Jisas i velpol werer mun a ile wainlangaere nge
21
(Vonge 21:1-25)
Jisas ile wainlanga or limai o thopol i.
1 Lamako Jisas i velpoltun mun ile wainlangaere a thei a pamonlel a Galili ako iion aininga a Taiberias. Na ile velpoling i vene: 2 Na Saimon Pita, na Tomas ako iion aininga a Didimus, na Nataniel ako ile a Kana ako a epee a Galili, na Sebedi itun or aini tomo mun nge a Jisas ile wainlanga or aini o voth tomo e pel. 3 Ma Saimon Pita i ria or ve, “Aro tho es mo tho paural silang.” Mako o ria i ve, “Aro them es tomo nge wong.” Mako o monpot ol la nge wok, aveto pemlik lollonga aken o paural vet silang e avele.
4 Na nang i avsua mesi, nako Jisas i mitpot a thei wo peti, aveto ile wainlangaere o ate i avele ako ve, ini a Jisas.
5 Mako i nina or ve, “Thengengekre, o paural vet silang pelie?”
Ave o olal ile riong ve, “Avele, posispot.”
6 Mako i ria or ve, “Thomu o ulu omu susua a wok epee a menumu sivenga nge anga mo aro o paural silang pelie.” Mako o ulu ol oa susua, ave o pavurvur nge imontetanga avele, eneke silang pulua o uro nge.
7 Na Jon ako ini a Jisas ile wainlanga ako ia sagu rintet i, i ria Pita ve, “Aken ini a Toko Pomnga.” Ma Pita i nongpol ako ve, toko ako i lengpot or ini a Toko Pomnga, mako i teun werer ia neong, eneke i teuntetpot tel i lale. Ma i opthou a thei lemi la ma i keo a thei wopo la. 8 Na Jisas ile wainlangaere ako rongan o voth a wok nge, o rumongal nge i ma o montet oa susua ako i vual rintet nge silang ma o mono a wopo la. Na o melapot nge thei wopo avele, i pavurvur nge mita or mule pa mule. 9 Na nge ako o pelo a thei wopo, o thopol silang na bret ako i ngo a won sesenga mikeri nge.
10 Lamako Jisas i ria or ve, “O ela silang pelie ako o paural i mo o el i me.”
11 Na Saimon Pita i ro a wok nge mo aro i titpoo susua a wopo me. Na susua aken i vual nge silang aoliloenga. Na oa titaling i pavurvur nge 153. Na silang i pom rintet, aveto susua i minra avele. 12 Mako i ria or ve, “O es me mo o an.” Ave oa ko e avele ilemi i mit engeng i pavurvur ako aro i nina i ve, “Ong ini ao?” Eneke olemi mire ako ve, ini a Toko Pomnga. 13 Mako Jisas i es ma i ela bret ma i sungu i a or nge, na i oma vene mun aken nge silang. 14 Na ake ini ile velpoling pa menga a ile wainlangaere nge ako i rin ma i los werera.
Jisas i pator a Pita.
15 Na o an ma i vus, mako Jisas i ria Saimon Pita ve, “Saimon ako ini a Jon itun, lom asaguong nge tho i mukal nge toko areke ole asaguong nge tho?”
Mako i olal ile riong ve, “Enala, Toko Pomnga, lomum mire ako ok sagu ong.”
Mako Jisas i ria mun i ve, “Aro ong theal lek tokokoere ranga ve ini sipsipre.”
16 Mako Jisas i ria mun paininga a i nge ve, “Saimon ako ini a Jon itun om sagu tho?”
Mako i olal werer mun ile riong ve, “Enala, Toko Pomnga, lomum mire ako ok sagu ong.”
Mako Jisas i ria mun i ve, “Aro ong theal lek tokokoere ranga ve ini sipsipre.”
17 Na Jisas i ria mun pa menga a i nge ve, “Saimon ako ini a Jon itun om sagu tho?”
Ma Pita ilemi kerere, eneke Jisas i nina i pa or me ve, “Om sagu tho?” Mako i ria i ve, “Toko Pomnga, lomum mire nge ur alavusnga, na lomum mire ako ve, ok sagu ong.”
Ma Jisas i ria mun i ve, “Aro ong theal lek tokokoere ranga ve ini sipsipre. 18 Na tho ri nunganga a wong nge, ako nge wop lemi ako rongan ong apo, ong pateunu sivengom, na ong es nge wop ako lomum ve aro ong es nge. Aveto aro ong toloku, aro ong paespot menum na toko relnga e aro i pateunu wong naro i ti wong nge wop ako num plong ve aro ong es nge.” 19 Na Jisas i ri riong aken mo aro i ritet nge sovengalo ako aro Pita i rin nge na i papomnga a God nge.*Na nge a Jisas ile riong ako i ria Pita ve, “Aro ong paespot menum” i mirenga ve Pita aro i paespot imeni mo aro punongare aro o sotuna i a won ngoronga nge. Lamako Jisas i ria i ve, “Panes tho.”
Jisas i ri nge a Jon ako ini ile wainlanga ako ia sagu rintet i.
20 Na Pita i eksinga werer ma i thopol a Jon ako ini a Jisas ile wainlanga ako ia sagu rintet i, ako i panes or. Na ini toko aton ru i men thalu a Jisas nge aning na ipo wathtun i mo i nina i ve, “Anga ako aro i sungu ong a ngarangre omeni?” 21 Ma Pita i thopol i, mako i nin a Jisas ve, “Toko Pomnga, i vava nge toko ake? Aro i rin vava?”
22 Na Jisas i olal ile riong ve, “Aro ve lemik ve aro i mimi mo la i pavurvur nge lek lo wererong me, aken ini lek omaing. Na i vava ake lomum nge? Panes inga tho.” 23 Mako riong i kima ol a ile wainlangaere nge ve ile wainlanga aton aro i rin avele. Aveto Jisas i ri venen aken avele, i ri inga ve, “Aro ve lemik ve aro i mimi mo la i pavurvur nge lek lo wererong me, aken ini lek omaing. Na i vava ake lomum nge?”
24 Na tho ini a Jon ako tho ritet nge ur elonga areken na tho watu ir. Na lomumu mire ako ve, lek riong i nunganga.
25 Na ur pulua mun ako Jisas i oma i. Na aro ve o watu ir omole omole a erere nge, lemik ve aro ulue ake i pavurvur nge omei avele.
Na i re aken. I vus.
*21:19: Na nge a Jisas ile riong ako i ria Pita ve, “Aro ong paespot menum” i mirenga ve Pita aro i paespot imeni mo aro punongare aro o sotuna i a won ngoronga nge.