La-ukei ta Pol atorou ili tiri lau badu kon
ROM
Sahou Tanan
Pol atorou la-ukei dah, tasah iy aso-ok labai ta anya kili kanyolom iri lau ta Kindrei are bolo kon tinan Rom. Iy aso-ok ta udu hawe oro sese, ma hamon ta aliy, iy ili atiye iri sahou mwasin ili kon tinan Spen. Ta bolo la-ukei dah, Pol tiye eme lewan handru ta iri sahou mwasin ta Krais, ma ta kandriyen ta tekedek tiri lau mwan ma badih an hamon ta Jises.
Ma bwena handru badeh, Pol aloh bada-an i tiri lau ta Kindrei badu Rom ma iy tiye i tiri i buku doh, iy badeh, asolom len mari ta ndremenya Kindrei ta aseben iri. Udu hamon ta aliy iy barasehek kati iri sahou ta la-ukei: “Na san ta budon handru le, taha winiyan asahan lau mwan ma badih mwasin ta mada Kindrei” (1:17). Pol tiye i buku doh: Iri lau mwan ma badih marakon, buku iri badu hawe iri Juwis, o, badu hawe iri lau rayah ja, iri lau mwan ma badih ta amekes kandriyen ndra-in. Eme ma Kindrei tikisi iri ma iy andrei iri ame hamon. Ndramak atehei budon tan mara-ei in ta Jises Krais, Kindrei kameh andrei iy eme hamon, ma iy kameh asahan kawas ta Kindrei ma nadu tine Jises Krais.
Buku Kindrei akohok ari ndramak eme hamon ja, ya kohan kameh asahan randrah ja, Kindrei kameh ere hawen, ma Malawin Mwasin ta Kindrei kameh idih bolo odan. Eme ma, kandriyen ndra-in ma imek, uru kameh nyamu uru ja bwe, ta atisih ma atondrok iy. Udu ta kalan 5-8 Pol asehek ta moso batanau ta Kindrei, ma ta boto-on ta Malawin Ndrabun ere bolo oda iri lau mwan ma badih atehei budon tiri in ta Jises.
Udu ta kalan 9:11 Pol asehek lakou maha-an ari laba tinan tan. Pol amwenen iy badu hawe iri Juwis, iri lau doh bwena mene Kindrei mene andrei iri i buku iri lau mwan ma badih tan amwenen. Arile, iri Juwis solo-an labai, mene atehei kona iri i ta Jises. Lau mwan ma badih solo-an rayah ja ame asahan lau ta Jises, arile iri Juwis ja bwe. Pol asehek i buku, idoh ndra-in tiri Juwis amwenen. Iri banyolom ta lakou laba tinan nane Kindrei anya kamekes tiri bwe. Arile, Pol abudon, hamon kameh iri lau mwan ma badih badu hawe iri Juwis kameh ame bolon hawe iri lau ta Jises.
Ano ta la-ukei dah, Pol asehek ta nyala kandriyen, iri lau ta Kindrei kameh ka-en hamon ta aliy. Iy asehek sahou solo-an ta kandriyen ta aso-ok labai iri lau rayah ja. Iy asehek ale ta kandriyen ta amekes gok ta Kindrei ma ta kandriyen ta are bahandra kabin o gabman, ma ta kandriyen ta aseben iri rayah ja.
Iri Sahou Tinan
Pol amekes gok ta atiye sahou mwasin (1:1-17)
Lau mari amekes kandriyen ndra-in ma atehei kona iri i ta Kindrei (1:18–3:20)
Kindrei aloh taha lau mwasin labai ta madan (3:21–4:25)
Kindrei atehei tataha lau tan kohan ha-un (5:1–8:39)
Pol tikisiy labai handru tiri lau badu Isra-el (9:1–11:36)
Taha katehei taha mara-ei kili ta Kindrei i buku salom (12:1–15:13)
Pol sekesek labai ta gok iy amekes (15:14–16:27)
Na san ta budon handru le kameh, taha winiyan asahan lau mwan ma badih mwasin labai ta mada Kindrei
1
(Kalan 1–4)
Jo Pol, jo badeh, lohowan ta Krais Jises. Jo ale aposel, Kindrei tiye jo, ma aloh jo eme ta atiye sahou tan mwasin. Sahou mwasin doh bwena mene iy tandrakan, ma atehei i kani iri propet, ma torowenei udu bolo tarou tan. Sahou mwasin doh badeh, ta nyala nadun, ya iy badeh, saren tiye iy asahan ta lundriye tubun Debit. Na len Kindrei mete-ei iy amak eme loken ja, Malawin Mwasin ta Kindrei leheya taha buku, Kindrei atehei nyosowan i la-un, ma hawe boto-on i tan ta atondrok lakou tan mari. Iy badeh, Laban Jises Krais. Na iy le badeh, Kindrei atehei lahou dah eme kani aso, ma iy atehei seben eme taso ale, eme ma aso asahan aposel i nyara Krais ta atiye sahou, hawe kaliu iri lau badu kon leheleh mari kanuhun sahou, ma katehei budon tiri handru ki ta Kindrei. Sahou doh badeh, ewek taha lau manyah ado Rom ale. Aha ndranuhun iri lau atiye sahou ta Kindrei ewek taha, ma Kindrei ndraluwi aha ndrame lau ta Jises Krais.
Eme ya, jo Pol amwenen atorou la-ukei dah badeh, ewek taha lau mwan ma badih mari badu Rom, ala mene Kindrei aseken aha labai, ma ndraluwi aha mari ndrasahan lau tan amwenen.
Ya eme ma, jo aso-ok tama taha Kindrei ma hawe Laban Jises Krais, katehei tikisiy ma mondrei tan kudu taha.
Pol anya kili kanyolom iri mwan ma badih badu Rom
Ma mwena handru jo edeu wurah i ta Kindrei tek i san ta Jises Krais ewek taha mari, tasah lau mari badu kon munyak asehek anya, aha badeh, ndratehei budon taha handru ndra-en ta Jises Krais. Aha ndranyolom ai, sahou mene jo asehek i taha badeh, handru, ya Kindrei badeh, tanan. Kindrei le doh badeh, jo atehei ndrinek mari i tan, ma atudun iy, ma jo edek ta atiye sahou mwasin ta nyala nadun. Ma Kindrei tanan, jo badeh, balek bamani aha bwe na len mari 10 udu bolo salom tek. Jo badeh, ndremenya Kindrei udu bolo salom ta iy kasihi san, ya jo kewek kanyolom aha.
11 Jo badeh, aseken labai ta anyolom aha, ma kasehek sahou ta nyosowa Malawin Ndrabun kewek taha, ma kamekes ndrine aha kabadok. 12 Ya eme jo asehek ta aliy ewek taha, ma eme tek ta aseben taha mari i le rasan. Ya aha kameh anyolom budon tek handru, idah kameh, amekes aha abadok, ma jo ale kameh anyolom budon handru taha ma amekes jo kabadok i le buku aliy. 13 Ya eme aha nadu tine, bale aha samani lakou doh: San solo-an solo-an jo lomondra ta anya kewek kanyolom aha, arile lakou badeh, mesekei ta jo sawek, eme eme taku dah. Jo badeh, anya kamekes lahou kudu bolo aha, ma kaseben aha kabadok ta budon handru taha ki ta Jises Krais, ma ka-en hamon ta san tan. I buku none jo mene amekes i tiri lau badu leheleh.
14 Jo anya kedeu saluwe lahou tiri lau mari, ki tiri lau badu Grik ma Grik bwe, ma hawe ki tiri lau ta tanan, ma ki tiri lau tana iri lakou bwe. 15 Ya eme ta katin le doh, jo aseken labai ta atiye sahou mwasin ta nyala Krais ki taha lau mari manyah ado Rom badeh.
Sahou mwasin ta Krais iy boto-on labai
16 Jo banoh ma bwilik bama ta sahou mwasin ta Krais bwe, tasah idoh badeh, boto-on ta Kindrei ta akohok are lau iri atehei budon tiri handru i ta sahou mwasin doh ame hamon. Sahou doh ma mwena i tiri Juwis, ano badeh, i tiri lau badu leheleh ale. 17 Sahou doh handru, tasah sahou mwasin leheyani kandriyen mwasin ta Kindrei eme lewan, ta iy aloh iri lau mwasin mara-ei ta madan i san ta budon handru le, udu ndra bada katin eme taku na len dah. I buku none tarou ta Kindrei tiye i buku doh,
“Are lau le atehei budon tan handru in ta Kindrei, Kindrei kameh aloh iy mwasin mara-ei ta madan, ma iy ndramak doh le winiyan akohok kohan ha-un ta udu le buku doh.” Habakuk 2:4
Losen ta Kindrei i la-u lau mari
18 Tasah, taha tanan Kindrei udu kandrah, iy leheyani losen tan eme lewan eme andri ili la-u iri lau ta tebelese, ma ta kandriyen ndra-in iri amekes. Ya eme na kandriyen tiri le doh, iri anya katisih sahou handru, ma sokei iri lau winiyan bala tanan Kindrei bwe. 19 Handru, losen ta Kindrei eme andri ili la-u iri, tasah iri kandriyen ma tanan mwasin ta Kindrei badeh, iri winiyan atanan ta aliy, tasah Kindrei ndraleheyaniy ndraleu ndrala mada iri. 20 Ya eme kabatana Kindrei mesekei munyak eme taku dah, iri lau anyolom iri lakou iy ndramesekei. Na iri lakou le doh, iri lau winiyan atanan kandriyen rayah ta Kindrei. Handru, iri kandriyen doh amai ta mada iri, arile iri winiyan atanan ta iy badeh, udu kede-eh handru, ma boto-on tan ta udu le buku doh. Eme ma, ta katin doh, iy mesekei iri lau winiyan bawasai anya iri tanan iy bwe.
21 Iri tanan Kindrei badeh, udu kede-eh, arile iri batudun ma bamasiye iy bwe, ma badeu wurah bala tan ta lakou mwasin iy amekes i tiri, bwe. Ya eme budon tiri badeh inyon; bolo iri mara-ei idih na lulik, ma iri bala tanan ndra-in ma mwasin udu heh bwe. 22 Eme iri anya iri lau ta budon, arile bwe, iri a lolo-ou le gwek. 23 Kindrei badeh, lomadan tinan labai ma iy badeh, winiyan bamak bwe, iy ta udu le buku doh. Arile, iri batudun iy ja bwai, iri ja atudun sukumada kei asehek i buku ndramak, ma hawe atudun iri sirih, iri katin haka hawe iri mwak. Iri lakou mara-ei doh kameh amak au.
24 Ya eme ta katin doh le, Kindrei ruwani minen iu tiri, ma iri amekes kandriyen ndra-in in hamon ta boto-on ta seken tiri. Eme ma iri amekes karei hawe iri ari, ari, ma bokoro-ei bada iri amwenen. 25 Eme iri sokolowa sahou handru ta Kindrei na wasai, iri batudun Kindrei handru ta amekes lakou mari bwai. Iri atudun le lakou Kindrei mene amekes. Arile, iy Kindrei le doh badeh, lau katudun iy. Handru!
26 Ya eme ta katin doh badeh, Kindrei ruwani minen iu tiri. Ma eme iri amekes karei hawe iri ari ari. Ma iri badih badeh, amadin iri le amwenen. 27 Ya eme i le buku aliy, iri lau mwan ruwani ta akohok udu iri, ya eme iri mwan amekes kandriyen ndra-in ta karei. Iri lau mwan badeh, amekes karei hawe iri ari ari amwenen. Eme Kindrei edeu maha-an i ta budon ma bolo oda iri, tasah iri amekes karei ndra-in labai i buku doh.
28 Ma laba tinan labai, iri batawi budon ta Kindrei mene leheya iri ta amekes bwe. Eme Kindrei ruwani iri ado ndrahun ta budon ndra-in tiri, ma kandriyen ndra-in iri samekes badeh, iri amekes ja. 29 Eme iri badeh, ndradah ta kandriyen ndra-in mari. Iri adah na kandriyen ta aseken lakou tiri rayah. Iri amekes budon ta amekes isi i tiri lau. Iri amekes madalakis i tiri lau, iri andra-i i la-u iri lau, ma adai iri lau amak. Iri sokolowa ta katehei budon tiri ki ta lakou handru bwe. Iri bahana sahou ndra-in asehek i tiri lau. Iri asehek sahou ta wasai tiri lau udu ndranye lau mari. 30 Iri bwale iri Kindrei ma iri bobose iri lau, ya iri anya iri le ai, ma hawe iri atudun nyara iri, ya iri amekes tanan ha-un ta amekes kandriyen ndra-in, ma iri tebelese boho tama iri hawe tine iri. 31 Iri badeh, ari budon mwasin bwe, ma iri ba-en hamon ta tandrakan nane iri tandrakan ta aliy bwe, ya iri baleheya kandriyen ta aseken ndramak ari ari bala lowan iri bwe, ma iri batehei kandriyen ta tikisiy bala tiri lau bwe. 32 Batanau ta Kindrei anya, buku iri lau ala bolo iri kandriyen ndra-in doh, iri kameh amak. Ya, iri tanan ta batanau mwasin doh, arile iri amekes kandriyen doh ili le anya mwasin, ki tiri lau ta ka bolon ale.