1 Ta idoh, taha sasehek ja ta iri leheya mwasin taha ndrakohok ma bwena mene ta nyala Krais. Arile, na dah taha kala ta leheya tiri lau-en le ai. Taha sala hamon ja tiri lakou mene taha ndrakohok tanan tiri. Iri lakou doh: ta mani kandriyen ndra-in ili san ta imek; ma ta atehei budon in ta Kindrei; 2 ta leheya san ta anyu; ma ta adeu mine ndramak ili bwele-en; ta amak ame awas ja ta imek; ma len ta sahou winiyan bano bwe. Iri lakou marakon doh mwasin, ta lau kakohok tanan ta aliy op. Arile, tanan doh i buku ndru ta asiu taha ahiy bwena udu aliy. Na idah ja, taha atah asiu handru ili bwele-e iri ndru nane udu aliy bwena, eme ma taha kala le ta tanan tiri lau-en ai. Taha sala hamon ja. 3 Taha kala le bwena. Taha winiyan, i buku Kindrei aso-ok.

4 Iri lau mwan ma badih rayah mene ndrandrei tanan handru ta sahou ta Jises Krais. Eme ma iri ndratehei Jises le ari badeh, udu budon tiri, ma iri ndranone ndramas ta Malawin Ndrabun badu kandrah. 5 Iri ndratanan sahou ta Kindrei mwasin ma boto-on labai, ma iri ndratona ta boto-on ta Kindrei kameh asahan tiri mwan ma badih. 6 Buku oro taku, ma atehei kona oro ili ta Kindrei, ari madasan ta akohok oro ame hamon ame len ta iri kandriyen ndra-in ja bwe. Ta kandriyen toro le doh, oro tatahi Nadu Kindrei ja ili bada kei tondreh, ma oro abolei iy udu mada iri lau marakon.

7 Ur undruk eme bwele-e munyak ma edeu gwa i ta munyak, ma munyak doh ato-ou nyamon mwasin ta aseben iri lau nane atah bilin ili aliy. Eme ma munyak akohok nyosowan mwasin ta Kindrei. 8 Arile, i buku bada malou bobodon ma bwidiu ndra-in ateh, idoh leheya munyak ndra-in. Mirihik kameh Kindrei asehek sahou boto-on ili ta munyak, ano, ma jih kameh sulumwi marakon andrakak ano iu.

9 Aha kawas tek handru, ahi asehek sahou boto-on dah ewek taha. Arile, ahi ndratanan aha kameh winiyan bakohok ndra-in bwe. Tasah, Kindrei aseben aha ma iy andrei aha ame hamon. 10 Aha tanan, Kindrei mwasin labai, iy ndra-in bwe. Iy kameh winiyan bamani gok aha amekes bwe. Aha suri aha ta aseben iri lau mwan ma badih tan, ma aha bamunyau se bwe. Idoh leheya, aha aso-ok Kindrei labai, eme ma iy winiyan bamani kandriyen doh bwe. 11 Budon tahi tinan labai ta aso-ok aha marakon kamekes gok boto-on ki buku le doh, winiya le len hamon. Buku aha amekes iri lakou i buku doh, saba lakou aha nane abe-en, kameh asahan handru. 12 Ahi baso-ok aha asahan gwaman bwe, arile ahi aso-ok aha ka buku le iri lau atehei budon tiri in tan, ma atondrok iy. Iy are lau iy amekes i buku doh, iy kameh akohok lakou Kindrei ndratandrakan ta aliy.

13 Bwena mene Kindrei tandrakan, iy anya kedeu lakou kili ta Abraham. Iy eme amekes sahou handru in hamon ta tandrakan tan. Iy tandrakan ta nyaran amwenen, tasah nyara ari kindrei ja bare bwele-e nyaran ja bwe. 14 Iy eme tandrakan Abraham i buku doh:

15 Abraham tondrokei udu le, ano iy andrei iri lakou nane Kindrei tandrakan ta edeu ili tan. 16 Buku ari ndramak asehek sahou kili handru, iy kameh aloh nyara ari tubun oro lau-en. Sahou tandrakan tan nane winiyan bwidi sahou tan abadok, ma iri lau winiyan basehek ja bwe. 17 Bwena mene Kindrei amekes tandrakan ta iy kameh amekes mwasin eme tataha nadu tubu Abraham. Iy eme leheyani taha amwenen labai, ta iy winiyan batubuni budon tan bwe, eme ma iy tandrakan ili loken handru labai ta amekes sahou tan abadok ma ili handru. 18 Sahou ma tandrakan, lakou ma la-uh doh winiyan batubuniy bwe, ma Kindrei ale winiyan bawendreya bwe. Ya, lakou ma la-uh doh bwidi ndrine taha abadok ta sakaliye ala hawe Kindrei ta aton are bahandra tondrok tan. Eme ma taha katawiy kihis kudu budon tataha, iri lakou nane iy ndratandrakan ta edeu eme tataha. 19 Taha ndratanan, iri lakou nane taha atondrok doh, handru, i buku le hanai ta koha taha. Hanai o sahou tandrakan ta ateu taha ahis hawe Kindrei, i buku le bwena mene tinan tiri pris le ili kona kolau laba tinan,*Kolau laba tinan i buku kowah ta ndrokowa Kindrei ma lau laleyah, iy pris bwe, iy winiyan bala kona kowah nane ta ili ta Kindrei bwe. Jises le ari ndrala kona kolau laba tinan nane ndra-au ndrala kandrah, ta amekes gok tan ta aseben taha. Gok tan handru, ma taha katehei budon tataha kili tan. Idoh i buku hanai tataha ili ta Kindrei iu ili kandrah, ma ateu taha ahis boto-on are hawen. iri talahaniy udu bolo asiu tinan ta Kindrei, iu ili alih handru bolo asiu ndrok ndrabun ndrabun labai ta mada Kindrei. 20 Ta akohok kon tataha, Jises ndrala mwena tataha ndrala bolo asiu ndrok doh. Eme ma iy ndrasahan tinan tiri pris ta udu le buku doh, in hamon ta gok ta pris ari mene nyaran Melkisedek.