1 Eme ma, jo ndraruwi ndrinek. Jo abudon i buku doh: Jo winiyan bala Korin ja, ma amekes maha-an ili tiri ja bwe. 2 Tasah, buku jo bwidi aha tikisiy, ya are lau kameh winiyan bwidi ndrinek kasekesek ja? Bwe nadeh! Aha le lau badeh adeh, amekes ndrinek sekesek. 3 Ehe, aha le badeh, amekes jo sekesek. Eme ma, jo bwalek ewek hawe aha ja, ma amekes sahou boto-on, ma ndrine aha amaha labai, bwe. Eme ma, idoh kati lakou jo atorou ewek taha ma mwena. Jo bwalek ewek edeu maha-an ari ja ewek taha ta kandriyen udu ndrokowa aha. Buku ndrinek sekesek ta koha aha, jo tanan aha ale ado mwasin ma sekesek asahan. 4 Handru, mwena mene jo torowenei la-ukei ramen ewek taha, ma na len doh ndrinek maha-an ma isi, ma jo eden ale. Arile, jo batorou la-ukei doh ta edeu maha-an laleyah ewek taha bwe. Jo anya kaleheya aha buku jo aso-ok aha handru ma jo ibo gok ta aseben aha karuwani kandriyen ndra-in udu ndrokowa aha ki-iu.

5 Na dah, i buku ari ndramak mene ndrabwidi maha-an ndrala tare lau, idoh badeh bame tek bwe, arile idoh ewek taha marakon. (Jo asehek dah, tasah jo amwenen bwalek edeu maha-an ili bwele-e ndramak doh). 6 Aha ranah ma buruwen badeh, ndratikahei iy ndramak mene udu ndrokowa aha ndra-au, idoh ta leheya iy ndrabwidi lakou ndra-in labai. Eme ma idoh winiyan. 7 Na dah, jo aso-ok aha kamani kandriyen tan nane iy amekes ewek taha, ma aha kamekes ndrinen kasekesek. Kora-on maha-an laba tinan kabwidi ndramak doh kandra-i. 8 Eme ma jo asehek taha. Aha kandrei iy keme hamon hawe aha, ma aha kaleheya aha kili tan buku aha badeh aso-ok iy labai. 9 Jo mene atorou la-ukei ewek taha ta none aha le. Jo anya ki tanan aha kameh winiyan a-en hamon tiri sahou tek marakon mene o bwe. 10 Buku aha mani kandriyen ndra-in ta ndramak nane amekes ewek taha, jo ale kameh maniy. Saba lakou jo maniy (buku lakou udu aliy doh jo kamaniy), i buku Krais anyolom jo, jo ale maniy na nyaran ta aseben aha. 11 Tasah, jo abudon i buku doh: Kora-on balik kawendreyani taha ta amekes kandriyen ndra-in kili ta nadu tine taha nane doh, ma iy kameh kamai laleyah ma kandra-i. Taha ndratanan labai ta budon ta balik.

12 Jo ili asahan kon tinan Trowas ta atiye sahou mwasin ta Krais badeh, Laban ndrasihi san tek ta amekes gok dah. 13 Arile, jo tikisiy tinan labai, tasah jo banyolom nadu tine taha Taitus bwe. Eme ma jo batanau iri mwan ma badih ano, jo iu ili kon munyak tinan Masadoniya.

14 Arile, jo baradeu wurah barala ta Kindrei adeh. Tasah, len marakon iy badeh, atehei ahi ala kon rakon, rakon ta atiye lahou tinan, Krais ndrabwidiy ta akohok ahi ame hamon ma amekes ahi asahan lau tan handru. Ehe, buku manahu buburen asahan, ma jor aluhiy iu ili bolo kon marakon, i buku le tekedek tahi aseben iri mwan ma badih marakon akohok tanan ta Kindrei. 15 Handru labai, ahi aposel amwenen badeh, a buku kasu-er ta manahu buburen mwasin, Krais eme andrei, ma iy atehei i ta Kindrei i nyara salom. Manahun doh iu ili ndrokowa iri mwan ma badih iri atehei budon tiri handru in ta Krais, ma iri are san ta iu ili kandrah, ma ta ndrokowa iri mwan ma badih iri batehei budon tiri bwe, ma iri are san ta ili bolo jih nyarahan labai. 16 Ta iri lau are san ta ili bolo jih, ta gok ahi amekes ma ta sahou ahi atiye badeh, asahan i buku manahu lakou kameh imek. Arile sahou ma gok ahi amekes ere ndrokowa iri mwan ma badih are san ta ili kandrah, asahan i buku manahu lakou kohan udu aliy kahis. Are lau handru winiyan amekes iri gok doh? 17 Ahi aposel badeh, bala buku iri lau solo-an ala rakon, rakon ta atiye sahou ta Kindrei bwe. Iri amekes i buku doh ta ariu luk tiri mwan ma badih rayah, ma iri winiyan ado mwasin. Ahi aposel badeh, bwe. Ahi akohok gok dah badu mine Kindrei amwenen, ma ahi bawendreya laleyah bwe. Ndrine ahi badeh, udu mwasin hawe Krais, ma ta mada Kindrei ahi badeh, atiye amwenen iri sahou tan mene iy edeu eme tahi.