REBELESEN
Ameh Kindrei leheya i ta Jon
Sahou Tanan
Jon torowenei buk ta Rebelesen dah badeh, na len iri lau abo gok ta amekes ndra-in ili tiri lau ta Kindrei, tasah iri lau ta Kindrei atehei budon tiri buku Jises le ari badeh, tinan tiri. Iri lau solo-an badu kon munyak tinan Rom batehei budon tiri anya, Jises tinan tiri, bwe; Sisa le badeh, tinan tiri. Eme ma iri atehei maha-an ma sisi-in solo-an i bwele-e iri lau ta Kindrei. Buk dah anya kamekes budon tiri lau ta Kindrei kabadok, iri sabwerei ta iri maha-an tinan i bwele-e iri.
Udu bolo buk dah sahou sokek solo-an labai ta iri lakou kameh asahan na len hamon. Sebwe iri lau ta Kindrei na bolo len doh mene ndrakohok ndramwenen bolo iri sahou sokek doh, arile iri lau nane tana iri Kindrei bwe, idoh iri bwai. Kati iri sahou sokek marakon i buku doh: Jises Krais badeh, iy Laban tinan labai. Na minen badeh, Kindrei kameh tihisi iri lau ta bahun mari, ma iy kameh tihisi balik ale. Ma len doh Jises ndrabwidi gok tan mara-ei ndrano, Kindrei kameh edeu ndramas ili tiri mwan ma badih ales boto-on kahis ma baruwani budon tiri bwe. Iri kameh are hawe Kindrei, ma iri kameh ari maha-an ja bwai, tasah Kindrei kameh bwidi lakou marakon asahan ha-un ja.
Iri Sahou Tinan
Jon asehek sahou ta Kindrei mari eme lewan (1:1-8)
Jon anyolom Krais (1:9-20)
Sahou ili tiri lau ta Kindrei badu kon ma ndro taloh (2:1–3:22)
Iri lau ta Kindrei atudun Kindrei udu kandrah (4:1-11)
Jon anyolom buk ari iri ndralukumwiy (5:1–6:17)
Lau mwan ma badih solo-an labai atudun Kindrei (7:1-17)
Ndrah bala-eu ma ndro taloh (8:1–11:19)
Jon anyolom badih ari ma hawe mwak laba tinan (12:1–13:18)
Iri mwan ma badih ta Nadu Sipsip ayah wari (14:1–15:8)
Bwekei ma ndro taloh losen ta Kindrei udu aliy (16:1-21)
Tine madasarah akohok sihinen ndra-in labai (17:1–20:10)
Sahou laba tinan asahan (20:11-15)
Kandrah ha-un ma hawe munyak ha-un asahan (21:1-8)
Jon anyolom Jerusalem ha-un (21:9–22:5)
Ndra mirihik ai ta Jises eme hamon ja (22:6-21)
Jises Krais badeh, suni sahou ili tiri mwan ma badih ta Kindrei badu kon ma ndro taloh
1
(Kalan 1–3)
1 Sahou ale jo atorou dah badeh, mene bame lewan bwe, arile Jises Krais le amwenen bwidiy asahan eme lewan. Kindrei le amwenen edeu i ta nadun Jises Krais, ta iy kaleheya taha lohowan tan, ta se luwen bwe, iri lakou mara-ei doh kameh asahan. Eme, Jises amekes sahou dah i san ta ameh, iy eme suni angelo hawe sahou tan eme tek, Jon, jo lohowan tan, ma iy asehek kati ameh mara-ei doh.
2 Eme ma jo torowenei iri sahou mara-ei ta Kindrei ma ta Jises Krais, ma iri lakou mara-ei nane jo anuhun ma anyolom.
3 Are lau anyolom sahou ta propet ta Kindrei dah, ta lakou anya kasahan hamon iri winiyan sekesek. Ma are lau ta Kindrei anuhun ma in hamon ta aliy, iri kameh winiyan sekesek handru. Tasah, len ndrasahan ndrame mirihik labai ta Kindrei kameh amekes iri lakou doh, iy mene ndratiye ta aliy.
Jon atorou sahou ili tiri lau ta Kindrei badu kon ma ndro taloh
4-5 Jo Jon, jo atorou sahou dah ewek taha mwan ma badih ta Kindrei badu kon ma ndro taloh udu bada kon tinan Esiya. Jo anya kedeu bada-an mwasin kewek taha ta nyara Kindrei. Na len dah iy udu hawe taha kada-ah, bwena, bwena iy udu aliy ale, ma hamon kameh iy eme hawe taha. Ma jo anya kedeu bada-an mwasin kewek taha ale ta nyara malawin mwasin ma ndro taloh,* Iri lau rayah ta tanan tubuni sahou dah i buku doh: Ma jo anya kedeu bada-an mwasin kewek taha ale ta nyara Malawin Mwasin, kandriyen tan ma ndro taloh, na len mara-ei iy manyah udu mirihik ta koyeu ta Kindrei. na len mara-ei oro manyah ado mirihik ta koyeu ta Kindrei. Ma jo anya kedeu bada-an kewek taha ale in ta nyara Jises Krais, iy ta atiye iri sahou marakon ta Kindrei.
Iy le ari badeh, amak udu bolo lek tan eme awas ja ma mwena handru ta lau mara-ei.
Ma iy asahan tinan ja tiri kabin marakon ado kon munyak.
Tikisiy ma manyah mwasin ta Kindrei uru nadun Jises hawe Malawin Ndrabun badeh, kudu hawe aha.
Jises Krais badeh, aso-ok taha mwan ma badih tinan labai,
ma ta ndrayen amou udu bada kei tondreh eme andri,
ma ndrasikinei kandriyen ndra-in tataha mara-ei ndra-au.
6 Ma iy bwidi taha asahan lau tan ma pris ta bolo tondrok tan,
ma taha ale asahan lohowan ta Kindrei, iy tama Jises.
Aha mwan ma badih mara-ei badeh, katudun nyaran ki tinan kili loken mara-ei,
ma iy kameh katondrok lakou mara-ei na boto-on tan ta udu le buku don ai. Handru!
7 Aha kanuhun! Jo atou iy anya keme badeh, udu bolo asi kandrah,
ma iri mwan ma badih mara-ei kameh anyolom iy na mada iri amwenen,
ma hawe iri mwan ma badih mara-ei badu Isra-el bwena mene orowei kabede Jises Krais na nyah
ma tatahi iy i bada kei tondreh.
Iri lau doh kameh anyolom iy ale.
Iri lau mwan ma badih mara-ei badu kon munyak kameh abudon solo-an labai ta aliy,
ma iri kameh a-um ade iri amwenen, ma aden i ndra-in labai.
Ma, iri lakou mara-ei doh kameh asahan. Handru.
8 Laban Kindrei, boto-on mara-ei udu tan, iy asehek i buku doh: “Jo ma mwena handru, ma jo in ndrobek mara-ei.” Na len dah iy udu hawe taha kada-ah, bwena handru labai iy udu aliy ale, ma hamon kameh iy eme hawe taha.
Jon anyolom Krais
9 Jo Jon, jo nadu tine aha lau ta Jises. Jo badu hawe aha ta bwese maha-an ma akohok sisi-in, jo udu bilisiu ta Kindrei hawe aha. Ma taha mara-ei ales are le se atadau taha ta bwese maha-an. Jo mene atiye sahou ta Kindrei, ma jo asehek ta jo amwenen badeh, atehei budon tek mara-ei in ta sahou handru ta nyala Jises. Eme ma iri lau tinan badu Rom badeh, tikahei jo, ma atehei jo ili bolo kou udu busu ari, iri aloh Patmos. 10 Na len ta Laban amwenen badeh, Malawin Ndrabun asahan eme bwele-ek ma tubuluhi jo, ma udu konak badeh, jo anuhun boho ndramak ari aloh boto-on labai i buku lau oloh ndrah. 11 Ma iy asehek i buku doh, “Lakou mara-ei, ou anyolom, ou torowenei kili bolo buk, ano ou atehei kili tiri mwan ma badih ado kon ma ndro taloh udu bolo Esiya. Ou atehei ari, ari kili tiri kon mara-ei doh: Epesus, Semena, Pegamum, Tayataira, Sadis, Piladelpiya ma Leyodisiya.”
12 Eme, jo tubuni jo ta anya kanyolom ndramak nane asehek sahou eme tek doh. Jo tubuni madak, ma jo anyolom ndru-u sun ma ndro taloh ales, ndru-u sun doh iri amekes na bek nyikilikin. 13 Ma jo atou ndramak ari, ya konen badeh,
“I buku le Nadu Ndramak Awas.” Daniyel 7:13
Iy ales udu ndrokowa ndru-u sun ma ndro taloh nane doh, ma iy asini awin belen mara-ei ili isos ndra bada katin andri, ma iy bawei balaban ari amekes na bek nyikilikin labai udu batalan. 14 Lami batun belen mara-ei, i buku asi kandrah, ma madan anya i buku jih. 15 Katin badeh, nyikilikin labai buku bek bras iri asun na jih taladan, ano nyasei i nyimirin mara-ei, ma nyaro bohon i buku nyaro goi laba tinan atohou. 16 Iy tawi ndrau ma ndro taloh badeh, udu minen salin, ma hawe raho samen iri aloh bainat, madan mala-uh badeh, lahen bwe, lahen bwe, udu bohon eme len. Ma madan anya labai i buku le an udu alih amwenen.
17 Jo anyolom le iy badeh, ma jo taku ili bada katin, jo ndramak ndra buku bada kei. Iy atehei minen salin eme bwele-ek ma iy asehek sahou eme tek i buku doh, “Ou sanoh! Jo ma bwena labai, ma jo ndrobek handru! 18 Jo badeh, ta ere le buku don ai! Jo mene imek, arile nadah jo ndrame awas ja ta ere le buku doh, winiya bamak ja bwai. Eme ma jo le ari badeh, boto-on tek winiyan mete-ei iri mwan ma badih ndramak bwena kameh ame awas ja.
19 Abo, ou atorou iri sahou ta lakou ou ndranyolom, ma ta iri lakou nane udu kada-ah, ma ta iri lakou kameh asahan hamon tiri lakou doh. 20 Ou ndranyolom ndrau ma ndro taloh udu minek salin ma hawe ndru-u sun ma ndro taloh ai. Idoh i buku sahou sokek le, arile moson ta aliy i buku doh: Ndrau ma ndro taloh doh i buku iri angelo atondrok lau ta Kindrei badu kon ma ndro taloh. Ya, ndru-u sun ma ndro taloh doh, i buku iri mwan ma badih ta Kindrei badu kon ma ndro taloh doh amwenen.”
*1:4-5: Iri lau rayah ta tanan tubuni sahou dah i buku doh: Ma jo anya kedeu bada-an mwasin kewek taha ale ta nyara Malawin Mwasin, kandriyen tan ma ndro taloh, na len mara-ei iy manyah udu mirihik ta koyeu ta Kindrei.