1 Udu rasan ja badeh, Laban asehek sahou ili ta Jona. Laban anya, 2 “Ou suri ou, ou adek ala bolo kon tinan tiri Ninibe. Sahou jo ndrasehek tam mene badeh, jo aso-ok ou ala tininiy kili tiri badih ma mwan badu bolo kon tinan Ninibe.”

3 Jona badeh in le hamon ta boho Laban. Eme ma iy iu ili Ninibe. Ninibe badeh, kon laba tinan labai. Buku ndramak anya kedek kudu bilisiu kili bilisiu badeh, winiya len taloh. 4 Jona edek ili bolo kon tinan Ninibe. Len ari ma buruwen badeh, iy edek le ai. Iy ili isos alih le badeh, iy asehek i tiri lau ai. Iy anya, “Buku len ma hanoh ano badeh, kon Ninibe kameh bohon ili andri.”

5 Eme badeh iri lau mwan ma badih badu kon Ninibe badeh anuhun sahou ta Kindrei udu boho Jona. Iri ame atehei budon tiri marakon i le ta Kindrei. Iri anya, “Taha kabeles taha ta nyamon. Taha lau bwele-en ma iri lau ado baha taha badeh, kasin awin ta tikisiy, ta leheya tikisiy tataha.” Iri ame bwidiy i buku iri lau tinan tiri tiye.

6 Sahou ili asahan le ta Kabin tiri Ninibe le badeh, iy suriy iy eme len ta koyeu tan. Iy asiniy awin tan mwasin iu, iy eme asiniy awin ndra-in ta tikisiy ili la-un. Iy ili manyah udu bolo koloweh, ta leheya tikisiy tan. 7 Iy eme tiye sahou boto-on labai ili bolo kon tinan Ninibe i buku doh: “Jo Kabin ma oro lau tek, aso aso-ok aha lau mwan ma badih kabeles aha ta nyamon. Aha mwan ma badih, iri bulumakau, iri sipsip, taha badeh saimon nyamon ma sa-un gwa. 8 Taha marakon ma iri katin haka tataha badeh, kadeu awin ndra-in ta tikisiy kili bwele-e taha. Ma taha kaden boto-on kili ta Kindrei, ta kandriyen ndra-in taha amwekes, ma taha kamaniy iri kandriyen ndra-in ki-iu. Taha katehei budon kili ta Kindrei le ari. 9 Buku taha ka-en hamon tiri budon marakon don eh, sebwe Kindrei kameh kamaniy budon ta losen, ma taha winiya bamak bwe.”

10 Kindrei eme anyolom iri, iri maniy kandriyen ndra-in tiri nane iri amwekes, eme ma iy tikisiy iri, ma iy bamwekes maha-an bala tiri bwe, i buku ma bwena iy anya kamwekes.