5
Lahou tiri lau ta Kindrei
1 Ou sabolosen sala tiri lau ndra alon, ndri-iy. Arile, ou atamas iri badeh, ki buku tamam amwenen. Ou atamas iri lau loweu badeh, ki buku none nadu tinem oro handru, 2 ya iri badih en badeh, ki buku tinem, ma hawe iri badih bihin ki buku none nadu tinem oro badih na kandriyen mwasin le.
Kandriyen ta aseben iri badih nyau
3 Ou amekes kandriyen mwasin kili tiri badih nyau handru. 4 Arile, i buku none oro are badih nyau, nadu oro ma hawe nadu tubu oro udu aliy, badeh, oro ka-en hamon ta san ta Kindrei, ya katondrok oro badih nyau. Tasah, oro ma bwisik mene, oro awoyah ta anyo-ou oro; kandriyen doh badeh, mwasin ma amwenen ta mada Kindrei. 5 Are badih nyau ndramak ta atondrok iy bwe badeh, iy katehei budon ma boto-on tan na len mari kili le ta Kindrei ta seben. 6 Arile, are badih nyau iy amekes kandriyen ndra-in in hamon ta so-ok ta badan le, malawin mwasin tan badeh, ndramak mara-ei. 7 Katiye sahou batanau doh ki toro, ya lau sasehek oro, ndri-iy. 8 Arile, i buku none oro are batondrok lowan oro bwe, ma oro batondrok nadun ma udun oro bwe, badeh kameh iy sakalawi budon handru, ma iy badeh, ndra-in labai ja, ma kandriyen ndra-in tan badeh kameh sakalawi iri lau ala budon tiri ba-en hamon ta Kindrei ja ai.
9 Ado satorou nyara iri badih
nyau ala jaha tiri udu baha ndro hanoh (60) badeh, sala hawe nyara iri badih nyau ala jaha tiri udu bada ndro hanoh (60) i loke.*Taha tana taha bwe, i buku sah handru, iri atorou nyara iri badih nyau doh. Iri lau ta tanan abudon, iri badih nyau ala jaha tiri udu bada ndro hanoh (60) i loke badeh, tandrakan ta amekes le lahou ta Kindrei, ma winiyan bala tasou ja bwe. Ya, iri lau ta Kindrei amwenen aseken ta anyo-ou iri na lakou buku nyamon, eme ma, iri atorou nyara iri badih doh. Tasah, iri badih nyau jaha tiri udu bada ndro hanoh (60) i loke badeh, badu hawe iri lau ta Kindrei labai, ya iri lau ta Kindrei atondrok iri labai. Ya iri badih nyau doh mene are ta mwan ari le. 10 Ma iri badeh, nyara iri bandra-i bwe, hawe iri badeh, mene ta leheya nadu iri ta kandriyen mwasin. Ya eme mesekei iri lau badu leheleh badeh, adah asiu. Ma iri badeh, mene badih ta leheya kandriyen mwasin, i buku none lohowan sikine kati iri lau ta Kindrei. Ya ma iri ale badeh, aseben iri lau ado ta maha-an, ma iri atehei ndrine iri badeh, i ta kandriyen mwasin.
11 Arile, iri badih nyau bihin badeh, sala bolo iri badih nyau bwena. Tasah, buku none budon tiri aseken ta anya ki tasou, iri kameh mani lahou ta Krais; 12 ma iri kameh are ta mada sahou, tasah iri mene mani tandrakan tiri hawe Krais. 13 Ma idah kameh, iri lolo-an a asiu ra-em ano asiu ra-em; ma laba tinan ta aliy handru badeh, iri kameh none kandriyen ta asehek lau ma sokolowa bolo lahou ta lau. Ma hawe iri asehek sahou laleyah. 14 Eme, jo abudon ta badih nyau bihin badeh, katasou ja kamekes nah ma katondrok oro. Kora-on iri lau ale budon tiri ndra-in udu ta to, sasehek to. 15 Tasah, iri badih nyau rayah badeh, ndra mine tama balik Satan ma ndra-en hamon tan.
16 Arile, ki buku none ari badih ta Kindrei ya ari badih nyau kudu hawen badeh, iy badeh, katondrok iy. Iy satehei maha doh sala la-u lau ta Kindrei. Eme ya iri lau ta Kindrei ja, bale iri ki tiri badih nyau rayah ja, ala iri lau ta atondrok iri bwe, ya iri katondrok iri.
Taha kaseben iri lau ta mwena ta lau ta Kindrei
17 Iri lau ta bwena ta lau ta Kindrei amekes lahou mwasin, kameh akohok sihine iri solo-an labai. Arile, i toro ala atiye sahou ma leheya sahou, kameh oro akohok ere bwele-en ja. 18 Tasah, sahou ta Kindrei tiye i buku doh,
“Ou badeh, saseu boho oks buku none iy kamekes lahou tam ta katisih buwa wit,” Dutoronomi 25:4
ma hawe,
“Ndramak ta lahou badeh, kakohok sihinen.” Lebitikus 19:13
19 Ya, i buku none ou anuhun sahou laleyah, iri kasehek tam, ta sahou ndra-in i bada iri lau ta bwena ta lau ta Kindrei badeh, ndranyem ki-iu ai. Ki buku none uru la-uh deh, oro taloh kasehek badeh, ou baranuhun ai. 20 I buku none oro are lau ta bwena ta lau ta Kindrei kamekes karei ma lomondra ndra-in badeh, ou asehek keme ndranye lau mari kanuhun. Eme ya iri lau mari kanuhun ma iri kanoh ta aliy, ya iri sa-en hamon ta aliy.
Timoti katondrok kandriyen tan kamwenen
21 Udu mada Kindrei ma hawe udu mada Jises hawe iri angelo ndrabun badeh, jo tiye sahou boto-on dah i tam, ta ou badeh, a-en hamon ta sahou batanau dah. Ma ou abudon kamwenen, ou sala mwasin ta ndramak mwasin tam le, ndri-iy. Ou badeh, a mwasin ta ndramak ndra-in ale, i buku le ndramak mwasin tam. I buku none ou manyah anuhun sahou turu, ou areu le alih turu, ta aseben uru ari ari. Ma budon doh badeh, kudu bolo lahou tam mari ou amekes.
22 Ou badeh, sabotatahan ta adeu boto-on sala la-u are lau anya kateu lahou ta Laban ndri-iy. Ma ou sala bolo iri samekes lomondra ndra-in ma karei iri lau amekes. Ou atondrok ou amwenen.
23 Ou badeh, mene abo sik san solo-an, eme ya ou sa-un gwa laleyah, ou badeh, a-un sese waen ki hawen ta amekes ndrinem kudu mwasin.
24 Lomondra ndra-in ma karei ta lau mwan rayah badeh, bamai bwe; idah kameh ilih ilih bwena isos bada len ta sahou. Arile, lomondra ndra-in ma karei ta lau rayah kameh, udu hamon kameh barasahan barame lewan. 25 Idah kameh, i le buku none kandriyen mwasin kameh winiyan bamai bwe; ma hawe kandriyen aton kameh winiyan bamai bwe.
*5:9: Taha tana taha bwe, i buku sah handru, iri atorou nyara iri badih nyau doh. Iri lau ta tanan abudon, iri badih nyau ala jaha tiri udu bada ndro hanoh (60) i loke badeh, tandrakan ta amekes le lahou ta Kindrei, ma winiyan bala tasou ja bwe. Ya, iri lau ta Kindrei amwenen aseken ta anyo-ou iri na lakou buku nyamon, eme ma, iri atorou nyara iri badih doh.