8
Tinan tiri pris tataha Jises
1 Eme ta kati sahou nane dah, taha ndrasehek i buku doh: Tinan tiri pris tataha udu aliy, eme iy ndrala ndramanyah udu loboho limen salin ta koyeu ta kabin badu kandrah. 2 Iy amekes gok i buku tinan tiri pris udu bolo asiu ndrok ta Kindrei udu kandrah, asiu handru ta Kindrei. Asiu doh, iri lau batutuniy bwe, Laban le ari tutuniy.
3 Iri tinan tiri pris marakon badeh, gok tiri ta atiye ndramas, ma ta adi iri lakou buku bulumakau i ta salom ili ta Kindrei. Eme ma Jises kamekes iri lakou doh ale. 4 Buku iy kudu kon munyak dah, iy winiyan basahan pris bwe. Tasah iri pris ado aliy bwena, iri ndradeu ndramas solo-an labai ndrala ta Kindrei, i buku le kandriyen malen ndrasehek. 5 Gok tiri pris mene iri amekes in hamon ta koroha malawin le; lakou handru udu kandrah. Idoh i buku le bwena mene Moses alokou ta atah asiu balei le badeh, Kindrei batanau iy i buku doh:
“Ou an hamon le ta koroha malawi tarou mene jo leheya i tam udu bwele-e mandrei.” Eksodus 25:40
6 Arile idah, Jises ndrateu gok i buku pris udu bwele-en labai tiri rayah ja. Tasah, iy ndrala buku ndramak ta ere le alih ta sahou randra le ha-un, nane Kindrei amekes hawe iri lau. Sahou randra le ha-un ja doh ere bwele-en labai ja ta sahou randra le bwena mene Kindrei edeu i ta Moses. Tasah, iri lakou mwasin asahan ta sahou tandrakan ha-un badeh, udu bwele-en labai ja tiri lakou mene asahan ta sahou tandrakan malen.
7 I buku sahou randra le mwena kudu mwasin, idah nane Kindrei winiyan bamekes ari ja bwe. 8 Arile Kindrei ndrasilahei ndra-in tiri lau tan amwenen, eme ma iy asehek:
“Jo Laban asehek, len eme kameh, jo amekes sahou randra le ha-un hawe iri lau badu Isra-el ma iri Juda.
9 Idah kameh winiyan bala buku sahou randra le mene jo amekes hawe tubu iri mwena mene bwe. Eme jo tawi mine iri, ma sirini iri ado bolo kon Ijip ame len, arile iri ba-en hamon ta sahou randra le jo mene asehek hawe iri bwe, eme ma jo winiyan banuhun iri ja bwai.
10 Jo Laban, jo kameh asehek sahou randra le dah hawe iri lau badu Isra-el na len eme:
Jo kameh atehei kandriyen tek ili bolo budon tiri, ano kameh jo torowenei iri sahou tek udu bwele-e ade iri.
Jo kameh asahan Kindrei tiri, eme iri kameh asahan iri lau mwan ma badih tek.
11 Udu bolo len doh kameh ari ndramak winiyan baleheya ari nadu tinen bwe, o ari ndramak winiyan basehek sahou hawe lowan bwe, anya, ‘Aha katanan Laban.’
Tasah, bolo len doh kameh lau marakon atanan jo, udu ndra bada iri nadu bwisik ili ano tiri lau alon.
12 Jo kameh mani kandriyen ndra-in tiri, ma jo winiyan babudon kandriyen ndra-in tiri ja bwe.” Jeremaya 31:31-34
13 Kindrei tiye ta sahou randra le “ha-un.” Eme ma, ta sahou doh, iy bwidi sahou randra le ari mene, eme ndra malen. Ma lakou asahan malen ma amu-uk, kameh udu sese, ano ma iu mara-ei.