1 Na bolo len doh, Sol badeh, alohou ta idi iri lau ta Laban marakon kamak ka-au. Eme ma iy amwenen ili hawe batun tiri pris, 2 anya kalelen iy ta iy katorou rayah la-ukei ta tiye nyala Sol badeh, are lau handru. Ya Sol aseken ta atiye iri la-ukei doh i mine iri tinan ta ndrahu tukum tiri Juwis udu kon Damaskus katanan ta aliy. Ya eme i buku none iy kili kanyolom iri lau mwan hawe badih ta a-en hamon ta San ta Laban ado aliy badeh, iy kakuhi iri kala Jerusalem kala bolo kou. 3 Eme iy edek eme mirihik ta kon Damaskus le badeh, se nawin bwe, sun lomadan labai anya udu kandrah eme andri awudi iy. 4 Eme ma iy atarah i andri bada munyak ma ndranyen anuhun sahou aloh i tan anya, “Sol, Sol, buku sah handru ou anya adai jo?”

5 Eme Sol anya, “Laban, ou are lau badeh?”

Eme iy anya, “Jo Jises, na len mari, ou ale anya adai le jo kede-en. 6 Abo, ou suri ou, ya ou ala bolo kon tinan Damaskus. Ma idah kameh ndramak ari eme, tiye tam ta sasah kameh ou amekes.”

7 Ya oro lau nane adek hawe Sol doh badeh, boho oro ihis; oro anuhun nyaro boho ndramak, arile oro banyolom ari ndramak bwe. 8 Sol eme suri iy udu bada munyak eme loken, madan anya kasak badeh, iy banyolom se lakou bwe. Eme iri sirini iy ili Damaskus. 9 Len taloh badeh, iy winiyan batou kon bwe, iy ba-un gwa ma baimon nyamon bwe.

10 Ya udu Damaskus doh badeh, ndramak ari ta Jises udu aliy, nyaran Ananayas. Ya Laban badeh, asahan ta lele, tiye i tan anya, “Ananayas, ei!”

Eme Ananayas anya, “Abo, Laban, jo udu kada-ah.”

11 Eme Laban tiye i tan anya, “Ou ales ala asiu ta Judas udu loboho nadu san iri aloh San Ales Le. Ya ou ndremenya oro ta ndramak ari badu Tasus, nyaran Sol. Iy badeh, asolom. 12 Udu bolo salom ta Sol badeh, iy anyolom ndramak ari nyaran Ananayas udu bolo lele eme, atehei limen i bwele-en ta amekes madan kasak.”

13 Eme Ananayas anya, “Laban, jo badeh, ndranuhun yoyou ta ndramak badeh, ma ndranuhun sisi-in iy amekes i tiri lau ta Kindrei ado Jerusalem. 14 Iy akohok boto-on badu mine iri tinan tiri pris ta aseu iri lau ala aloh nyaram udu bolo salom tiri.”

15 Arile, Laban tiye i ta Ananayas anya, “Bwe, ou ala! Iy ndramak doh badeh, jo ndralebelei iy ta atiye sahou tek i tiri lau badu leheleh, i tiri kabin tiri ma hawe i tiri lau badu Isra-el. 16 Jo amwenen kameh leheya iy ta iri maha-an ma sisi-in, iy kameh bwese ta nyarak.”

17 Ano Ananayas ili, ma iy ales ili bolo asiu badeh, atehei minen i bwele-e Sol ma iy anya, “Sol ou nadu tine, Laban Jises amwenen suni jo eme hawem; iy le mene adeh asahan hawem udu san ta ou ame dah. Iy suni jo eme dah badeh, ta amekes madam kanyolom kon ja, ma iy aso-ok ou adah na Malawin Ndrabun.” 18 Eme se nawin bwe, lakou i buku none bwisi ni udu madan taku eme len, ma iy anyolom kon ja. Eme iy ales udu loken ma alomwa iy. 19 Ano iy aimon nyamon ma nyamun eme hamon ja.

Eme Sol badeh, udu hawe oro lau ta Jises udu Damaskus len solo-an sese. 20 Ya eme iy ales ili kon ndrahu tukum tiri Juwis, iy asehek ta nyala Jises badeh, Nadu Kindrei handru. 21 Eme iri are anuhun iy asehek sahou badeh, mani iri atur anya, “Kede-eh iy ndramak mene udu Jerusalem idi iri lau mene aloh i ta nyaran doh i buku iy asehek kede-eh! Ma iy kede-eh eme ta ateu iri lau kala hawe iri tinan tiri pris ma iri kala bolo kou ai.” 22 Arile, sahou Sol akeh badeh, i nyarahan nyarahan le gwek ma iy asehek sahou aleu handru i tiri Juwis ado Damaskus, ta Jises badeh, Krais handru, Kindrei suni iy eme. Sahou tan bolowani budon tiri Juwis doh, ma bwidi boho iri ihis.

23-24 Eme udu, udu len solo-an iu badeh, iri Juwis atilik nyala iri ta adi iy kimek. Ya ben len ben len badeh, iri atehei mada iri udu madasan ta kon tinan ta anya kadai iy. Arile, iy badeh, ndrandrei bale iri. 25 Ma iri lau tan badeh, andrei iy na ben ma atehei iy i bolo ndrom sahin rahak iu ta malou i san ta mada munu kowah i andri.

26 Na len Sol eme Jerusalem badeh, iy anya kili hawe oro lau ta Jises, arile oro mari anoh iy. Ma oro atehei budon anya iy badeh, ndramak badu hawe oro bwe. 27 Ndramak ari nyaran Banabas eme badeh, andrei iy, ma uru ala hawe oro aposel. Eme iy asehek nyala oro ta sasah asahan ta Sol na len iy edek ili Damaskus, ya iy anyolom Laban, ma Laban asehek sahou i tan. Ma asehek i toro ta iy udu Damaskus badeh, iy banoh ta asehek sahou, ta nyala nyara Jises nyarahan labai bwe. 28 Ma eme Sol udu hawe oro edek ili eme bolo Jerusalem atiye sahou nyarahan nyarahan ta nyara Laban. 29 Iy asehek sahou ma hawe andres oro lau badu Juwis nane asehek boho Grik, arile oro anya kadai iy kimek. 30 Eme iri lau ta Jises ado doh anuhun badeh, iri kuhi Sol ili Sesariya ma suni iy iu ili kon Tasus.

31 Ano iri lau ta budon handru badu loboho Judiya, Galili hawe Samariya sekesek handru ta iri babwese isi ja bwe. Iri badeh, abadok ma ales boto-on na boto-on ta Malawin Ndrabun. Ma eme, kane iri i sola ma iri anoh Kindrei, eme ma iri atudun iy.

32 Udu bolo tekedek ta Pita ili eme bolo kon munyak doh badeh, ma iy ili selesen oro lau ta Kindrei an kon Lida. 33 Iy ili badeh, ndruni ndramak ari nyaran Aneyas, badan mari imek. Iy in le bada sau andrei jaha ma ndru la-uh. 34 Eme Pita tiye i ta Aneyas anya, “Jises Krais ndramesekei ou ndramwenen. Ou suri ou, ma ou lukumwi kin tam.” Eme, se nawin bwe, iy suri iy eme loken. 35 Eme iri lau manyah ado Lida hawe Saron anyolom badeh, ma iri atehei budon tiri handru i ta Laban.

36 Ya udu kon Jopa badeh, badih ari nyaran Tabita (i boho Grik badeh, aloh iy Dokas). Iy badeh, badih ari ta in hamon ta Kindrei. Eme na len mari, iy amekes kandriyen mwasin i tiri lau, ma iy aseben iri lau, tiri lakou bwe. 37 Na len doh badeh, iy ibo sik ma iy imek. Ya eme iri anyuwi iy, ma nyahani iy udu bolo asiu loken. 38 Lida doh badeh, udu mirihik ta Jopa. Ya eme oro lau ta Jises anuhun Pita badeh, udu Lida. Eme oro suni uru lau la-uh badeh, ala andrek iy anya, “Ou ame suwi.”

39 Eme Pita i hawe uru, ya oro ame asos le badeh, oro kuhi iy iu ili bolo asiu loken. Ya iri badih nyau mari awudi iy, ya iri aden, ma leheya i tan iri awin lawe-en hawe awin rayah ja Dokas amekes, na len i bamak bwe le.

40 Eme Pita tiye iri mari ame len ta bolo asiu. Ano iy atehei bwili ndru-un i andri ya iy asolom. Eme iy tubuni batalan i ta bada kei nane dah ma iy anya, “Tabita, ou ales are loken.” Eme madan asak anyolom Pita, ma iy suri iy. 41 Eme ya Pita tawi minen ma suri iy ales na katin ere loken. Ano, iy aloh i toro lau ta budon handru hawe iri badih nyau ame, ma iy atehei iy i hawe iri, ya kohan ndrame hamon ja. 42 Eme iri lau mari badu loboho Jopa badeh, atanan ta aliy, ma atehei budon tiri handru i ta Laban. 43 Ya eme Pita badeh, udu hawe ndramak ari lahou tan ta asereh ku-i iri katin haka, nyaran Saimon, iy udu gwek sese.