4
Iri mwan ma badih ta aso-ok kandriyen badu kon munyak labai, iri doh badeh, ta amekes bahun i ta Kindrei
1 Saba lakou handru ale amekes bahun hawe losen udu bolo ndrokowa aha? Sebwe iri kandriyen ta ndrine aha ato-ou ta losen suwi, badeh, udu bolo oda aha, ma amekes bahun hawe budon ma tanan mwasin ta atondrok bada aha mara-ei. 2 Aha aso-ok lakou solo-an labai, arile aha bakuhi ari bwe, eme ma aha adai iri lau amak, arile aha bandrei saba lakou tiri nane aha aso-ok bwe. Mada aha alikis iri lakou ma aha ada aha le amwenen. Arile, aha bandrei bwe, tasah aha bandremenya Kindrei ta aliy bwe. 3 Buku aha asolom i ta Kindrei ta lakou aha aso-ok, ya aha bakuhiy bwe, tasah budon taha bamwenen bwe. Ya, aha asolom laleyah i ta Kindrei ta akohok lakou nane ta aseben ndrine aha, ma ta amekes aha kasekesek. 4 Aha badeh, ndraruwani Kindrei, i buku le badih ndraruwani udun, ya iy ndrasahan badih ta madasarah. Buku ari mwan o badih, iy aso-ok kandriyen badu kon munyak labai, iy lau le doh kameh baseken Kindrei bwe. Sebwe, aha tana aha bwe nadeh? Jo katiye taha ja, buku none ari ndramak anya kasahan kawas ta kandriyen badu kon munyak, iy ndrasahan lau ta bahun i ta Kindrei. 5 Buk ndrabun ndratiye, i buku doh, “Malawin mwasin nane Kindrei atehei udu bolo taha, len mari iy aso-ok taha ka-en bahandran amwenen.”*Boho Grik basehek bame lewan bwe, ta nyala sahou dah. Eme ya lau ra-on anya moson ta aliy i buku doh: Malawi taha nane Kindrei atehei in bolo oda taha, len mari, iy mesekei mada taha alikis ta lakou ndra-in solo-an labai. Aha anya, sahou dah, sahou laleyah nadeh? 6 Arile, Kindrei badeh, tikisi taha tinan labai. Eme ma buk ndrabun tiye i buku doh,
“Kindrei badeh, bwalen iri lau ta atudun nyara iri amwenen i loken, arile iy badeh, tikisiy, ya iy amekes mwasin i tiri lau ale atehei nyara ma so-ok tiri i andri mara-ei.” Tanan 3:34
7 Eme ma, aha badeh, katehei aha amwenen ka-au kala andri mara-ei kala kado bahandra Kindrei. Aha kales boto-on ma karuwani iri kandriyen ndra-in badu munyak, balik nane amekes kede-eh, ma iy kameh ruwani aha, ma iy atobwak iu. 8 Aha badeh, kala mirihik handru ta Kindrei, ya iy kameh eme mirihik handru taha. Aha lau mwan ma badih ta lomondra ndra-in ma ta karei, kandriyen taha badeh, kasahan mwasin i buku ndramak sikine minen asahan ha-un ja. Buku budon taha i lundra, baden eh, aha karuwani budon ndra-in nane udu ndrine aha badeh, ki-iu ai. 9 Buku aha ame mirihik ta Kindrei badeh, ndrine aha katikisiy, ma aha kaden handru ta kandriyen ndra-in nane aha ndramesekei. Aha are lau mwan ma badih ehe-en na idah, aha katubuni ehe-en kasahan ki ndrelen ja, ya sekesek ja badeh, kili ta tikisiy. 10 Ta mada Kindrei badeh, aha katehei aha ka-au kala andri mara-ei. Buku aha amekes i buku doh, iy kameh mani ndra-in taha, ma suruni aha au ala loken mara-ei labai.
Taha sorou sahou sala la-u ndramak ari ja
11 Aha nadu tine mwan ma badih ta Kindrei, aha badeh, saluhe iri lau ta Kindrei. Are mwan o badih, iy aluhe o asehek nadu tinen iri rayah ja, iy badeh, aluhe batanau amwenen. I buku aha orou sahou i ta batanau, ou badeh, bado bahandra batanau ja bwe, tasah ou ndrasahan buku ndramak ta anuhun sahou, ma ou asehek i bada batanau amwenen. 12 Kindrei le adeh, atehei kandriyen malen i mine Moses, ya iy le ari badeh, ndramak ta anuhun sahou tataha. Ya iy winiyan sebenei taha, ma iy winiyan idi ndramak imek. Ya aha anya, aha sah bah? Ya aha orou sahou i bada lau rayah ja?
Taha badeh, sasahan nyaladan labai
13 Aha kanuhun! Jo anya kasehek nyala aha lau ale asehek i buku doh, “Sebwe na idah deh, na bi-i, jo kameh ili kon tinan, ya jo kameh amekes ari lahou tek winiya jaha ari. Ta lahou tek doh kameh taha winiyan akohok luk solo-an labai ta aliy.” 14 Aha badeh, amekes iri sahou doh, arile aha badeh, bala tanan ta saba lakou handru kameh asahan na bi-i bwe. Koha taha badeh, i buku kasu-er, asahan, ano nawin bwe, iy ndra-au ja. 15 Sebwe mwasin ta aha kasehek ki buku doh, “I buku Laban aso-ok, ahi kameh ado awas, ma ahi kameh winiyan amekes iri lakou nane ahi abudon ta amekes.” 16 Arile, aha bwese nyara aha i loken labai, ya aha arah ta leheya iri lakou aha amekes. Ma aha asehek anya, “Ahi le ai.” Kandriyen buku doh badeh, ndra-in labai.
17 Aha kabudon kamwenen, buku aha ndratanan ta kandriyen mwasin aha anya kamekes, arile aha bamekes bwe, badeh, aha ndrabwidi kandriyen ndra-in kabwe.
*4:5: Boho Grik basehek bame lewan bwe, ta nyala sahou dah. Eme ya lau ra-on anya moson ta aliy i buku doh: Malawi taha nane Kindrei atehei in bolo oda taha, len mari, iy mesekei mada taha alikis ta lakou ndra-in solo-an labai.