1 Na le len nane Jises ruwani asiu nane, ma iy ili manyah udu kapa gwa li Galili. 2 Iri lau solo-an atukum ta anuhun iy. Eme iy ili manyah in bolo ndron ra-ei in gwa, ya iri lau mari nane dah, ales an kapa gwa an amik ai. 3 Jises asehek sahou sokek solo-an i tiri.*Idoh badeh, i buku sahou taloh ai, badu bolo oro sahou lawe-en ma limeh nane Jises asehek udu bolo tarou ta Metiu. Sahou dah badeh, udu ta kalan 13:3-52, ma hawe iri sahou sokek solo-an ta kandriyen ta tondrok ta Kindrei. Iy asehek i buku doh, “Ado kanuhun! Ndramak ari ili sabara badu wit ili bolo bilin. 4 Iy akeh ili, badu wit ra-on taku in san, ya iri sirih ame aniy. 5 Ra-on taku in bwele-e bek, ndren solo-an mwe-en bwe, ma badu wit ateh suwi. 6 Arile, an eme loken ma iy anya boto-on, iy sulumwi wit nane, tasah kandron bala bolo munyak handru bwe, eme ma iy ame-er mara-ei ma imek ai. 7 Ya badu wit ra-on taku i bolo iri malou bobodon, ma malou bobodon nane ateh eme loken, ma tubuluhi wit nane ma iy bato-ou buwan bwai. 8 Arile, badu wit ra-on taku i bolo ndren mwasin, ma iy ato-ou buwan. Ra-on ato-ou rinek (100), ra-on ato-ou ndro hanoh (60), ra-on ato-ou tonoh (30). 9 Ou are lau ndranyem udu aliy, ou anuhun.”

10 Hamon ta aliy, oro lau ta Jises ame ndremenya i buku doh, “Tasah handru ou amekes sahou sokek ili tiri lau?”

11 Ma Jises asumon i buku doh, “Kindrei aseken ado lau tek katanan iri sahou mene aton ta nyala tondrok ta Kindrei. Arile iy baleheya bala tiri lau ra-on ja bwe. 12 Buku none ari ndramak tanan tan tinan udu aliy, iy kameh akohok tanan rasan ja i la-un. Arile, ndramak tanan tan sese le, idah kameh kuhiy mari iu. 13 Na kati budon le don adeh, jo amekes sahou sokek i tiri, tasah:

18 Jises asehek sahou ja i buku doh, “Ado kanuhun moson ta sahou sokek ta ndramak akeh buwa wit ili bolo bilin tan. 19 Iri lau rayah anuhun sahou mwasin nyala tondrok ta Kindrei, arile iri tanan katin handru bwe. Iri buku none le buwa wit taku ereu san, ya balik eme kuhi iu suwi handru sahou mwasin Kindrei tahiy ereu budon tiri. 20 Ya iri buwa wit taku in bwele-e bek, i buku le iri lau anuhun sahou, ya nawin bwe iri kuhiy ma iri sekesek ta aliy. 21 Arile buwa wit doh kandron aliy bwe, ya i bareu luwen bwe. Ya i buku none ndrine sen asahan deh bwe-em ndra-i asahan, tasah ta sahou ta Kindrei, ya idah kameh, suwi suwi iri taku. 22 Ya iri buwa wit taku ereu ndrokowa iri malou bobodon, idoh leheya iri lau ale anuhun sahou ta Kindrei, arile iri abudon boto-on ta lakou badu kon munyak. Ya iri abudon boto-on labai ta atukum iri luk, ma iri lakou ra-on ja. Ya idoh sokei sahou ta Kindrei eme ma bwidi iri bato-ou sali iri bwe. 23 Arile, iri buwa wit ale taku in munyak mwasin badeh, i buku le iri lau anuhun sahou ta Kindrei, ya iri tanan katin handru. Eme ya iri ato-ou sali iri, ra-on ato-ou rinek (100), ra-on ndro hanoh (60), ra-on tonoh (30).”

24 Jises asehek sahou sokek ari ja i toro. Iy asehek i buku doh, “Tondrok ta Kindrei i buku none le ndramak ari atah buwa wit mwasin le udu bilin tan. 25 Arile iri lau amadin, ndramak ta bahun i ta ndramak nane eme, ya iy tahi iri buwa bwidiu ndra-in ereu ndrokowa wit, ano iy ndra-au. 26 Hamon wit nane asahan hawe bwidiu ndra-in kone uru i le se. Eme ya wit anya kato-ou buwan, iri lau ta gok atou bwidiu ndra-in ereu ndrokowa wit. 27 Eme ma, iri lau ta gok ala hawe tama bilin, ma asehek tan, ‘Ndramak tinan, aso anya ou mene tahi le badu wit in bolo bilin tam. Buku sah handru ya bwidiu ndra-in doh ateh ale?’

28 “Ya tama bilin nane asehek i toro, ‘Ari ndramak ta bahun ndrabwidi kandriyen doh.’

Eme ya iri lau ta gok ndremenyani iy, ‘Ou aso-ok aso kala kasudi bwidiu ndra-in nane?’

29 “Arile iy anya, ‘Ndri-iy, kora-on ado asoh bwidiu ndra-in nane ado kasudi wit ale. 30 Mwasin, ado karuwani uru ma la-uh winiya le len ta akohok nyamon. Na len ta akohok nyamon jo katiye toro lau ta amekes gok doh: Ado katukumwi bwidiu ndra-in bwena, ya kasawei ki se ta asun i jih. Arile ado katukumwi iri wit keme bolo asiu ta nyamon tek.’ ”

31 Jises asehek sahou sokek ari ja i toro. Iy asehek i buku doh, “Tondrok ta Kindrei badeh, i buku buwa kei ari iri aloh mastet. Ndramak ari kuhi buwa mastet ya iy ili tahiy in bolo bilin tan. 32 Buwa mastet badeh, nadu bwisik handru. Arile buku none iy ateh eme tinan, iy kameh sakalawi ja iri buwa kei badu bolo bilin nane. Iy asahan buku ra-ei kei tinan, ya iri sirih atah ame amekes awi iri udu bada andran.”

33 Jises asehek sahou sokek ari ja. Iy anya, “Ado kanuhun! Tondrok ta Kindrei kameh asahan buku none yis. Ari badih kuhi yis nane ma iy tubuni i hawe rahak ndrom tinan palawa. Iy tubuni ili ili winiya palawa mara-ei apus eme loken.”

34 Iri sahou nane Jises amekes i tiri lau, iy amekes i sahou sokek le. Iy basehek ari sahou bame lewan bala tiri bwe. Iy asehek sahou sokek le. 35 Na kandriyen doh, Jises mesekei eme handru sahou randra propet ndratiye in bolo buk ndrabun. Iy tiye i buku doh,

36 Jises ruwani iri lau mari nane, ma iy i bolo asiu ra-em. Kala iy ili bolon, oro lau tan ame, ma asehek anya, “Aso aso-ok ou asehek keme taso moson ta sahou sokek ta bwidiu ndra-in ateh in bolo bilin.”

37 Eme Jises anya, “Abo, ndramak nane ta atah wit in bolo bilin badeh, jo dah, jo Nadu Ndramak Awas. 38 Ya bilin badeh, kon munyak dah. Buwa wit badeh, iri lau mwasin badu hawe Kindrei. Ya bwidiu ndra-in doh badeh, iri lau ndra-in badu hawe balik amwenen. 39 Iy lau ta bahun i ta Kindrei eme tahi buwa bwidiu na ben, idoh, balik. Ya len ta akohok nyamon kameh, leheya buku none munyak dah anya kano ai. Iri lau ta gok badeh, iri angelo ta Kindrei.

40 “Iri lau atukum iri bwidiu ndra-in nane ma asun i jih, i buku none le iri angelo kameh amekes kandriyen buku le aliy, buku none Kindrei anya kasun kon munyak dah. 41 Jo Nadu Ndramak Awas, jo kameh atehei oro angelo tek ame akeh iu iri lakou mari ereu mada Kindrei ale amekes budon ta lau andra-i, ma hawe iri lau ta amekes kandriyen ndra-in. 42 Ma oro kameh akahei iri ala bolo jih ale winiyan bamak bwe-en. In bolo jih doh kameh oro aden andra-i labai, ma oro asenyer lihi oro kameh ili ta isi tinan labai kameh oro akohok. 43 Arile, na len doh kameh, oro lau nane a-en hamon ta kandriyen ta tama oro Kindrei kameh ala bolo tondrok tan, ma lomada oro kameh anya buku an anya. Are lau iri anuhun sahou dah, iri kabudon kamwenen.”

44 Jises asehek sahou ja anya, “Tondrok ta Kindrei kameh asahan buku none le ko-on iri lau ra-on tone ereu bolo bilin. Ndramak ari eme a-eh ndren ma iy atou, ma iy tone ja. Iy sekesek labai, ya ili mada ba-en, ma iy atehei iri lakou tan mari i ba-en, ma iri lau sihinei iu. Ya iy ili sihinei bilin nane ko-on ereu bolon, tasah idah ko-on nane ndrala tan ma iy winiyan akohok.”

45 Jises asehek sahou ja, “Sahou sokek ari ja i buku doh: Tondrok ta Kindrei i buku none ndramak ari ta amekes ba-en, anya katakaleh sa-un mwasin. 46 Ya buku iy atou ari sa-un mwasin handru, eme ya iy ili atehei iri lakou tan mari i ta ba-en, ma iy ili sihinei sa-un mwasin nane. Tasah, iy aso-ok sa-un nane handru sakalawiy iri lakou tan mari.”

47 Jises asehek kundruh ili ja: “Sahou sokek ari ja i buku doh. Tondrok ta Kindrei i buku none le ari kubwin iri lau akahei ili bolo gwa li. Ya kubwin nane akohok iri ni buku liliy. 48 Ano kubwin irek, iri lau aluwi eme babi. Ya oro manyah ma atukum iri ni mwasin i bolo bwak. Arile iri ni ndra-in oro akeh iu. 49 Hamon, buku Kindrei anya kon munyak dah ano, idah kameh asahan tiri mwan ma badih ale. Oro angelo kameh ame akohok iri lau ndra-in ereu ndrokowa iri lau mwasin ale areu hamon ta Kindrei. 50 Ya oro kameh akahei iri lau ndra-in nane ala bolo jih ale winiyan bamak bwe-en. In bolo jih doh kameh oro aden ma asenyer lihi oro ta isi tinan labai oro atona.”

51 Ya Jises ndremenya oro i buku doh, “Sebwe ado tana ado kati sahou dah deh bwe?”

Ya oro asumon i buku doh, “Ehe, aso tanan.”

52 Eme ya Jises asehek i toro i buku doh, “Abo, jo asehek tado, are lau iy tanan ta batanau malen ta Moses, ma iy ndra-en baha tondrok ta Kindrei, iy kameh asahan buku none tama asiu ra-em tinan. Ma iy winiyan ili bolo asiu ya akohok iri lakou mwasin sowan tinan, ma tiyani iri lakou ha-un, ma hawe iri lakou malen eme lewan.”

53 Jises asehek iri sahou sokek nane ano, iy iu i len ta kon nane, 54 ya iy ili kati kon tan amwenen. Ya iy ili bolo asiu ta atukum tiri ma iy leheya sahou ta Kindrei i tiri. Iri anuhun sahou tan, ma mani iri atur, ma iri ndremenya, “Iy ndramak dah akohok tanan ereu heh? Ya are lau edeu boto-on i tan, ma iy amekes iri lahou tinan solo-an? 55 Taha tana taha, iy ndramak dah nadu ndramak ari ta atah asiu. Ya tinen Mariya, ma Jemis hawe Josep ma Saimon hawe Judas oro, nadu tinen. 56 Ya oro nadu tinen badih mari areu hawe taha kede-eh. Eme ya buku sah handru, ya iy amekes iri lakou doh?” 57 Oro asehek i buku doh, ma oro atehei kona oro i tan.

Arile, Jises asehek i toro, “Iri propet ta atiye boho Kindrei nyara iri tinan ereu kon mari. Arile ereu kati kon tan amwenen, ma ereu boho kamen tan amwenen iy asahan buku lau laleyah.”

58 Eme iy bamekes iri lahou tinan solo-an bareu kon dah bwe, tasah iri batehei budon tiri ba-en tan handru bwe.