1 Kabwai, sahou sese le doh. Ado nadu tine, ta budon handru badu hawek i san ta Kindrei, ado kasekesek, tasah ado ndrase hawe Laban. Eme ya jo baliliy ta atorou ewek tado bwe le, i buku le bwena mene jo atorou ewek, ta leheya ado, ta tiye nyala ado tiri lau ta leheya tanan ta wasai ado, i buku none iri kanone ado.

2 Arile, mada ado kaleu toro mwi ndra-in ado badeh. Oro mwi doh, oro ndramak ndra-in ta amekes kandriyen ndra-in. Oro ndramak doh an hamon ta kandriyen malen tiri Juwis ta asan ku-i iri mwan. Eme oro anya, i san doh kameh oro mwasin labai, ma oro anya, Kindrei kameh kasekesek oro. 3 Eme ya ado satehei budon tado handru sa-en toro, tasah oro asan ku-i oro, eme oro anya, i san doh kameh mesekei oro asahan lau ta Kindrei, arile bwe. Arile, taha lau ala atehei budon tataha handru i ta Kindrei bala san doh bwe, taha asahan lau ta Kindrei i san ta taha ruwani ta amekes kandriyen ndra-in. Ma taha atudun Kindrei i san ta Malawin Ndrabun, hawe taha ale sekesek i le ta Krais ta lakou mene iy mesekei eme tataha. Ya eme taha batehei boto-on ta taha bala ta kandriyen ta lahou badu bada taha amekes, bwe. Idoh badeh, ndrano ndra-au. 4 Ma jo ale, tek budon udu kada-ah ta tiye jo badeh, are handru ma hawe jo winiyan asehek jo badeh, in hamon ta kandriyen malen mari.

Eme ya, i buku none are lau anya iy badeh, in hamon ta kandriyen malen mari udu bwelee lau mari, badeh, jo ale tek budon solo-an labai udu kada-ah ja sakalawi toro. 5 Jo badeh, tubu badu Isra-el, badu boho kamen ta Benjamin, eme jo badeh, ndraye lau badu Hiburu amwenen; ma jo badeh, Parasi ari ai, jo in hamon ta kandriyen malen mari. Eme ya ben tek asahan ndru la-uh le mene, asan ku-ik ale. 6 Eme ya jo kede-eh anya ndra mwasin le ai, ta mada Kindrei. Eme jo edek ili eme amekes maha hawe isi i bada iri lau ta Krais. Ya jo kede-eh anya jo badeh, in hamon handru ta batanau mari tiri Juwis. Eme ya iri lau anya jo badeh, amekes lahou doh amwenen handru ta mada Kindrei.

7 Ya eme budon tek i buku aliy ale, jo anya lakou mari doh kameh winiyan mesekei jo asahan mwasin. Arile, na dah budon tek ndra randrah labai, i buku doh: Jo anyolom ma abudon ili badeh, lakou mari doh badeh, bala se ari lakou bwe. Tasah, lakou doh badeh, turuki jo bala tanan Krais bwe. 8 Ma laba tinan labai udu badeh, jo i tanan Krais Jises i Laban tek baden eh. Jo i tanan lakou mari doh bala se lakou bwe, iu laleyah. Eme na Jises le, jo kameh akahei iri lakou doh iu, tasah ari mwasin badu ta aliy winiyan basebenei jo bwe. Lakou doh ndra-au ma ndrano. Eme ya balek ki ta Jises le ma jo kihis hawen le. 9 Jo ihis hawe Krais doh badeh, bala san ta jo in hamon ta kandriyen malen tiri Juwis bwe, arile i san ta budon handru le i ta Krais badeh, jo asahan ndramak mwasin udu mada Kindrei anyolom jo na len jo atehei budon tek handru i ta Krais. 10 Eme ya jo anya kales kere bwele-e boto-on ta Krais mene imek, ano iy amak ja. Ma jo anya kabwese maha hawe isi ta nyaran i le buku none iy mene bwese. 11 I buku none jo imek, jo abudon Kindrei kameh winiyan mete-ei jo amak ja i le buku Krais mene.

12 Idoh ta tiye anya jo badeh, ndratanan Krais ndrala mwasin ai, bwe, ma jo ndramwenen labai ta mada Kindrei ai, bwe le. Arile, jo atadau jo boto-on ilih le kasahan mwasin tan. Eme ya jo abudon ta jo kasahan mwasin i buku Krais kasekesek ta aliy, i buku iy mene andrei jo. 13 Eme ya ado nadu tine badu hawek i san ta budon handru, jo batiye anya jo badeh, ndratawi lakou mwasin mari, bwe. Arile, lakou ari le jo tanan handru asah i buku doh: Jo atehei lakou mari mene ndra-au ndra konak, ya jo sakaliye ya madak ales iu le i bwena ta lakou ere kodo-oh. 14 Winiya le jo barasos, ya Kindrei le kameh baradeu lakou doh barame tek, na len iy aloh taha ala hawe Krais Jises.

15 Eme ya taha lau ala ndruniy ta budon doh badeh, taha kabudon lakou doh kudu mwasin. Ya, i buku none ado rayah abudon i randrah ja, ta lakou doh, kameh Kindrei winiyan leheyaniy aleu ewek tado. 16 Eme ya taha kamekes kandriyen mwasin mene le kili ki-in hamon ta seken ta Kindrei.

17 Eme ya ado nadu tine badu hawek i san ta budon handru, ado ka-en le hamon ta kandriyen tek, ma ado ale ka-en hamon ta kandriyen toro lau mene na len aso ado hawe ado. 18 I buku jo mene ndrasehek tado ya jo asehek tado ja, ma wa-i madak atekeu, ta ado ka-en hamon le ta kandriyen tek, tasah iri lau solo-an tekedek tiri ndrandra-i labai, ya tekedek tiri turuki iri basahan ta bada kei tondreh ta Krais i borobwar tiri bwe. 19 Eme ya sendrehendreh tiri badeh, Kindrei le kameh anuhun sahou tiri ma tiye iri ala bolo jih ta udu le buku doh. Tasah, Kindrei tiye tiri ta amekes kandriyen mwasin, arile bwai. Iri a-en hamon ta budon ndra-in ta ndrine iri ala amekes kandriyen ndra-in ta bwilima. Eme bwili iri sama ta aliy? Iri badeh, masiye iri ja ta aliy, i tiri ari ari. Budon tiri badeh, idih labai ta lakou badu munyak. 20 Arile, kon tataha handru badeh, bado kon munyak dah bwe; kon tataha handru badeh, udu bolo kandrah. Ya eme taha abe-en ndramak ta aseben taha ta kandriyen ndra-in mene, ala Laban Jises Krais udu doh kameh eme. 21 Iy eme kameh nyuruwini lakou mari na boto-on tan kameh udu baha tondrok tan. Ma idah kameh, iy tubuni bada taha badu munyak dah kameh i randrah labai, asahan ha-un i le buku badan, ta udu le buku doh.