Pol ile malueng teltelnga ako i wat i a toko lemioongare nge ako o voth a Tesalonaika
1 Tesalonaika
Ritetong nge a 1 Tesalonaika
Pol i es a epee a Masedonia na i panongpol Tesalonaika angare nge Panongpolong Sivenga, na ile panongpolong aken i pavelpol toko lemioonga pelie a rem aken. Pol ia sagu rintet toko lemioongare ako o voth a rem a Tesalonaika, na i panes mun vothung vengvenga nge wop lemi ako i voth tomo nge or. (2:1-12) Aveto kerengaing aolonga i velpoltun toko lemioongare nge wop lemi aken, mako o ovulal a Pol ve aro i plosa ma i es, aro vene mo rinong aro i el i. (Pakeke 17:1-10) Mako Pol i es tel a Beria, lamako i es ol a Atens la. Ma i velpol a Atens, aveto rongan ilemi voth nge Tesalonaika angare, nge matheong aken o el i, (2:13-3:10) mako i pake a Timoti a or nge. (3:1-5) Panen tie lamo Pol i esu a Korin la, na Timoti i lo werer ma i ria Pol nge Tesalonaika angare ole asaguong na ole lemioong. (3:6) Mako Pol i wat malueng ake a or nge, mo aro i paengeng or, naro i patoral or nge vothung sivenga panesnga. (4:1-12; 5:12-22) Na Pol i patoral mun or nge ako Krais aro i lo werer me, na nge toko lemioongare ole los wereraing nge rinong, eneke Pol i voth tomo nge or palolo avele, ma olemi nine senu nge ur areken rongan. (1:9; 4:13-5:11) Pol ile patoraling nge nang le vusonga ini ur aolonga ako i voth nge ile malueng or aini ako i wat i a toko lemioongare nge ako o voth a rem a Tesalonaika. (O thopol mun 2 Tesalonaika 2:1-12)
Pol tomo nge ithangangaere olemi kerere nge Tesalonaika angare
1
(Vonge 1:1–3:13)
Tho a Pol tomo nge a Sailas ome a Timoti.
Them wat malueng ake a thomu toko lemioongare nge ako a rem a Tesalonaika ako thomu ini Titemer a God na Toko Pomnga a Jisas Krais ole.
Na tho nong ve aro God ile themosaling na ile lemi moring aro i voth tomo nge thomu.
Pol ilemi sivenga nge Tesalonaika angare ole lemioong.
Na evelelnga them ri sivengaing a God nge, nge thomu alavusnga, na lemimem rum thomu nge lemem nongongre. Na nge lemem nongong areken, ako a Titemer a God nge, evelelnga lemimem rum thomu, nge lomu omaing ako lomu lemioong i pavelpol i, na nge lomu omaing engenga ako lomu asaguong i pavelpol i, na nge lomu mit engenging ako lomu men sialing nge ar Pomnga a Jisas Krais ile lo wererong me, kene i pavelpol mun i.
Na titeik areko God ia sagu thomu, lemimem mire ako i ateal thomu ve ini ile, eneke nge wop lemi ako them panongpol Panongpolong Sivenga a thomu nge, i velpol ini riong polpolnga a thomu nge avele, aveto i velpol tomo nge pathepolong engengare ako Oni Riringa i pavelpol i. Na i pavurvur ako aro thomu o thepol nine ako, lemem lemioong i engeng rintet nge Panongpolong Sivenga aken. Na e mun e ako lomumu mire nge lemem vothung sivenga ako them pathengal i a thomu nge, nge ako them voth tomo nge thomu. Na thomu o elo a God ile riong aken, make matheong pulua i velpoltun thomu, aveto Oni Riringa i pavelpol lemi sivengaing a lomu mimiong, na nge vothung aken i velpol a thomu nge ranga ve ako i velpol a them nge, na a Toko Pomnga mun nge. Na lomu matheong potunnga tomo nge lemi sivengaing aken i velpol ranga ve ini paatealing sivenga, ako i sivenga ako aro toko lemioongare ake a epee a Masedonia na Akaia aro o panes i. Na lemimem mire ako i venen aken, eneke Toko Pomnga ile riong i kimapot a thomu nge me, na i ranga ve ini kom le onngaing. Na i kima inga a epee ake a Masedonia na Akaia avele, aveto a pen elonga ako them es nge kene o nongpol mun nge ritetong ako lomumuo ol nge a God. Maken them pavurvur aro them ritet ol or nge ritetong aken avele, eneke osivenga o rurum toko na sengre nge lomu vothung sivenga ako ranga ve o nongpoo them nge nang ako them velpol a thomu nge. Na o rurum mun nge ako thomu o lel kimomu nge avalare olotualnga, na o eksing, mako o elo a God a lomu mimiong, make o velpol ol ini a God nunganga ako i mimi, ile umongare. 10 Na o ri mun nge lomu vothung ako o men sial ol nge a God Itun ile lo wererong a Pen a Urvet me, ini a Jisas ako God i palos werera i nge rinong, na ini toko ako i pamimi it nge a God ile lemi klingong ako aro i velpol panen.