Pol atorou la-ukei tan ramen ja ili ta
TIMOTI
Sahou Tanan
Timoti badeh, amekes lahou hawe Pol, eme ma Pol atorou la-ukei ramen ja hamon dah ili ta Timoti ta leheya ta iri kandriyen mwasin iy kedek ki-in hamon ta aliy. Timoti badeh, sawoyah ma samani kandriyen ta atiye sahou mwasin ta Jises Krais. Iy kedek kamwenen ki-in hamon ta sahou marakon ta Kindrei. Buku iri lau adeu isi hawe maha-an ili tan, iy kabadok le ta amekes lahou mene, Kindrei atehei ndrala tan.
Timoti satehei ndranyen sala tiri sahou ari moson bwe tiri lau budon mwasin bwe. Iri sahou doh ta bolowa budon tiri lau ta anuhun. Timoti badeh, kabudon kamwenen ta iri kandriyen Pol amwenen edek in hamon ta aliy, idoh iri kandriyen boto-on ta budon ma ta ndrine taha udu mwasin, ma ta aso-ok iri rayah ja, ma bwese maha-an randrah randrah.
Iri Sahou Tinan
Sahou sekesek ma salom ta Timoti (1:1-2)
Bwili taha sama ta sahou mwasin (1:3-18)
Timoti kasahan ndramak ta bahun ta Jises Krais (2:1-26)
Len hamon kameh iri lau amekes kandriyen ndra-in (3:1-9)
Tekedek ta Timoti kamwenen (3:10–4:8)
Timoti keme suwi kanyolom Pol (4:9-22)
Timoti badeh, kibo gok boto-on ta asahan lohowan handru ta Kindrei
1
(Kalan 1–4)
1 Jo Pol, jo aposel ta Krais Jises. Tasah, Kindrei mene ndratiye, iy anya kedeu kohan handru keme tataha mwan ma badih na gok Jises Krais amekes. Eme ma, iy atehei jo asahan aposel tan ta atiye sahou mwasin doh.
2 Timoti, ou badeh, buku naduk handru, ta lakou ta Kindrei, eme ma, jo atorou la-ukei ramen ja dah ewek tam. Jo aso-ok tama taha Kindrei hawe Laban tataha Krais Jises, uru mala-uh katikisi ou ma katondrokei ou, ma kabwidi ou ado mwasin.
Bwili taha sama ta sahou mwasin
3 Bwena mene, tubu oro badeh, a-en hamon ta kandriyen ta Kindrei ma atudun nyaran. Eme ma, jo ale ki-in hamon tan ta ndrinek, jo atona kandriyen jo in hamon ta aliy doh ta amekes gok tan, idoh amwenen handru. Na len dah badeh, jo abudon ou, ma jo edeu wurah i ta Kindrei, tasah ou badeh, atehei budon tam handru in tan, ma ou a-en hamon ta kandriyen tan. 4 Jo asolom ili ta Kindrei badeh, jo abudon ale ta len mene jo ruwani ou, ma wa-i madam mene iroh en. Eme ma, jo anya kanyolom ou ja, ma jo kameh sekesek labai. 5 Jo edeu wurah i ta Kindrei ale, eme ma, jo bwetenei budon tam, tasah iy budon handru, iy ta wendreya bwe. Iri budon buku doh, ma bwena udu ta bu-um Lowis, ma hamon ja udu ta tinem Yunis. Ma jo i tanan amwenen, budon doh ere tam ale. 6 Budon doh ere tam handru, eme jo anya katadau budon tam kabadok ta ndramas ta Kindrei nane udu hawem badeh. Ou akohok ndramas doh badeh, kabatana jo asolom ou ma edeu minek udu bwele-em. Eme ma jo aso-ok ou amekes ndramas badeh, kamwenen i buku ndramak asumwe jih ma anya i tinan. 7 Ou tutuni ndramas badeh, ma ou amekes gok Kindrei ndratiye ndrawek tam. Tasah, Malawin Ndrabun, Kindrei atehei eme tataha doh, iy winiyan babwidi taha banoh bwe. Iy badeh, ndranyuhi taha marakon na boto-on tan ta amekes gok tan, ma taha winiyan tikisi iri lau mari, ma taha winiyan atondrok ndrine taha amwenen.
8 Eme ma, bwilim sama ta atiye sahou mwasin ta Laban tataha. Jo kada-ah udu bolo asiu lulik, tasah jo atiye sahou mwasin ta Laban. Eme ma, bwilim sama jo. Ou andrei boto-on ta Kindrei, ma ou alokou ou ta bwese maha randrah le, buku jo bwese maha-an ta bolo gok tek ta atiye sahou mwasin. 9 Kindrei luhi taha, ma iy andrei taha ndrame hamon, ma tondrohon taha asahan lau tan amwenen. Iy babudon ta kandriyen mwasin taha amekes, ma iy akohok taha ame hamon ma tondrohon taha asahan lau tan, bwe. Iy le amwenen abudon ta amekes lakou doh. Ndra bwena handru Kindrei babwidi munyak bwe le, iy abudon ta gok Jises anya kamekes, ma ta doh le iy badeh, tikisi taha, ma iy tondrohon taha ta asahan lau tan. 10 Arile, na len nane kada-ah, Krais Jises iy ndramak ta akohok taha ame hamon badeh, ndrasahan ndrame lewan. Ma ta gok doh badeh, iy amekes tataha, tikisiy ta Kindrei badeh, ndrasahan ndrame lewan mara-ei. Krais Jises mene apwai boto-on ta imek, tasah taha amak badeh, malawi taha bandra-i bwe. Buku taha anuhun sahou tan mwasin ma atehei budon in ta aliy, taha kameh winiyan akohok kohan handru ta udu le buku doh, ma bada taha winiyan bandra-i bwe.
11 Kindrei ndratondrohani jo asahan aposel ma ndramak ta leheya. Tasah, iy aso-ok jo kamekes gok ta atiye sahou mwasin dah. 12 Eme ma, jo bwese maha-an doh, ma jo eme udu bolo asiu lulik kada-ah. Arile, bwilik bama ta udu bolo asiu lulik ma bwese maha-an kada-ah, bwe. Tasah, jo ndratanan Krais Jises, ma jo atehei budon tek handru in tan. Ma jo tanan, iy winiyan tondrokei gok ta atiye sahou tan dah udu mwasin, iy ndratehei ndrame minek, ma gok doh kameh udu mwasin mara-ei ili winiyan le len iy eme hamon ja.
13 Ou a-en hamon ta sahou, ou mene ndranuhun badu bohok. Sahou doh kameh leheya kandriyen ta ou a-en hamon ta aliy, ma ou leheya ki tiri mwan ma badih. Na len ou atiye sahou dah, ou atehei budon tam kabadok kili ta Jises Krais, ma ou aso-ok iri mwan ma badih. 14 Ou atondrok sahou mwasin doh kamwenen, Kindrei mene ndratehei ndrawek minem. Malawin Ndrabun ta Kindrei doh, iy udu bolo taha, iy kameh aseben ou ta atondrok lakou badeh.
15 Sebwe ou ndratanam, mirihik iri mwan ma badih marakon ta Kindrei badu kon tinan Esiya, iri badeh, ndraruwani jo. Pigelus hawe Hermogenes ale ndraruwani jo. 16 Arile, jo aso-ok Kindrei katikisi Onesiporus ma hawe lowan oro, tasah Onesiporus badeh, bwidi ndrinek sekesek san solo-an labai. Ma bwilin bama jo bwe, kala jo udu bolo asiu lulik dah. 17 Arile, na len iy isos Rom, iy asa-ar labai ta asilah jo winiya le iy baranyolom jo. 18 Ou ale ndratanam mwasin labai ta iri seben Onesiporus mene anyohan jo, kala jo udu kon Epesus. Eme ma, jo aso-ok Kindrei katikisi iy ta len doh kameh, iy atehei iri mwan ma badih a ta mada sahou.