
A Mamaxusan Sina Mu Rabuna Layaan Ri Xalum A Fakasanaman Aanabeꞌ
9 “Layaan a mu piran king ti la xavala, nari aava ri fesaxaamane e nari aava ri lamon soxot a maana mo sina, layaan ri ti xalum a bun ina fakasanaman sina, ri taangiis e ri muluxe. 10 Layaan ri xalum a fakasanaman sina, ri mataut paaliu e ri tigina lasuun sena e ri xukulai,
‘Muluxe! Muluxe! Lumua no bina lava na Babilon e no toxan a gutan. Taasaxa naboxo lana lou modak a kawaasanaan nano fo savat mo nabeꞌ mon!’
11 “A mu rabuna ina faasot pana mo xuluna xavala ri taa taangiis e ri muluxe vaxa, senaso naboxo piau ta mataa xena maraan a maana mo siri 12 malaan sena ‘gol’ e ‘silva’ e faat roxo pana mamareiai molava e mu xixiut ‘purl’. E piau ta mataa xena maraan a maana buk marapi siri: a ‘linen’ roxo, a ‘silk’ o mu marapi vuung e raf. E piau ta mataa xena maraan a mo roxo ina wai ina muli o maana mo ri vesane pana ‘aivori’ e ‘braas’, o mo ina ‘aian’ o mo ina faat ‘maabal’ o maana mo ina xasa wai roxo. 13 E piau ta mataa xena maraan a maana buk fanganan siri, a fanganan malaan sena ‘sinaman’ e xasano mo xakaarik malaan e vaxa wain e wel ina olif e flaua e ‘wiit’ e bulmakau e sipsip. E piau ta mataa xena maraan a vulut aava las faroxo malaan sena ‘mur’, ‘insens’ e ‘frenkinsens’. E piau ta mataa xena maraan a mo pana mamareiai molava malaan sena mu ‘hos’ e ‘kaaris’ e mu rabuna yaasok aava xasanofuna ri vubuk maraan nari.
14 “E voxo a mu rabuna ina faasot ri taa ferawai paap malaan, ‘Nano, no malaan sena saxa wai lava aava boak e fuaa, taasaxa piau ta xalana. A maana mo roxo pana mamareiai molava siim e a isin lava siim ri fo malit xasema e ri taa pife ulaa fulaa.’ 15 A mu rabuna ina faasot aava ri fo faasot pana maana mo xapiak xe sina e ri fo faxuvul a maana faat siri sena, ri taa tigina lasuun paaliu e ri taa mataut xasingit sena maasaxan sina. E ri taa taangiis e ri taa muluxe 16 e xukulai malaan:
‘Muluxe! Muluxe! Lumua no bina lava e no pis nano xa pana marapi roxo ina ‘linen’ e marapi raf. E a mausan siim a rarapak pana mo ina ‘gol’ e xixiut ‘purl’ e maana faat roxo pana mamareiai molava! 17 Taasaxa naboxo, lana lou modak, a maana mo no maraane pana mamareiai molava ri fo kawaasanan e ri fo malit!’
“A maana paamua ina xaati vaxa e nari xapiak aava ri falet xolai xuluna mu xaati, a mu rabuna ina faisok xuluri e nari aava ri faxuvul a faat siri pave vaxa, ri taa tigina lasuun. 18 E layaan ri xalum a bun ina fakasanamaan na Babilon, ri taa kuus malaan:
‘Piau ta bina lava fulaa malaan sena fe waan, bo?’
19 “Ri taa tapin a pof xe laaꞌui xuluna puturi e muluxe e ri taa taangiis. Ri taa xukulai:
‘Muluxe! Muluxe! Lumua no bina lava e a maana paamua ina xaati, ri siak a faat xaves pana faisok siim. Taasaxa, lana lou modak, nano, no fo tagalas.’
20 E a ling ti la xunavata a kuus fulaa,
“Faamamaas sena, nami lana xunavata! Nami mu rabuna mi namkai, nami mu yaamut e nami mu fefeng sina Piran, mi faamamaas. Senaso a Piran a lamon faꞌuli a maana vilaana saat aava tefin aanabeꞌ fo vile xe simi e nane fo tiise.”
21 E mui a saxa angelo tateak a yaas a faat molava. A faat aave a fexaxaas sena ‘wil’ ina ‘kaar’. E nane tapine xe lana laman e a fatutul na Babilon malaan:
“A bina lava, na Babilon, i taa tu tapinan malaan e piau ta mataa taa tingin fulane. 22 E voxo a felingaian ina tungaal e tafiu e a mo aava ri xalie pana ‘haap’ e a yanganan vaxa, ri taa malit sena e piau ta mataa taa langai fulan nari. A rabuna ina vavesai ri taa pife faisok fulaa pave. E a felingaian ina faigotanaana fanganan i taa pife savat lana bina aave fulaa. 23 E a malang ina laam taa pife lang fulaa lana e a ling ina mataa faꞌui e tefin faꞌui aava re xaveak tamai i taa malit paaliu lana bina aave. Lumua a mu rabuna ina faasot ti la bina aave ri mu matalava ina xavala xapiak e ri familung a mu rabuna ti la maana mu bina xapiak pana lotu bit ti la bina siri. 24 A rabuna ti la bina aave ri fatalatiu a ria ina mu rabuna ina kuus fatuxai e a mu rabuna fatak. E ri fufuna maatan sina mu rabuna aava ri fo punuxan xuluna xavala.”