1 Taha ndratehei budon tataha ndra tan ma Kindrei ndraloh taha lau mwasin mara-ei ta madan. Eme ma Laban tataha Jises Krais bwidi ndrokowa Kindrei ma ndrokowa taha badeh, udu mwasin, ma iy bwidi ndrine taha kamunum kudu le hawe Kindrei. 2 Jises badeh, ndrasihi san ta taha lau mwan ma badih atehei budon in ta Kindrei, eme ma taha kameh winiyan ala bolo tikisiy tan, na idah taha areu aliy. Ma taha atondrok Kindrei ta akohok taha, idah kameh taha manyah ado lomadan tan mwasin ado kandrah. Ma idoh bwidi taha sekesek ta aliy. 3 Taha basekesek ta idoh le bwe. Taha winiya sekesek ta iri maha-an asahan tataha ale, tasah taha tanan, iri maha-an doh badeh aseben ta amekes ndrine taha abadok. 4 Buku ndrine taha abadok udu le buku doh, idah kameh kandriyen tataha mwasin winiyan sebenei taha, buku iri none anya kasahan. Ya, buku kandriyen tataha mwasin sebenei taha ala bolo iri none don eh, badeh, taha atondrok le Kindrei eme ta aseben taha. 5 Handru, taha atondrok Kindrei ta aseben taha. Taha winiyan babe-en laleyah bwe, winiyan bwe-en! Tasah, Kindrei ndratehei Malawin Ndrabun ndrame. Eme ma Malawin Ndrabun ndranyuhi kandriyen ta Kindrei ta aseken labai iri lau ndrame ndrine taha.

6 Na len amwenen ta taha nyamu taha ta aseben taha le bwe, Kindrei eme sani len ta Krais kameh winiyan imek ta akohok taha lau ta amekes kandriyen ndra-in ame hamon. 7 Handru labai, iy ari tataha winiyan bamak ta aseben ndramak ari, taha aloh iy ndramak mwasin ta mada taha, bwe. Arile, i buku taha anyolom ndramak ari kandriyen tan mwasin labai mara-ei, sebwe taha ari winiyan atehei iy imek ta aseben iy lau doh. 8 Arile, taha mene are ndra bolo iri kandriyen ndra-in kahis le badeh, Krais eme akohok kon tataha, ma iy imek ta aliy. Ta san doh, Kindrei leheyani iri tikisiy ma so-ok tan eme tataha badeh, tinan labai ja.

9 Handru labai! Ndraye Krais amou udu bada kei tondreh, ma ndrayen doh eme sikine taha mari ndra belen mara-ei, ya Kindrei aloh taha, lau mwan ma badih tan mwasin ta madan. Eme ma, idah taha atanan handru, i buku Krais kameh aseben taha tinan labai ja, ta teleya ndramas ndra-in nane doh, Kindrei kameh edeu ili tiri lau mwan ma badih ta amekes kandriyen ndra-in. 10 Bwena mene taha amekes bahun hawe Kindrei kahis le badeh, na le len doh Nadu Kindrei imek. Ta gok ta imek nane doh iy ndrabwidi kandriyen ta bahun mari udu ndrokowa Kindrei hawe taha, ma iy bwidi ndrine taha udu mwasin hawe Kindrei. Na dah, Nadu Kindrei, kohan handru ta udu le buku doh, winiyan bamak ja bwe. Eme ma, taha winiyan atanan handru, na koha nadun le doh, Kindrei kameh andrei taha ame hamon, ma iy kameh aseben taha tinan labai ja. 11 Ya lakou ari ja i buku doh: Kabin tataha Jises Krais, iy le ari bwidi ndrine taha asahan mwasin hawe Kindrei. Eme ma, ta gok tan nane doh, taha sekesek ta Kindrei handru.

12 Taha tanan, ndramak ari le bwidi kandriyen ndra-in, ya, ta kandriyen ndra-in doh le, kandriyen ndra-in mari asahan kon munyak. Ano ja, kandriyen ndra-in tiyani imek eme. Eme ma imek eme andrei lau marakon, tasah lau marakon amekes iri kandriyen ndra-in. 13 Kandriyen ndra-in udu kon munyak bwena labai, ano kandriyen malen ta Moses barasahan. Arile, kandriyen malen ta batanau basehek bwe le badeh, Kindrei babudon tiri kandriyen ndra-in ari, ari tiri lau amekes, bwe. 14 Arile, udu ndra bada len ta Adam eme asahan bada len ta Moses, imek badeh, ibo gok ta ilom lau marakon. Lau rayah bamekes kandriyen ndra-in bala le buku ta Adam amekes bwe, arile imek ilom iri lau i buku le doh ale. Adam badeh, i buku malawi le iy ndramak nane kameh asahan hamon.

15 Arile, kandriyen ndra-in ta Adam nane iy amekes, ma tikisiy ta Kindrei bala le randra bwe. Winiyan bwe-en! Kandriyen ndra-in ta ndramak ari le badeh, eme bwidiy, ma iri lau mwan ma badih solo-an amak. Arile, boto-on ta tikisiy ta Kindrei badeh, udu bwele-en labai ja ta boto-on ta imek, ma asahan solo-an labai ja ta iri mwan ma badih. Ta tikisiy ta ndramak ari le nyaran Jises Krais, Kindrei badeh, bwidi taha asahan lau mwan ma badih mwasin labai ta madan, ma idoh ndramas ari mwasin labai iy edeu eme tataha. 16 Ndramas ta Kindrei ma kandriyen ndra-in ale ta iy ndramak ari le nane, babwidi lakou bala le randra asahan tataha bwe. Winiyan bwe-en! Kandriyen ndra-in ari le ta iy ndramak nane bwidiy, ma Kindrei atehei lau mwan ma badih ala ta mada sahou, ma iy asehek i buku doh, “Iri marakon kandra-i ka-au mara-ei.” Arile, ndramas ta Kindrei i buku doh: Buku iri lau mwan ma badih amekes kandriyen ndra-in solo-an labai, Kindrei eme tikisi iri, iy eme aloh iri lau mwan ma badih mwasin labai ta madan. 17 Ndramak ari mene ta tebelese sahou, eme ma ta kandriyen ndra-in ta iy ndramak ari nane, eme imek asahan i buku kabin ma tihisi lau mara-ei. Arile, tikisiy ta Kindrei hawe ndramas tan, idoh le badeh, udu bwele-en labai ja ta boto-on ta imek, ma tinan labai ja ta lakou mara-ei. Eme ma, taha atanan, handru, ta lau mara-ei akohok tikisiy nane doh ta Kindrei, ma Kindrei aloh iri lau mwasin ta are madan, koha iri mara-ei kameh udu le buku doh, ma iri kameh asahan kabin, ta gok ta iy ndramak ari le nane nyaran Jises Krais.

18 Eme ma, taha kabudon kamwenen tiri sahou doh. Ndramak ari le bwena mene bwidi lakou ari ba-en hamon ta kandriyen ta batanau bwe, iy sakalawiy labai, eme ma, ta kandriyen ndra-in tan nane, Kindrei eme atehei taha lau mwan ma badih mara-ei ala ta mada sahou. I buku le, ndramak ari mene amekes lakou ari in hamon ta kandriyen mwasin labai, eme Kindrei anyolom ta idoh, ma iy eme aloh taha mara-ei lau mwasin labai ta madan, ma kohan handru udu tataha. 19 Ndramak ari le, iy tebelese boho Kindrei, eme ta kandriyen ta tebelese tan nane doh, eme bwidi lau mara-ei asahan lau mwan ma badih mara-ei ta amekes kandriyen ndra-in. I buku le, ndramak ari le, iy in hamon tiri sahou batanau, ta kandriyen tan le doh, lau mwan ma badih solo-an kameh winiya asahan lau mwan ma badih mwasin labai ta mada Kindrei.

20 Udu hamon, iri lau akohok kandriyen ta batanau, eme bwidi iri sakalawi iri kandriyen ta batanau ili labai ja. Iri lau mara-ei amekes kandriyen ndra-in solo-an labai, arile Kindrei badeh tikisi iri tinan labai ja. 21 Kandriyen ndra-in le badeh, bwidi imek asahan, eme ma, ta kandriyen ndra-in le doh, iy asahan i buku kabin. Arile, na idah ja, tikisiy ta Kindrei ndrasahan ndra buku kabin. Tasah, ta gok ta tinan tataha, Jises Krais le, Kindrei badeh, tikisi taha, ano iy aloh taha lau mwan ma badih mwasin labai ta madan, eme ma taha akohok kohan handru kameh ta udu le buku doh.