La-ukei ta Pol atorou ili tiri lau badu kon
PILIPAI
Sahou Tanan
Pol bwena mene apou bolo ndras tinan ma mwena handru ili asahan loboho Yurop, iy ili atiye sahou mwasin ili kon Pilipai udu loboho kon tinan Masadoniya (ou anyolom udu bolo buk ta Aposel 16:8-15). Udu, iy iu ili kon tinan rakon ja ma iri tawi iy, atehei iy ili bolo asiu lulik. Na bolo len iy udu bolo asiu lulik nane doh, iy anuhun sahou tiri lau rayah, anya kala kasokolowa budon tiri lau ado Pilipai. Arile, taha anyolom Pol atorou la-ukei dah ili tiri Pilipai, taha banyolom iri lakou doh babwidi Pol batikisiy bwe. Iy atehei budon tan mara-ei handru in le ta Jises, eme ma iy sekesek ma manyah mwasin.
Bwena badeh, Pol iy tan ari lakou buku luk bwe-en, ma iri Pilipai badeh, adeu luk ili tan ta aseben iy. Eme ma la-ukei dah Pol edeu wurah ili tiri lau badu Pilipai, tiri lakou nane iri amekes doh. Ma iy ale anya kasehek sahou boto-on ta katadau budon tiri, kora-on iri kabudon boto-on labai ta Pol in bolo asiu lulik, ma iri katikisiy tinan labai.
Pol tiye tiri ta ndramas laba tinan ta Kindrei mene edeu i tiri, koha iri ha-un doh iri akohok ta Jises Krais. Iy tiye tiri i buku doh, iri badeh, bakohok ba-en hamon ta batanau tiri Juwis bwe. Iri badeh, akohok i san ta budon tiri mara-ei in le ta Jises. Pol anya iri Pilipai badeh, kakohok iri kandriyen ta Krais. Krais badeh, Kindrei i buku taman handru, arile iy batawi budon ta iy Kindrei bwe, ma iy ale ba-en hamon ta seken tan amwenen bwe. Iy badeh, atehei iy amwenen iu ili andri labai, ma iy i san ta lohowan laleyah ma amekes gok Kindrei nane edeu i tan. Pol asehek i buku doh, iri lau ahis handru hawe Krais, iri badeh, akohok tanan ta Kindrei, ma iri sekesek tinan labai.
Buku taha anyolom bolo la-ukei dah, taha atanan amwenen, buku Pol badeh, aso-ok iri lau ta Kindrei are kon tinan Pilipai, tinan labai.
Iri Sahou Tinan
Sahou sekesek ma salom (1:1-11)
Krais badeh, udu hawe Pol (1:12-30)
Taha badeh, kamekes mwasin kili tiri lau (2:1-18)
Sahou nyala kawas ta Pol oro (2:19-30)
Ndramak atehei budon tan in ta Kindrei iy badeh, kawas tan handru (3:1–4:9)
Pol edeu wurah i tiri Pilipai (4:10-20)
Pol tiye sahou sekesek tan i tiri Pilipai (4:21-23)
Iri lau badu Pilipai badeh, bwilibwik mwasin labai hawe Pol, ma Pol sekesek labai
1
(Kalan 1–4)
Aru ma la-uh badeh, lohowan ta Krais Jises, jo Pol hawe Timoti. Jo Pol atorou la-ukei dah badeh, hawe budon ta Timoti ale in se hawek, ta ewek tado lau mari, budon tado ihis in ta Krais Jises, ma ado lau ta Kindrei, ado kon Pilipai badeh. Ma hawe i toro lau ta batun ta Kindrei, ma hawe i tiri lau badu ndrokowa ado, ta aseben iri lau ta Kindrei.
Eme salom tek i ta tama taha Kindrei, ta tikisiy ma mondrei tan, hawe ta Laban Jises Krais kewek tado.
Pol edeu wurah i ta Kindrei
Ya eme na saba len le badeh, jo abudon ado, udu bolo salom tek i ta Kindrei. Ma udu bolo salom tek ale badeh, jo sekesek ewek tado mari, tasah ta madasan ta, ado badeh, sebenei jo laba tinan labai ta atiye sahou ta nyala Jises Krais. Ado amekes udu ndra bada katin, na len ado atehei budon handru tado i ta sahou mwasin ta nyala Jises Krais eme, eme taku na len dah. Tasah, jo badeh, tanan i mwasin handru ta aliy, ta Kindrei mene mesekei lahou udu bolo ado, ma ado a lau tan, winiya le barano na len ta Krais Jises kameh eme hamon ja.
Ado badeh, adek ma badu hawek handru en, ta atiye sahou mwasin ta nyala Jises Krais. Eme badeh, jo atona i buku doh, ewek tado ta tikisiy ta Kindrei weleyani eme tato mari. Ya jo udu bolo kou kada-ah ma hawe jo mene ales udu ta sahou badeh, jo batotoreh bwe, jo tiye sali sahou amwenen i toro. Ma jo tiye sahou boto-on i toro ta nyala Jises Krais badeh, wasai bwe, handru. Kindrei badeh, tanan jo badeh ndrinek eden handru ta udu hawe ado, idoh bala wasai bwe. I buku le Jises Krais aseken ado.
Eme ya salom tek, jo amekes i tado badeh, i buku doh: Ta kandriyen tado ta tikisiy, ma ta aseben badeh, kabadok kudu ndrine ado kili kili, ma idah kameh winiyan mesekei ado atana ado ta kandriyen mwasin badeh, i buku sah, ma hawe ado kameh winiyan atana ado kandriyen mwasin handru ta Kindrei i buku sah. 10 Ya eme san le doh kameh ado winiyan atana ado, ta saba kandriyen mwasin handru, i buku sah ta bolo kandriyen mari. Ma hawe lau kameh winiyan tiye ado ta asehek sahou handru, ma winiyan batiye ado ta aliy bwe, winiya le len ta Krais barasahan. 11 Ya, i buku none ado adah na kandriyen mwasin ta Kindrei, i san ta Jises Krais aseben ado, idah kameh iri lau anyolom ma iri atudun Kindrei ta aliy.
Pol udu bolo kou amekes lahou ta Kindrei abadok udu le gwek
12 Eme ya ado nadu tine i san ta Jises, jo anya ado ki tana ado ta maha doh, jo bwese badeh, basokei sahou mwasin ta nyala Jises bwe, arile na maha doh le badeh, mesekei sahou mwasin doh i tinan labai i bolo lau mari. 13 Ma, na bolo maha doh ale mesekei iri lau ta ndrokei ta kabin ma lau are kada-ah badeh, ndratanan ta jo udu bolo kou kada-ah, tasah jo lohowan ta Krais. 14 Tasah na jo eme udu bolo kou kada-ah badeh, mesekei nadu tine oro i san ta Laban abadok labai ta asehek sahou ta Kindrei, ma oro batotoreh ta aliy bwe.
15 Eme handru labai, oro lau rayah ta Kindrei atou jo asehek sahou ta nyala Krais, ma mada oro alikis jo. Eme oro anya kakohok ndrahunek kado bwena ja. Arile, oro lau rayah ndrine oro mwasin, oro atiye sahou ta nyala Krais le ai. 16 Eme ya oro nane ndrine oro mwasin ma oro aseken jo, tana oro, ta jo udu bolo kou kada-ah badeh, ta jo tiye sahou ta nyala Krais badeh, handru. 17 Arile, oro lau rayah nane mada oro alikis jo, atiye sahou nyala Krais ma oro anya kasakalau jo, arile budon toro badeh, atalei. Oro badeh, anya kamekes bohosak keme tek udu bolo kou kada-ah.
Pol babwerei kohan bwe
18 Arile, idoh babwereyaniy se jo bwe. Buku none oro amekes andra-i deh mwasin, badeh, jo sekesek le ta aliy. Tasah, oro ma lubuk atiye le sahou ta nyala Krais. Eme ya mesekei jo sekesek laba tinan labai ta aliy badeh, ili le ai. 19 Tasah jo tanan labai, na salom tado ma hawe na seben tado na boto-on ta Malawin Ndrabun ta Jises Krais badeh, winiyan sebenei jo hawe kohak udu mwasin. 20 Eme ya ndrinek tanan labai ta jo kameh winiyan banoh bwe, ma hawe bwilik kameh winiyan bama bwe na len ta sahou dah, ma hawe i buku len mari eme, jo kameh winiyan batotoreh ta asehek sahou bwe. I buku none, jo imek deh jo udu, arile masiye ma hawe atudun badeh, ki le ta Krais. 21 Eme ya, i buku none jo bamak bwe badeh, jo udu le hawe Krais atiye sahou tan, ya, i buku none jo kimek badeh, kameh jo akohok lakou mwasin labai ja. 22 I buku none jo bamak bwe, jo kameh amekes lahou ta Krais ilih le. Eme ya jo ndrandrondro, jo ki buku sah handru bah? 23 Tasah jo ndrado bolo ndrokowa budon la-uh ai: Jo badeh, aseken labai ta imek, ya jo kili kudu hawe Krais, tasah idoh kameh udu mwasin tek handru. 24 Arile, ta ado le badeh, mwasin labai ta jo kudu hawe ado ta aseben ado. 25 Eme ya jo ndratanan ndramwenen ta jo badeh, samak, jo kudu hawe ado sese op, ta amekes ado kabadok ta budon handru tado, ma ado kasekesek ta aliy. 26 Ya eme i san ta jo udu hawe ado badeh, ma eme ya sekesek tado i ta Krais Jises ki tinan handru.
Tekedek tado ki buku tekedek ta Jises
27 Ma laba tinan labai asah i buku doh: Tekedek tado badeh, ki buku tekedek ta Jises, i buku none sahou handru tan asehek. Eme ya, i buku none jo bawek bwe, deh jo anuhun nyala ado le, jo tanan ado badeh, ales boto-on ta budon randra le. Ma ado asahan ndramak ari le, ta budon tado ta aseben iri lau katehei budon handru tiri ki ta sahou handru ta Kindrei. 28 Ma hawe ado badeh, banoh oro lau ta andres ado ta budon handru tado in ta Jises, bwe. I buku ado banoh oro bwe, ado kameh i nyara kalem ta leheya, oro kameh taku. Ya, i buku none ado amekes doh, idah kameh Kindrei sebenei ado. 29 Eme ya Kindrei edeu budon ma la-uh doh ewek tado: Ado kales ta budon randrah le hawe Krais, ma hawe ado kales boto-on ta bwese isi ta lahou ta Krais. 30 Eme ya ado ale bwese isi i buku none ado mene ndranyolom, jo bwese isi mene udu Pilipai ma hawe ado ndranuhun jo bwese isi udu kon tinan Rom kada-ah.