1 Ano angelo ari eme ja oloh ndrah tan. Idoh ili asahan limeh ai. Ma jo anyolom lakou i buku ndrau laba tinan ndrataku ndrame andri bwele-e kon munyak. Ma iri atehei lakou ari ta aseh kou ili ta ndrau doh ta aseh kou ta munu lek nane doh lawe-en, lawe-en labai iu ili ndraban, winiyan basilahei katin andri bwe. 2 Eme ma iy sihi kou ta lek nane doh, ma kasu-er asahan mana munu lek nane dah eme len i buku kasu-er ta jih laba tinan. Ma kasu-er udu mana munu lek nane doh eme loken, ili tubuluhi mada an, ma jor abakak eme bwidi kon munyak mara-ei asahan lulik. 3 Eme ma iri lakou i buku sabaye atah are bolo kasu-er nane doh ame andri ame kon munyak. Ma nyamu iri i buku le nyamu sabiyep badu kon munyak. 4 Ma iri badu kandrah tiye tiri i buku doh, “Aha sabwidi iri bwidiu sa ndra-i o, ma kei hawe iri lakou rayah ale ateh udu bwele-e munyak, idoh badeh, ndri-iy labai. Gok taha handru badeh, ta sokoso-ou iri mwan ma badih nane, kalem ta Kindrei bado bwili iri bwe. 5 Aha badeh, kadeu le sisi-in kili tiri, winiya bun ma limeh, arile aha sadi iri samak.” Ma hawe iri lakou nane doh atoh iri lau, ma lihi iri sisi-in tinan labai i buku sabiyep atoh lau, ma amekes sisi-in laba tinan labai ili tiri. 6 Udu bolo bun ma limeh nane doh badeh, iri kameh asilah imek, arile iri winiyan basilahei iy bwe, iri aso-ok ta amak, arile imek badeh, atobwak le tiri.

7 Iri sabaye badeh, kone iri i buku hos, iri lokowani iri ado le ta anya kamekes bahun; udu bwele-e batu iri, iri atehei lakou buku barak bek nyikilikin, ma mada iri badeh, i buku mada iri lau. 8 Ma lami batu iri badeh, i buku lami batu iri badih, ma lihi iri badeh, i buku lihi iri layon. 9 Iri tubuluhi batala iri na awin iri amekes na kapa o hayen, ma kurutuwe bani iri badeh, i buku nyaro iri hos ariu karis ili ta bahun. 10 Kiwi iri badeh, udu aliy, i buku kiwi sabiyep ta atoh lau, ma boto-on tiri badeh, udu kiwi iri ta amekes sisi-in ili bada iri lau ta udu le buku doh, winiya bun ma limeh ano. 11 Kabin tiri udu aliy ta atondrok iri badeh, angelo ari udu mwena ta mana munu lek nane doh. Ili boho iri Hiburu badeh, iri aloh nyaran Abadon. Ya boho iri Grik badeh, iri aloh iy Apoliyon. Moson ta aliy i buku, “Ndramak ta bokoro-ei iri lakou mara-ei ano iu.”

12 Maha-an mara-ei laba tinan ma mwena doh badeh, ndrano ai. Arile, aha kanuhun kamwenen! Maha-an ma la-uh laba tinan badeh, kahis le, idah kameh asahan hamon.

13 Maha-an doh ano badeh, eme angelo ari ja eme len oloh ndrah tan. Idoh asahan ili onoh ai. Eme ma jo anuhun boho ndramak ari udu bolo ndrokowa kasoh ma hahuw nane ales udu ka-u mada koto-ok nyikilikin labai udu mada Kindrei. 14 Boho ndramak nane asehek sahou ili ta angelo nane tawi ndrah tan i buku doh, “Ou tolowei oro angelo ma hahuw badeh, are bolo asiu lulik udu bolo gwa tinan Yupretis, kame manan ma ka-au laleyah.” 15 Oro angelo doh badeh, ndralowosani oro ndra bwena ado le ai, ta atondrok le jaha, bun, len, ma awa amwenen ta amekes gok nane doh. Iy eme tolowei oro angelo ma hahuw nane ame len, oro kameh tukumwi lau mwan ma badih mara-ei badu kon munyak ki tulukum, ano adai iri rakum ma buruwen ano au. 16 Iri ame tiye tek ta kane iri lau nane manyah ado bwele-e iri hos ta amekes bahun, i buku 200 miliyon (200,000,000), solo-an labai, ou winiyan bandromwei bwe. 17 Ma udu bolo ameh tek doh badeh, jo anyolom iri hos ma iri lau manyah ado bwele-e iri. Iri tubuluhi batala iri na awin iri amekes na kapa hawe hayen, ma tariye awin tiri doh badeh, saraman mara-ei, nyarawin mara-ei, ma nyokowan mara-ei i buku solpa. Batu iri hos marakon doh badeh, i buku batu iri layon, ma jo anyolom jih ma kasu-er hawe solpa andrakak ma atas udu boho iri eme len. 18 Eme ma bwidi lau badu kon munyak ranah ma buruwen amak na lakou nane doh udu boho iri hos eme len. Idoh, buku iri lau ma tuluwi (3,000) are aliy, jih ma kasu-er hawe solpa andrakak badeh, bwidi iri lau ma rawa (1,000) amak ano au. 19 Boto-on tiri hos mara-ei nane doh badeh, udu boho iri ma kiwi iri. Kiwi iri badeh, i buku mwak, batun udu aliy ta atoh iri lau ma amekes sisi-in i bada iri.

20 Iri lau mwan ma badih rayah ma buruwen bamak ta lakou ndra-in nane bwe, iri ale badeh, batubuni ndrine iri bwe, ma batehei kona iri bala tiri lakou, iri nane amekes na mine iri amwenen bwe le. Ya, iri ale baruwani kandriyen ta atudun malawin ndra-in bwe, ma hawe iri kindrei ta wasai, iri amekes na bek nyikilikin, ma silba hawe bras, ma bek hawe kei. Iri lakou marakon doh badeh, winiyan banuhun sahou bwe, iri banyolom kon bwe, ma iri winiyan badek bwe. 21 Iri lau mwan ma badih doh badeh, mene adi iri mwan ma badih rayah, ma iri amekes nyam balahak, ma iri a-en hamon tiri kandriyen ta karei, ma bahana lakou tiri lau laleyah, arile iri batubuni ndrine iri, ma batehei kona iri bala tiri kandriyen mara-ei nane doh bwe.