1 Ano iri lau ta akohok luk*Iri lau ta akohok luk ta takis tiri lau, arile iri ale ta bahana luk tiri lau. I buku none iri kandrei ronoh, idah kameh, iri adeu ronoh ja i bohon, kameh i lunoh. Ronoh doh kamen eh, i bolo mine oro ai. ta takis, hawe iri lau ta amekes karei ma lomondra ndra-in ame awudi Jises, ta anuhun sahou tan. 2 Eme ya iri Parasi hawe iri lau ta leheya kandriyen tiri Juwis badeh, nunu-uh anya, “Iy ndramak kede-eh, aseken iri lau ta karei ma lomondra ndra-in hawe aimon nyamon hawe iri.”

3 Ano Jises tiye sahou sokek doh i toro, 4 “Ya, i buku none ari tado sipsip tan ma rinek (100) udu aliy, ya buku none ari sipsip tan kamai; sebwe iy winiyan bala batakaleh bwe nadeh? Neh? Bwe labai. Iy kameh ruwani oro sipsip tan ma ndro ronoh ndro ari (99) nane ado lobwidiu are gwek. Ya idah kameh, iy ili takaleh ari nane amai dah, iy takaleh, takaleh ndra iy takalahei iy labai. 5-6 Ya, i buku none iy katakalahei iy, idah kameh, iy sekesek handru ma bwese-ei iy kameh udu kasen ma uru au a kon. Ano kameh, iy luhi oro kawas tan hawe oro lau badu mirihik ta asiu tan ame anya, ‘Ado kame kasekesek hawek, ta sipsip tek mene amai, jo ndratakalahei iy ja.’ ” 7 Eme Jises anya, “Jo katiye tado kamwenen, idah kameh i le buku aliy; sekesek laba tinan labai kameh udu kandrah i buku none ari ndramak ta karei ma lomondra ndra-in katubuni ndrinen. Sakalawi oro lau ma ndro ronoh ndro ari (99) mene oro anya oro mwasin, arile oro batubuni ndrine oro bwe.

8 “Ya, i buku none ari badih badeh, tan luk ronoh bororoh udu aliy, ya ari kamai. Idah kameh, iy telemei sun ma andrei sisir, asir bolo asiu, asir asir, winiya le iy baratakalahei. 9 Ya, i buku none iy takalahei, idah kameh, iy tiye oro kawas tan hawe oro lau asiu toro udu mirihik tan kameh ame ma iy anya, ‘Jo ndratakalahei luk tek bororoh ari mene amai, ado kame kasekesek hawek.’ 10 Idah kameh, i le buku aliy; iri angelo badu kandrah kameh sekesek ado mada Kindrei i buku none, ari ndramak katubuni ndrinen.”

11 Eme Jises asehek ili le anya: “Ndramak ari badeh, nadun mwan ma la-uh udu aliy. 12 Eme iy bahan tiye i ta taman anya, ‘Tama ou atehei lakou tek keme ai.’ Eme tama uru apwai lakou tan mari badeh, i turu.

13 “Se luwen bwe, iy bahan eme tukumwi lakou tan mari ma sihinei i ta luk. Eme iy andrei luk ma iy iu ili kon munyak tinan ari. Eme iy sabarani luk tan badeh, i ta lakou laleyah. 14 Udu hamon ta luk tan mari anya kano, kon munyak doh badeh, nyamon bwe. Eme badeh, iy nyamon bwe. 15 Eme iy ili amekes lahou ta ndramak ari badu kon munyak doh, eme iy suni iy ili anyohan iri bou tan. 16 Iy badeh, abudon anya, ‘Jo kini ku-i ndrakeyam ala bou aimon kede-eh kameh, son tek iu ai.’ Arile, ari ndramak banyohan se nyamon bala nan bwe.

17 “Ano iy lomondra i hamon anya, ‘Jo kada-ah anya kimek ta son! Ya oro lau ta lahou ta tama badeh, aimon nyamon solo-an labai, ma nyamon badeh, erah. 18 Jo ki-iu ki hamon hawe tama, ya jo katiye tan ki buku doh: Jo badeh, amekes kandriyen ndra-in i ta Kindrei ma i tam. 19 Jo badeh, mwasin ta asahan nadum ja bwai; jo badeh, kasahan i buku none iri lau ta lahou tam.’ 20 Eme iy suri iy, ma edek iu ili hamon hawe taman. Arile, iy udu ndra len kahis le badeh, taman atou iy ma ndrinen eden tan. Eme taman sakaliye ili badeh, akabah i la-un ma tawi iy.

21 “Ano nadun tiye i tan anya, ‘Tama jo badeh, amekes kandriyen ndra-in i ta Kindrei ma i tam. Jo badeh, mwasin ta asahan nadum ja bwai.’

22 “Arile, taman tiye i ta lohowan tan anya, ‘Ou ala suwi andrei ari awin mwasin ha-un, keme kasini ki la-un. Katehei ring ki andra limen hawe kasini ku-i katin kili. 23 Kadai bulumakau kasen, ya to kamekes nyamon tan, ma kasekesek. 24 Tasah, jo anya, naduk dah mene ndramak, arile iy bamak bwe; iy mene amai, arile iy ndrasahan ja.’ Eme iri amekes nyiminye aliy.

25 “Ya nadu tinen bwele-en badeh, udu ndra lokei. Iy eme mirihik ta asiu badeh, iy anuhun ndran hawe lau ada mana. 26 Eme iy luhi lohowan ari eme, iy lelen iy, ‘Iri amekes sasah doh?’ 27 Eme lohowan anya, ‘Nadu tinem mene badeh, ndrame hamon ja. Ya eme tamam badeh, idi bulumakau kasen i ta aimon tan, tasah iy badeh, bamak bwe, iy ma mwasin le ndrame hamon ja.’

28 “Eme nadun bwele-en badeh, ibolosen, eme iy bwalen ta i bolon. Eme taman eme manan indrek iy, ta ki bolon. 29 Arile, iy tiye i ta taman anya, ‘Ou anyolom se! Na jaha ndra-au, ndra-au badeh, jo amekes lahou tam i buku none iri bonyo-ou, ya jo batebelese sese ta bohom bwe. Arile, ou badeh, batehei ari me kasen bame ya jo hawe iri kawas tek basekesek bwe. 30 Arile, nadum dah mene sabarani luk tam iu laleyah i tiri badih ta madasan, ya iy eme hamon ja badeh, ou adai bulumakau kasen i nan!’

31 “Eme taman anya, ‘Naduk, ou badeh, badu hawek ya lakou tek mari kameh i tam. 32 Arile, naduk, to badeh, kasekesek hawe kamekes nyiminyen, tasah aso anya iy mene ndramak, arile iy bamak bwe; iy mene amai, arile iy ndrasahan ja!’ ”