1 Na idah jo anya katiye ta luk nane aha anya katukum kili tiri lau mwan ma badih ta Kindrei iri ado Jerusalem. Jo ndraleheyani san ta amekes gok nane doh ndrala tiri lau ta Kindrei badu loboho Galesiya, ma aha ale ka-en hamon le ta kandriyen nane iri amekes. 2 Na len bwena ta wik marakon, aha ari, ari, kabudon ta iri luk nane aha akohok na bolo len mene ndra-au on! Ya, aha kapwai luk, ano aha katehei rayah kamwenen kudu ndra bolo asiu taha kabe-en madasan ta amekes gok ta Laban. Ma luk kameh winiya a sola sese. Eme ma, buku len jo ewek badeh, aha winiya babo gok ta asilah luk ta adeu ili tiri ja, bwai. 3 Len jo asahan badeh, jo aso-ok aha amwenen katehei rayah lau ta atiye luk taha nane ta ili Jerusalem. Jo kameh atehei la-ukei ramen ili mine oro, ma tiye oro ta ala. La-ukei tek doh kameh asehek ta oro lau heh handru, ma oro amekes saba lakou handru. 4 I buku jo abudon ta ili ale, mwasin, oro marakon kame hawek op, ano aso barala.

5 Jo ta ewek hawe aha, arile jo kameh ili anyolom iri lau ado loboho Masadoniya mwena, ano badeh, jo barasahan hawe aha. 6 Sebwe, jo kameh udu hawe aha luluwen sese. Jo bala tanan bwai, sebwe jo kameh udu hawe aha winiya le len ta nyala, ma jor amondrei. Ano, jo anya kili kon rakon ja badeh, jo aso-ok aha kaseben jo ta ili. 7 Aha ndratanan, udu bolo tekedek tek badeh, jo bwalek ewek manyah hawe aha ta ben ari le. Buku Laban aso-ok handru, jo aso-ok labai ta udu hawe aha luluwen sese. 8 Arile, jo anya kudu ndra kon tinan Epesus op, winiya le len tinan ta Pentikos ano. 9 Tasah, Kindrei ndrasihi san, ma iy atehei gok laba tinan eme tek ta aseben lau solo-an kasahan lau tan. Jo anya kamekes gok dah kili ma kabadok, arile handru, lau solo-an ndra-in ale ado aliy ta anya katuruk gok tek sala.

10 Buku Timoti kasahan hawe aha, jo aso-ok aha kaseben iy, ta ndrinen kudu mwasin ta ndrokowa aha, ma iy sanoh. Tasah, iy amekes lahou ta Laban, i buku le jo amekes. 11 Kora-on iri rayah taha kanyolom iy i buku ari ndramak laleyah, ma iri katehei kona iri ki tan. Aha kabwidi ndrinen kudu mwasin, ma aha kaseben iy ta san. Eme ma, iy kameh winiyan eme hamon eme hawek ja. Jo hawe iri lau rayah ta Kindrei atondrok iy ado kada-ah.

12 Ya sahou ta nadu tine taha Apolos, i buku doh: San solo-an labai jo asehek sahou boto-on ili tan, ta iy kili hawe iri rayah lau ta Kindrei, iri kawek kanyolom aha. Arile, iy bwalen ewek na dah. Udu ja, buku iy anyolom len mwasin ta ewek, idah kameh iy barawek ai.

13 Aha katehei ndrokei kamwenen ta Krais kameh eme hamon ja. Ma aha kales boto-on ta budon taha ari le. Aha kabadok kado le, ma aha sanoh. 14 Ta iri lakou marakon aha amekes, aha badeh, ka-en hamon le ta kandriyen ta aso-ok handru iri lau rayah ja.

15 Aha nadu tine i san ta Krais, aha tanan, Stepanas oro badeh, ndrasahan iri lau ta Kindrei ma bwena handru, ta iri lau rayah ja ado bolo kon tinan Akaya. Na so-ok toro le, oro amekes gok ta aseben iri lau ta Kindrei. 16 Jo asehek sahou boto-on ewek taha, ta aha kanuhun ma aha ka-en hamon ta iri lau nane doh, ma ta iri lau amekes gok boto-on ta aseben iri nane amekes gok dah.

17 Stepanas uru Potunatus hawe Akaikus oro ma taloh mene ame hawek. Eme bwidi jo sekesek labai ta anyolom oro, tasah aha marakon winiyan bame dah banyolom jo bwe. Oro ma taloh nane doh akohok ndrahune aha ta amekes gok doh ta aseben jo. 18 Jo badeh abwerei sese, arile oro lau ma taloh doh ame badeh, bwidi ndrinek ma hawe ndrine aha sekesek ale. Eme ma aha badeh, kasekesek iri lau buku doh.

19 Iri lau mwan ma badih ta Kindrei badu bolo kon tinan Esiya tiye sekesek tiri ewek taha. Akwila uru Prisila hawe iri lau mwan ma badih ta Kindrei badeh, atukum ala le asiu turu, eme iri tiye sekesek tiri tinan ewek taha in ta nyara Laban. 20 Iri nadu tine taha rayah are kada-ah tiye sekesek tiri tinan ewek taha ale. Ta kandriyen tataha lau mwan ma badih ta Kindrei, aha marakon kateu mine nadu tine aha ari, ari, iri are ndrokowa aha amwenen.

21 Ta sendrehendreh ta la-ukei tek dah, jo Pol, jo atorou sahou sekesek tek ewek taha na minek le amwenen. 22 Buku ari ndramak mwan, o, badih iy baso-ok Laban bwe, jo aso-ok iy kakohok maha-an ma sisi-in ndra-in kudu le buku doh. Maranata!*Maranata boho kon tiri Aramek. Moson ta aliy badeh, Laban ou ame! 23 Tikisiy ta Laban Jisas kudu hawe aha. 24 So-ok tek tinan labai ewek taha mara-ei aha are ahis hawe Krais Jisas. Handru.