7
Iri 144,000 mwan ma badih badeh akohok kalem ta Kindrei
1 Iri lakou marakon doh ano iu, eme badeh, jo anyolom oro angelo ma hahuw ales are kabede kon munyak ma hahuw: Rai, Tolau, Kum, ma Jaha, ma oro tawi siyer ma hahuw udu bwele-e munyak doh ihis mara-ei, ma jor kameh winiyan boloh munyak hawe ndras, o ra-ei kei bwe. 2 Ano jo atou angelo ari ja edek udu loboho Rai eme loken. Ma iy tawi kalem ta Kindrei ma mulin, ma iy aloh boto-on labai ili toro angelo ma hahuw nane, Kindrei ndratehei boto-on ndra toro ta oro kabokoro-ei munyak ma ndras mara-ei. 3 Angelo nane aloh ili toro i buku doh, “Ado kareu op, ado sabotatahan ta bokoro-ei kon munyak ma ndras ma hawe kei mara-ei iu. Ahi badeh, anya kadeu kalem ta Kindrei tataha kili bwili iri lau ta amekes gok tan op. Ano badeh, ado barabokoro-ei lakou mara-ei bara-au ai.” 4 Angelo ari nane asehek sahou ano, eme ma iri atalan ma adeu kalem ili tiri mwan ma badih. Ano jo anuhun iri aloh kane iri mwan ma badih, iri sabe handru akohok kalem ta Kindrei. Iri atehei kalem ili tiri 144,000 mwan ma badih, badu bolo iri lau mara-ei badu Isra-el.
5 Eme ma, iri mwan ma badih ma ralou luwa (12,000) badu boho kamen ta Juda, iri akohok kalem,
ya ralou luwa (12,000) ja badu boho kamen ta Ruben,
ma ralou luwa (12,000) ja badu boho kamen ta Gat,
6 ma mwan ma badih ma ralou luwa (12,000) ja badu boho kamen ta Asa,
iri ralou luwa (12,000) ja badu boho kamen ta Naptali,
iri ralou luwa (12,000) badu boho kamen ta Manase,
7 ma iri mwan ma badih ma ralou luwa (12,000) ja badu boho kamen ta Simiyon.
Ya iri ralou luwa (12,000) badu boho kamen ta Libai,
iri ralou luwa (12,000) badu boho kamen ta Isakar,
8 ya iri ralou luwa (12,000) badu boho kamen ta Sebulun,
iri ralou luwa (12,000) badu boho kamen ta Josep,
ma iri ralou luwa (12,000) badu boho kamen ta Benjamin.
Iri lau mwan ma badih mara-ei doh badeh, akohok kalem ta Kindrei.
Iri mwan ma badih solo-an labai atudun Kindrei
9 Iri lakou mara-ei asahan madak nane doh amai iu, ano jo anyolom iri mwan ma badih, solo-an labai atukum are le se, ma ari mwan o badih winiyan bandromwei kane iri bwe. Iri lau doh badu kon munyak tinan mara-ei, ma iri badu boho kamen mari, ma bada iri badeh, randrah, randrah, ma iri badu boho kon rakon rakon badu munyak mara-ei. Iri lau mari doh badeh, ales are bwena ta koyeu ta kabin, ma mirihik ta Nadu Sipsip ta Kindrei. Iri nyosowani iri na awin lawe-en belen mara-ei, ma iri tawi la-u badou udu mine iri. 10 Iri mara-ei atehei boho iri i le se ma aloh i buku doh:
“Ahi mara-ei atudun nyara Kindrei tataha,
iy manyah udu bada koyeu ta kabin, hawe Nadu Sipsip tan.
Uru mala-uh badeh, andrei taha ndrame hamon,
ma taha ado mwasin labai mara-ei!”
11 Iri angelo mara-ei ales awudi koyeu ta kabin, ma iri batun hawe oro lakou ma mulin ma hahuw. Iri mara-ei atehei bwili ndru-u iri i andri udu mirihik ta koyeu ta kabin ma atudun Kindrei i loken mara-ei. 12 Ma iri mara-ei tiye i buku doh:
“Handru labai!
Taha mara-ei sekesek labai ta Kindrei tataha,
nyaran laba tinan labai!
Budon marakon mwasin udu tan le ari,
ma taha kadeu wurah kili tan,
ma katudun nyaran kili loken mara-ei.
Iy nyamun labai!
Iri boto-on mara-ei udu tan!
Iri lakou marakon nane doh badeh, tan le ari ta udu le buku doh!
Handru labai!”
Maha-an ma sisi-in tiri boho kamen mara-ei doh ndrano ai
13 Ano, ndramak batun ari eme ndremenya jo i buku doh, “Ou tanam iri lau marakon asini awin belen kede-eh, ma iri badu loboho heh handru?”
14 Jo eme tiye i tan i buku doh, “Ndramak tinan tek, ou amwenen badeh, tanam iri, jo bwe.”
Ma iy asehek eme tek i buku doh, “Iri lau mwan ma badih mara-ei kede-eh mene ado bolo maha-an hawe sisi-in ame len, ma iri amak udu mine iri lau ndra-in ta bahun. Iri badeh, atehei iri budon tiri mara-ei in ta Jises le ari, ma iri akohok boto-on ta ndraye Nadu Sipsip ta amekes bahun hawe kandriyen ndra-in. Idoh i buku iri sikine awin tiri na ndrayen, ma asahan belen mara-ei. 15 Eme ma,
iri mara-ei adeh, ales are mwena ta koyeu ta Kindrei kede-eh,
ma atudun iy na ben ma len marakon udu bolo asiu tan tinan.
Kindrei manyah udu bada koyeu tan,
ma iy atondrok iri marakon ta udu le buku doh.
16 Eme ma iri marakon kameh winiyan bameson ma bale iri winiyan bamar ta gwa ja bwai.
Ma an kameh winiyan basulumwi bada iri ja bwai.
Iri kameh ado mwasin labai mara-ei!
17 Tasah Nadu Sipsip ta Kindrei badeh, ales udu le alih ta ka-u koyeu ta kabin,
ma iy kameh atondrok iri marakon.
Iy kameh sirini iri ala mana munu kaloh, gwa asahan aliy eme len,
ma iri kameh a-un gwa kohan handru udu loboho doh.
Ma Kindrei kameh owei wa-i mada iri mara-ei iu,
ma iri kameh winiyan baden ja bwai.”