Lahou toro
APOSEL
Sahou Tanan
Iri aloh buk dah, Lahou toro Aposel, sukumada sahou badu bolo buk ta Luk atorou. Luk le ari atorou buk dah ale. Udu bolo buk dah, taha anyolom Malawin Ndrabun leheya san ili tiri aposel, ma iri atiye sahou ta nyala Jises, “ili Jerusalem, ili Judiya, ili Samariya, ma ili bolo kon munyak mara-ei.” (Ou anyolom udu ta kalan 1:8.)
Buk ta Lahou toro Aposel dah asehek kundruh ta nyala lahou ta Jises asahan bolo iri Juwis ma udu hamon ja ili a tinan ma aseker laleyah ili bolo iri kon rayah ja badu munyak. Luk anya kaleya taha, i buku gok ta Krais ma koha iri mwan ma badih an hamon tan, bwidi iri tandrakan mene Kindrei amekes ili tiri lau mwan ma badih badu Isra-el asahan handru.
Lakou ari laba tinan udu bolo Lahou toro Aposel asehek ta aliy badeh, gok ta Malawin Ndrabun, idoh Malawin Mwasin ta Kindrei. Malawin Ndrabun ma bwena ili tiri lau ta Jises badeh, udu bolo len ta Pentikos. Hamon ja Malawin Ndrabun atehei budon mwasin ma atehei boto-on ili toro.
Bolo buk dah, taha anyolom ale, ta iri sahou solo-an lawe-en mene iri aposel tiye tiri lau mwan ma badih rayah ja ta sahou mwasin ta nyala Jises. Ma taha anyolom lau mwan ma badih solo-an labai an hamon ta iri sahou mwasin ma gok tiri abadok.
Udu bolo Lahou toro Aposel badeh, iri kundruh toro aposel solo-an udu aliy, arile sahou solo-an handru ta iri lakou, Pita uru Pol mene amekes. Pita, iy ari tiri lau mene adek hawe Jises. Arile, ma bwena badeh, Pol badek hawe Jises bwe. Iy mene ibo gok ta atikah lau mwan ma badih ta Jises. Arile, Jises badeh, aloh Pol, ma bwidi iy asahan ndramak ari mwasin handru ta amekes gok tan.
Udu bolo buk dah, Luk anya kasehek kundruh ta iri lakou mene asahan ta Pol, iy tiye ta iri lakou “ahi” mene amekes. Lau ta tanan solo-an labai abudon Luk amwenen badeh, edek hawe Pol san sabe, eme ma iy tiye “ahi” badu loboho doh.
Iri Sahou Tinan
Iri asehek sahou mwasin udu Jerusalem (1:1–8:3)
Sahou mwasin ili bolo Judiya ma Samariya (8:4–12:25)
Tekedek ta Pol ma bwena ta atiye sahou mwasin (13:1–14:28)
Tukum tinan ta lau ta Kindrei asahan Jerusalem (15:1-35)
Tekedek ta Pol rasan ja ta atiye sahou mwasin (15:36–18:22)
Tekedek ta Pol ari ja ta atiye sahou mwasin (18:23–21:16)
Iri tawi Pol udu Jerusalem (21:17–23:22)
Iri andrei Pol iu ili Sesariya (23:23–26:32)
Iri andrei Pol iu ili Rom (27:1–28:31)
Oro aposel atiye sahou ta Jises ili Jerusalem
1
(Kalan 1:1–8:3)
Jises iu i loken
1 Tiyopilus ei, udu bolo tarou tek mwena mene badeh, jo atorou ta nyala lahou mari Jises amekes ma leheya iri mwan ma badih ma mwena handru,* Luk badeh, atorou buk aloh Lahou toro Aposel dah. Ma bwena mene iy atorou buk tan ari ja aloh Tarou ta Luk. 2 eme, eme taku na len andrei Jises iu i kandrah. Idoh, udu hamon ta iy edeu batanau na boto-on ta Malawin Ndrabun i toro aposel tan, iy mene ndralebelei. 3 Udu hamon ta imek tan ja badeh, iy leheya iy amwenen i toro lau doh, ma leheya lahou solo-an i mada oro ta iy badeh, ndramak ndrame awas ja. Iy badeh, asahan hawe oro udu bolo len ma hanoh (40). Iy asehek sahou i toro ta nyala tondrok ta Kindrei. 4 Ya udu bolo tukum toro ari ja, iy udu hawe oro aimon nyamon, ma iy batanau oro i buku doh: “Ado badeh, sa-au op, ado kado Jerusalem kado kabe-en ndramas tado Malawin Ndrabun. Tama mene tandrakan i tado mene, ado anuhun jo asehek nyala aliy. 5 Tasah, Jon mene inyu ado na gwa, arile len rayah iu, ano kameh, ado anyu na Malawin Ndrabun.”
6 Eme na len oro atukum badeh, oro ndremenya iy anya, “Laban ei, na len dah kameh, ou atudun tondrok ta Isra-el ja ai?”† Ma bwena handru, iri kabin badu Isra-el amwenen atondrok iri lau badu Isra-el. Arile, na bolo len ta Jises badeh, iri lau badu Isra-el ado bahandra tondrok ta kon munyak tinan Rom. Eme, na len dah, iri lau rayah badu Isra-el abudon anya, Jises kameh tikahei tondrok ta Rom, ma tutuni tondrok tiri Isra-el amwenen ja.
7 Eme iy tiye i toro i buku doh, “Len ma sasah asahan kameh, udu mine tama le ari. Idoh badeh, ta ado katanan ta aliy bwe. 8 Arile, ado kameh akohok boto-on na len Malawin Ndrabun kameh ewek la-u ado; ma ado kameh atiye sahou tek ili Jerusalem, ili Judiya, ili Samariya, ano kili kon munyak mari.”
9 Eme iy asehek sahou doh i toro ano le badeh, Kindrei kuhi iy udu mada oro iu i loken, ma asi jor turuki iy amai ta mada oro.
10 Eme mada oro badeh, udu le tan, ma iy iu i kandrah. Ya eme suwi suwi badeh, uru lau la-uh asini awin belen mara-ei ales udu ka-u oro. 11 Eme uru anya, “Ado lau badu Galili. Ado ales ado kede-eh, anyolom i kandrah, ta sasah handru? Iy ndramak Jises le doh, kameh, ado anyolom, andrei iy ndra-au ndra kandrah; idah kameh, ado anyolom iy eme andri ja kameh i le buku none ado anyolom iy i loken doh.”
Matiyas akohok ndrahune Judas
12 Ano oro adek ado bwili ndrondro-ou Olip ala hamon ala Jerusalem. Ya ndrokowa bwili ndrondro-ou doh kilomita ari udu len ta kon tinan Jerusalem. 13 Eme oro asos badeh, oro ala loken a bolo asiu mene oro areu aliy. Oro lau areu aliy badeh, Pita, Jon, Jemis hawe Enduru, Pilip, Tomas, Batolomiu, Metiu, Jemis nadu Alpeyus, Saimon Selot ma hawe Judas nadu Jemis. 14 Oro mari atukum ame se ya oro atehei budon toro i randra le i ta salom.
Ma hawe oro badih rayah hawe Mariya tine Jises hawe nadu tine Jises ale udu hawe oro.
15 Eme na len doh badeh, Pita ales ere loken bolo iri lau ta Kindrei, kane iri ma rinek lunoh (120), 16 ma iy tiye anya, “Ado nadu tine mwan ma badih, sahou ta Kindrei mwena mene Malawin Ndrabun mene ndratiye udu boho Debit tiye nyala Judas mene udu bwena tiri eme ateu Jises badeh, ndrasahan handru. 17 Judas badeh, mene badu hawe to ta amekes lahou dah. 18 Eme Judas badeh, sihinei munyak na luk, tasah ta kandriyen ndra-in tan; eme iy taku i andri ma imek ya ndrinen asikak ma ndrinen talou eme len. 19 Eme iri lau badu Jerusalem anuhun badeh, ma tondrohani kon iy imek udu aliy doh i boho kon tiri aloh Akeldama, moson ‘munyak ta ndrahu ndra.’
20 “Tasah, ndratorowenei udu bolo buk Wari badeh, tiye i buku doh:
‘Asiu tan badeh, kudu laleyah,
ya ari ndramak sado aliy.’ Wari 69:25
Ma torowenei ale i buku doh:
‘Ya ndramak ari ki saluwen ta in bwena.’ Wari 109:8
21 “Ya eme, are lau mene udu hawe to na len mari to adek hawe Laban Jises badeh, ki saluwen? 22 Udu ndra kabatana Jon ta alomwa eme, eme taku kabatana andrei Jises udu hawe to iu i loken. Iy doh badeh, keme hawe to ta asehek nyala Jises mene amak eme awas ja.”
23 Eme oro badeh, aseken lau la-uh: Iy ari badeh, Matiyas. Iy ari ja nyaran taloh: Josep, Barsabas,‡ Barsabas, moson Nadu len ta amunyau Jastus. 24-25 Ano oro amekes salom anya, “Laban, ou badeh anyolom ndrine lau mari. Ou leheyani keme lewan keme taso ta are turu kasahan aposel ta amekes lahou tam ki saluwe Judas mene iy ndramak ndra-au.” 26 Ano oro asoh nyek. Eme nyek ihis ta Matiyas. Ya eme iy ili hawe oro aposel ma ronoh ari nane dah.
*1:1: Luk badeh, atorou buk aloh Lahou toro Aposel dah. Ma bwena mene iy atorou buk tan ari ja aloh Tarou ta Luk.
†1:6: Ma bwena handru, iri kabin badu Isra-el amwenen atondrok iri lau badu Isra-el. Arile, na bolo len ta Jises badeh, iri lau badu Isra-el ado bahandra tondrok ta kon munyak tinan Rom. Eme, na len dah, iri lau rayah badu Isra-el abudon anya, Jises kameh tikahei tondrok ta Rom, ma tutuni tondrok tiri Isra-el amwenen ja.
‡1:23: Barsabas, moson Nadu len ta amunyau Jastus.