1 “Tondrok ta Kindrei udu kandrah i buku le oro badih bihin ma ronoh. Ndramak ari anya ki tasou. Eme ma, iri badih bihin doh bwese-ei sun toro ta ala ndruni iy in san ma tiyani iy eme ta molak. 2 Oro limeh badeh bale oro bwe, ya oro limeh oro tanan labai. 3 Oro limeh bale oro bwe nane bwese-ei lam toro, oro bakohok ra-on ndrelekei ja bwe. 4 Oro limeh nane bale oro udu aliy, oro kuhi lam toro, ma oro kuhi ndrau ndrelekei ari ale. 5 Ndramak nane ta tasou bame suwi bwe, ya oro badih nane mada oro amadin, ya oro amadin.

6 “Na ndrukulu ben alih, iri anuhun ndramak ari aloh i buku doh, ‘Iy ndrame, ndramak ta tasou ndrame! Aha kame katou iy.’

7 “Eme oro badih ma ronoh nane amak, mine oro i ta sun toro, anya katelem ja. 8 Eme ya, oro limeh nane bale oro bwe, tiye toro limeh nane bale oro udu aliy, ‘Ado kanyohan aso sese ndrelekei tado, sun taso anya kamak ai.’

9 “Arile oro limeh nane bale oro udu aliy anya, ‘Sebwe winiya to bwe nadeh! Ado ka hamon kala kasih ra-on ja kewek tado.’

10 “Eme oro badih ma limeh nane adek au ala hamon ala asih toro ndrelekei, oro adek ala anya kasih le badeh, ndramak ta tasou nane asahan, ya oro limeh nane ndralowosani oro ma oro abe-en iy, oro au ala bolo asiu hawen, ma oro aimon nyamon ta tasou nane, ma iri sulu-i kou ihis.

11 “Luwen bwe oro badih limeh nane ame hamon aloh anya, ‘Laban, Laban, ou sulu-i kou, aso anya kawek asiu.’

12 “Arile iy asumon boho oro anya, ‘Jo tiye handru, jo tanan ado bwe oh!’

13 “Eme ya, ado kanyolom kamwenen, tasah ado tana ado bwe, saba len, ma saba mada an handru, kameh iy eme hamon ja.

14 “Tondrok ta Kindrei kameh i buku le ndramak ari anya kedek kili kon ari leheleh, ya iy luhi oro lohowan tan ya iy indrom luk tan ili toro ta oro katondrok. 15 Iy abudon kandriyen ta gok ma nyamu lohowan tan ari, ari. Eme ya, i ta iy ari, iy atehei lamalou (K5,000), i ta ari ja iy atehei lulou (K2,000), i ta ari ja iy atehei ralou (K1,000), ano iy akohok tekedek tan iu ili kon len. 16 Iy nane kuhi lamalou (K5,000), nawin bwe iy ili amekes ba-en na luk tan, eme ya iy kuhi lamalou (K5,000) ja ili hawen. 17 Ya iy nane kuhiy lulou (K2,000) mesekei buku aliy ale, ma iy kuhi lulou (K2,000) ja ili hawen tan nane. 18 Arile, iy ari nane kuhiy ralou (K1,000) le, ili ihi lek ili bolo ndren, ma iy tone luk ta tinan tan nane.

19 “Jaha solo-an iu ano tinan toro lohowan nane eme hamon, ma iy ndremenya oro ta luk tan mene iy atehei ili mine oro. 20 Ndramak nane kuhi lamalou (K5,000) eme madan ma iy anya, ‘Tinan tek, ou mene atehei lamalou (K5,000) eme tek. Jo ili ja mesekei lamalou (K5,000) ja ndrala hawen.’

21 “Tinan tan anya, ‘Lohowan tek, ou ndramak mwasin, ou ndranyowo-ei lakou nadu bwisik, idah kameh jo mesekei ou atondrok lakou tinan; ou ala bolo kon tek ta sekesek.’

22 “Ya iy ndramak nane kuhi lulou (K2,000) eme madan ma iy anya, ‘Tinan tek, ou atehei lulou (K2,000) eme minek, jo ndramesekei lulou (K2,000) ja ndrala hawen.’

23 “Tinan tan tiye tan, ‘Ou ndramak mwasin; Ou ndranyowo-ei lakou nadu bwisik, idah kameh jo mesekei ou atondrok lakou tinan, ou ala bolo kon tek ta sekesek.’

24 “Iy ndramak nane kuhi ralou (K1,000) le eme bwena ma iy anya, ‘Tinan tek, jo tanan ou badeh, ndramak ta losen. Ou akohok lakou laleyah ma akohok lakou badu bwisi limem bwe. 25 Eme ya, jo inoh, ma jo ili tone luk tek nane ili bolo ndren. Idoh luk ralou (K1,000) tam kewek hamon.’

26 “Arile tinan tan anya, ‘Ou ndramak ndra-in ma ou lau ta awoyah! Ou tanam jo kameh akohok lakou jo batah bwe, ma jo kameh atukum nyamon bolo kon mari ale jo bakeh badu nyamon bala aliy bwe. 27 Tasah handru ou mene batehei luk tek bala mine iri lau ta amekes luk asahan solo-an bwe? Ya, buku none jo asahan, jo kameh akohok luk tek ma saba lakou ja badu hawen. 28 Ado kakuhi luk ralou (K1,000) ereu minen keme len, ma katehei kili mine iy lau tan nane akohok lamalou (K5,000) i bwele-e lamalou (K5,000) mene udu minen ta atondrok. 29 Tasah, i ta ndramak ari, ari tan lakou udu aliy, idah kameh iy akohok solo-an ja ili la-un. Arile, ndramak tan lakou bwe, ya sese le iy tawiy, idah kameh kuhi mari ano iu. 30 Ya, ta lohowan ndra-in nane, ado kakahei iy kili bolo kon lulik. Kon doh iri kameh aden ma asenyer lihi iri.’ ”

31 Jises asehek sahou ili ja anya, “Na len Nadu Ndramak Awas eme ma lomadan, iri angelo tan ale ereu hawen, iy kameh manyah ereu koyeu tan lomadan handru. 32 Ya, iri lau mari badu munyak kameh ame atukum areu madan, ya iy kameh apou iri, ari i len, ari i len, buku none iri lau ta atondrok lebelei iri sipsip hawe me. 33 Ma iy kameh atehei iri sipsip ala minen salin, ma iri me kameh ala minen kamweu.

34 “Ya kabin kameh tiye toro lau areu minen salin anya, ‘Ado kame, tama ndranyosowani ado. Ado kame kakohok ndrahune ado, tama ndralowosaniy kala munyak dah ma ha-un kahis le. 35 Tasah, bwena jo imek son, ou adeu nek nyamon, balek amar ou atehei wa-ik gwa, jo lau badu leheleh ou luhi jo ili asiu. 36 Jo kolau bwe, ou atehei kolau ra-ei eme jo taniy, jo ibo sik ou ame tondrokei jo, jo in bolo kou, ou ame anyolom jo.’

37 “Ya iri lau mwasin kameh asumon iy anya, ‘Laban, na saba len ahi atou ou amak son, ya aso nyohonei ou; ya, na saba len balem amar ya aso atehei wa-im gwa? 38 Na saba len aso atou ou lau badu leheleh, ya aso luhi ou ame asiu; ya, ou kolau ta taliye bwe, ya aso atehei kolau ra-ei ewek ya ou taniy? 39 Ya na saba len ou abo sik, ya, ou areu bolo kou, ya aso awek anyolom ou?’

40 “Ya kabin kameh asumon i buku doh, ‘Handru, jo tiye tado, buku none ou ndrabwidiy ndrala ta ari nadu tinek laleyah kede-eh, ou ndrabwidiy ndrame tek.’

41 “Ya iy kameh tiye toro lau areu minen kamweu i buku doh, ‘Ado ka-au ka len! Lakou ndra-in udu la-u ado. Ado kala bolo jih, tama ndralowosaniy ta balik hawe oro angelo tan. 42 Tasah, jo imek son ado banyohan jo nyamon bwe, balek asamar ado badeu wa-ik gwa bwe. 43 Jo lau badu leheleh ado baluhi jo bawek asiu bwe, jo kolau ta taliye bwe, ado badeu kolau bame tek ta taliye bwe, jo ibo sik ma jo in bolo kou ado bame banyolom jo bwe.’

44 “Oro kameh asumon i buku doh, ‘Laban na kahis aso atou ou amak son, deh, balem amar, deh, ou lau badu leheleh, deh, ou kolau ta taliye bwe, deh, ou abo sik, deh, ou a-en bolo kou, ya aso banyohan ma bawek batou ou bwe?’

45 “Iy kameh asumon i buku doh, ‘Handru jo tiye tado, buku none ou bamekes bala ta ari ndramak laleyah kede-eh bwe, ou bamekes bame tek bwe le.’

46 “Ya oro kameh au ala bolo kon ndra-in, arile iri lau mwasin kameh au ala bolo kon mwasin.”