Tarou ta
JON
Sahou Tanan
Ta sahou iy atorou, Jon asehek i buku Jises iy “Sahou ta Kindrei asahan ndramak awas ma iy udu ndrokowa taha.” Jon aso-ok iri lau mwan ma badih katehei budon tiri kili ta Jises, iy nadu Kindrei, ma iri katanan buku, Jises iy ndramak doh Kindrei mene tandrakan ta suni iy eme ta akohok taha ame hamon. Jon ndratanan buku, iri lau atehei budon tiri i ta Jises, iri kameh akohok kohan handru ta udu mwasin ta udu le buku doh, eme ma iy torowenei buk tan. Ou anyolom udu ta Luk 20:31.
Ma bwena mene Jon tiye tataha buku iy Jises doh, “Sahou bwena labai udu hawe Kindrei.” Udu hamon ja Jon asehek kundruh tiri kalem Jises mene amekes, ma taha kameh winiyan anyolom buku Jises iy ndramak doh Kindrei mene tandrakan ta suni iy eme ta akohok taha ame hamon, ma iy Nadu Kindrei. Jon tiye tataha ale ta kati iri kalem Jises amekes, ma taha anyolom mwan ma badih rayah atehei budon tiri ili ta Jises, ma an hamon tan. Arile iri mwan ma badih rayah bwale iri atehei budon tiri i tan.
Udu kalan 13-17 Jon asehek iri kundruh tiri lakou mene asahan na ben iri lau ta bahun badu Rom ala tawi Jises. Jises mene udu hawe oro lau tan iy edeu iri sahou ndra mwasin le ili toro. Udu hamon ja iri lau ta bahun badu Rom ame andrei Jises atehei iy i ta sahou, ma iri tatahi iy i ta kei tondreh. Udu hamon labai sahou ta Jises amak ja, ma oro lau tan amwenen atou iy.
Lakou ari taha anyolom solo-an labai udu bolo buk ta Jon, iri kandriyen ta akohok iri lakou ta koha taha lau mwan ma badih ta len marakon, ma amekes iri asahan buku sahou sokek ta lakou ta koha iri (Kristen) lau ta Kindrei. Eme ma taha anyolom sahou ta jor, ta gwa, ta jabi ramen, ta sun, ta kei waen ma ta ndramak ta atondrok sipsip.
Iri Sahou Tinan
Wari ta atudun Sahou Awas (1:1-18)
Sahou badu boho Jon ta alomwa (1:19-34)
Jises akohok oro lau tan (1:35-51)
Kalem ta Jises ma ndro taloh tinan labai (2:1–12:50)
Len ta Jises i ta sahou ma iy imek (13:1–19:42)
Jises amak ja (20:1-10)
Jises asahan hawe oro lau tan (20:11–21:25)
Sahou eme asahan Ndramak Awas ma iy eme udu hawe iri mwan ma badih
1
(Kalan 1)
Sahou asahan eme awas
1 Kon munyak basahan bwe le, Sahou Awas badeh ndrasahan ndra bwena labai. Sahou Awas badeh, udu hawe Kindrei. Sahou Awas badeh, Kindrei. 2 Iy udu hawe Kindrei ndra bwena labai.
3 Na iy le badeh, lakou marakon asahan. Buku iy bwe, lakou marakon winiyan basahan bwe. 4 Iy le badeh, kohan. Kohan anya buku sun ta lomada taha lau badu kon munyak. 5 Sun tan anya udu bolo lulik. Arile lulik winiyan baturuki lomadan bwe.
6 Kindrei suni ndramak ari ta atiye sahou nyaran Jon. 7 Iy eme bwena ta tiye lau marakon ta nyala Sun, ta lau marakon kanuhun ma katehei budon tiri kili ta aliy. 8 Jon amwenen badeh, bala buku Sun doh bwe. Iy eme bwena ta asehek le ta nyala Sun. 9 Iy le ari doh badeh, iy Sun handru, iy eme bolo kon munyak, ta edeu lomadan ili tiri lau marakon.
10 Sahou Awas badeh, ndra bwena labai ndra-en bolo kon munyak. Kon munyak asahan badeh, na iy le amwenen. Arile, iri lau badu kon munyak badeh, bala tanan iy bwe. 11 I buku bolo kon munyak ma hawe iri lau tan amwenen badeh, baso-ok iy ja bwe. 12 Arile, are lau mwan o badih iri atehei budon tiri in tan; ma aso-ok iy labai, iri le doh kameh winiyan asahan nadu Kindrei handru. 13 Iri basahan nadu Kindrei ta ndraye tama taha hawe tine taha iri amwenen bwe, buku uru asehek sahou ta nyala uru kato-ou nah, bwe. Kindrei le ari badeh, bwidi iri asahan nadun, tasah iri atehei budon tiri handru in tan le ari.
14 Sahou Awas eme asahan Ndramak Awas, ma manyah tan udu hawe taha. Ahi ndranyolom lomada Nadu Ndramak Awas. Iy badeh, Nadu Kindrei ari le. Iy irek ta tikisiy ma hawe iri sahou handru.
15 Jon asehek nyala Jises. Iy anya, “Iy le adeh mene jo asehek taha. Jo anya, ‘Iy in hamon tek eme kameh, iy sakalawi jo ja, tasah iy bwena tek labai.’ ”
16 Iy badeh, irek labai ta kandriyen ta aso-ok ma ta tikisi taha. Iy amekes kandriyen mwasin eme tataha lau mwan ma badih mari, ma taha ndrakohok nyosowan mwasin, eme taha arek ta aliy. 17 Kindrei edeu kandriyen malen* Kandriyen malen - boho iri jam aloh Lo. Batanau ma ronoh udu bolo kandriyen malen mene Moses torowenei udu bolo buk ma limeh doh: Jenesis, Eksodus, Lebitikus, Namba ma Dutoronomi. ili mine Moses. Arile, kandriyen mwasin ta tikisiy ma ta sahou handru badeh, udu bada Jises Krais. 18 Ari ndramak batou Kindrei bwe le. Nadun le ari badeh, atou iy. Iy i buku le Kindrei, iy manyah udu hawe taman. Nadun le bwidiy, eme ma lau marakon atanan iy.
Jon asehek nyala gok tan
(Metiu 3:1-2; Mak 1:7-8; Luk 3:15-17)
19 Iri lau ta mwena tiri Juwis ado Jerusalem tiye tiri pris ma hawe iri lau rayah badu boho kamen ta Libai badeh, kala hawe Jon kandremenya iy ki buku doh, “Ya, ou are lau handru?” 20 Jon bawendreya oro bwe, iy asehek sahou handru i tiri anya, “Jo Krais bwe.”† Boho iri Grik iri aloh Krais. Boho iri Hiburu iri aloh Mesaya. Moso boho kon ma la-uh i le randrah: Ndramak Kindrei atehei iy eme ta asahan kabin ma ta aseben iri lau tan marakon ame hamon.
21 Iri ndremenya iy ja, “Ka, ou are lau handru? Sebwe ou Alaija nadeh?”
Iy anya, “Jo Alaija bwe.”
Iri anya ja, “Sebwe ou ari propet nadeh?”
Iy anya, “Jo dah ari propet bwe.”
22 Iri anya, “Abo, ou tiye ki tahi, ou are lau handru? Ahi kameh ala hamon a kon ma kasehek kili tiri lau nane suni ahi ame dah. Ma ahi kasehek ou kili tiri.”
23 Jon asumon boho oro na sahou ta propet Aisaya,
“Jo i boho ndramak ari, iy aloh in kon lomale an,
‘Kalowosa san ta Laban ma kadik san kales lewan.’ ” Aisaya 40:3
24 Iri lau nane ala ta atou Jon badeh, iri Parasi‡ Iri Parasi badeh, iri lau ta atondrok kandriyen tiri Juwis. ra-on ado bolo iri ale. 25 Ano iri lelen Jon, “Buku ou anya, ou Mesaya bwe, ou Alaija bwe, ma ou ari propet bwe. Ya, i buku sah ja, ou anyu iri lau?”
26 Jon anya, “Jo inyu iri lau badeh, na gwa. Arile, ndramak ari ales udu hawe to kada-ah, ado tanan ado iy bwe. 27 Iy in hamon tek eme kameh jo bala winiyan ta talou malou ta molowa ku-i katin bwe.”
28 Iri lakou marakon mene asahan doh badeh, udu kon Betani, udu loboho kapa gwa Jodan mene Jon inyu iri lau udu aliy.
Nadu sipsip ta Kindrei
29 Udu len ari ja, Jon anyolom Jises edek ales eme hawen, ma iy aloh, “Kede-eh Nadu Sipsip ta Kindrei, iy le adeh andrei taha ame len ta kandriyen ndra-in badu kon munyak. 30 Iy le adeh mene jo asehek iy ewek taha. Jo asehek, ‘Iy ndramak in hamon tek eme kameh, tanan tan kameh udu bwele-en labai ja ta tanan tek. Tasah, iy ndra bwena labai, ano tine baradeu jo.’ 31 Jo ma bwena badeh, bala tanan iy bamwenen bwe, arile jo eme dah badeh ta inyu iri lau na gwa, ta iri lau badu Isra-el kameh katanan, iy are lau handru.”
32 Jon eme asehek eme lewan i buku doh, “Jo anyolom Malawin Mwasin badeh, atah udu kandrah i buku ban eme andri, ma erah udu bwele-en. 33 Jo bala tanan iy bala mwasin bwe, arile Kindrei leheyani iy i buku doh eme madak: Iy tiye jo kinyu iri lau na gwa. Idoh iy asehek eme tek, ‘Buku ou anyolom Malawin Mwasin atah eme andri, ma erah udu bwele-en, badeh, iy le ai. Iy kameh inyu iri lau na Malawin Ndrabun.’ ” 34 Eme Jon asehek, “Handru, jo ndranyolom, ma jo ndrasehek taha. Iy kede-eh Nadu Kindrei handru.”
Oro lau ta Jises
35 Ano eme len ari ja, Jon ales udu hawe uru lau tan la-uh. 36 Jon anyolom Jises edek eme, ma iy aloh, “Aha kanyolom, iy kede-eh Nadu Sipsip ta Kindrei.”
37 Uru lau ma la-uh nane anuhun boho Jon ano le badeh, uru ame ruwani Jon ma uru an hamon ta Jises. 38 Mada Jises anya keme hamon badeh, iy anyolom lau la-uh adek an hamon tan. Iy eme ndremenyani uru, “Ah aso-ok sah handru?”
Uru ame asehek ili tan, “Ndramak ta leheya, ou ado heh handru?”
39 Jises tiye turu, “Ah kame kanyolom.”
Ndra beyeh ai, uru ame ala hawen anyolom ndrahunen, ma uru ado hawen ado gwek.
40 Uru lau ma la-uh nane an hamon ta Jises badeh, ndranuhun Jon ndrasehek nyala Jises. Nyara iy ari Enduru, iy nadu tine Saimon Pita. 41 Ano le badeh, Enduru edek ili asilah nadu tinen Saimon. Iy eme ndruni iy ma iy tiye i tan, “Aru badeh ndrandruni Mesaya.” (Iy i buku le Krais.) 42 Enduru andrei nadu tinen Saimon, uru ala hawe Jises.
Jises anyolom iy le badeh, ma iy anya, “Ou Saimon nadu Jon, neh? Nyaram kameh Sepas” (Boho kon tiri Aramek aloh Sepas. Boho kon tiri Grik aloh Pita. Moso boho kon ma la-uh doh badeh, Bek).
Jises aloh Pilip uru Nataniyel
43 Ano len ari ja, Jises anya kedek kili kon ari iri aloh Galili. Iy ili ndruni ndramak ari nyaran Pilip. Jises eme tiye i tan, “Ou ame an hamon tek.”
44 Pilip i buku le Enduru uru Pita. Oro ma taloh badeh, badu kon tinan ari iri aloh Betsaida. 45 Pilip ili ja ndruni Nataniyel. Iy eme asehek i tan anya, “Aso badeh, ndrandruni ndramak mene Moses hawe iri propet arikiy udu bolo kandriyen malen. Iy Jises badu Nasaret, nadu Josep.”
46 Nataniyel ndremenya, “Saba lakou mwasin kameh asahan Nasaret?” Eme Pilip asumon bohon anya, “Ou ame, anyolom kudu madam amwenen.”
47 Jises anyolom Nataniyel edek ales eme hawen. Iy eme asehek, “Iy ndramak eme dah badeh, iy ndramak ari handru badu Isra-el, iy tanan wendreya bwe!”
48 Nataniyel lelen iy, “Ou atanam jo i buku sah?”
Jises eme asehek i tan i buku doh, “Jo anyolom ou badeh, manyah ado bahandra kei ra-ei iri aloh pik. Ano Pilip ewek aloh ou.”
49 Ano Nataniyel asehek sahou i tan ja, “Ndramak ta Leheya, ou kede-eh Nadu Kindrei, ma ou kabin badu Isra-el.”
50 Jises anya, “Ou atehei budon tam eme tek, tasah jo nane asehek tam, jo anyolom ou ado bahandra kei pik? Idah kameh ou anyolom lakou laba tinan labai ja.”
51 Jises tiye i toro, “Jo tiye tado handru, ado kameh anyolom kandrah asak, ma iri angelo ta Kindrei kameh atah ala loken, ano atah ame andri bwele-e Nadu Ndramak Awas.”
Jises amekes iri kalem tinan, i buku kalem ta leheya nyaran hawe boto-on tan
(Kalan 2–4)
*1:17: Kandriyen malen - boho iri jam aloh Lo. Batanau ma ronoh udu bolo kandriyen malen mene Moses torowenei udu bolo buk ma limeh doh: Jenesis, Eksodus, Lebitikus, Namba ma Dutoronomi.
†1:20: Boho iri Grik iri aloh Krais. Boho iri Hiburu iri aloh Mesaya. Moso boho kon ma la-uh i le randrah: Ndramak Kindrei atehei iy eme ta asahan kabin ma ta aseben iri lau tan marakon ame hamon.
‡1:24: Iri Parasi badeh, iri lau ta atondrok kandriyen tiri Juwis.