Pol ile malueng ako i wat i a Pilemon nge
Pilemon
Ritetong nge a Pilemon
Ava Pol i voth a mang a midenga lemi ako a rem pomnga a Rom na i wat malueng ake a Pilemon nge, ini toko Kolosi anga omole. Na ava nge wop lemi aken Pol i wat mun ile malueng a toko lemioongare nge ako o voth a Kolosi. Na Pilemon ile toko um polpolonga omole i voth, ako iion a Onesimus. Ava i kem itokoninga a Pilemon ile ur elonga pelie, ma i lo mela ako la a Rom. Na nge wop lemi ako i voth a Rom, Onesimus i nongpol Panongpolong Sivenga ako Pol i panongpol nge, ma ilemio nge a Krais, ma i opoal a Pol nge ile menong a mang a midenga aken. Na Romre ole patorong i ri vene: Aro ve toko um polpolonga i lo itokoninga ia, i sivenga ako aro tokokoere o rere i mo o so rin i. Aveto Pol i pake werer a Onesimus tomo nge malueng ake a Pilemon nge la, na i nong a Pilemon ve aro ilemi simikal a Onesimus ile vothung kerenga, naro i nongpo werero i, eneke i velpol ini itein lemioonga e, eneke i velpol ini a Krais ile. Na ava Pilemon i pavurvur aro i avsa a Pol ile riong avele, eneke i ranga ve ako ia thangaroong aolonga i voth a Pol nge, eneke Pol i panongpol a Pilemon nge a Krais, mako Pilemon i elo a Krais a ilemi. (1:19)
Pilemon ile um polpolonga i lo ia, lama i velpol ini toko lemioonga, mako Pol i pake werer i a Pilemon nge la
1
1 Tho a Pol, ako tho voth a mang a midenga lemi, eneke tho panongpol nge a Krais Jisas ile panongpolong, na titeir a Timoti ako i voth tomo nge tho, i opoal tho nge malueng ake watnga.
Na tho wat i a wong a Pilemon nge. Wong ini titeimem sivenga ako ler omaing i thun. 2 Na tho wat mun malueng ake a toko lemioongare nge, ako o pathun a lom vel nge lotuong. Tomo mun nge lulur a Apia na titeir a Arkipus ako i um engeng tomo nge them nge a God ile omaing ako ranga ve ini toko ako i voth nge punong.
3 Na tho nong ve aro thomu o vual nge themosaling na lemi moring ako nge a God ako ini Titemer tomo mun nge Toko Pomnga a Jisas Krais.
Pol i risea a Pilemon nge ile asaguong na ile lemioong.
4 Na teik, evelelnga tho ri sivengaing a lek God nge, nge wong, nge ako lemik rum wong nge lek nongongre. 5 Eneke tho nongpol ako tokokoere o ri nge lom asaguong nge a God ile tokokoere, na o ri mun nge lom lemioong nge a Jisas Krais. 6 Na lemik mire ako wong ini toko sungonga, na tho nong a God nge ve aro lom vothung aken, ako lom lemioong i pavelpol i, aro i oma wong mo aro lomum mire senu nge ur sivesivenga areko ini lom, ako nge lom teoong a Krais nge. 7 Na teik, lom asaguong aken i palemi senu werer lemik, ma lemik i ngo senu ol, eneke om sagu rintet a God ile tokokoere, na nge lom vothung inga aken ong pasisi werer olemi.
Pol i nong a Pilemon ve aro i el werer mun a Onesimus ako ini a Pilemon ile toko um polpolonga.
8 Na teik, tho ini a Krais ile pakeke, mako tho ngeip avele, na tho pavurvur ako aro tho pakealal wong nge ur ako i vengveng ako aro wong oma i. 9 Aveto aro tho nin inga wong, eneke ar sagu pel. Na tho ini tolok a Pol, na tho voth a mang a midenga lemi, eneke tho panongpol nge a Jisas Krais ile riong, na tho sis ve aro lomum esal tho, 10 mako tho nin wong ve aro wong oma vothung sivenga nge a Onesimus ako i velpol ini tuk nge ako i nongpola panongpolong ako tho panongpol nge a mang a midenga lemi, ma i elo ol a Jisas Krais a ilemi. 11 Na nomenga ile umong i sivenga nge opoalngom avele. Aveto ponange ile omaing i sivenga ol nge it alaini opoalnger.* Onesimus iion i mirenga ve ini toko opoalinga.
12 Na ponange tho pake werer ol i a ong nge wot, na lemik i es rintet nge i. 13 Na tho sis rintet ve aro tho krim wereru i, mo aro i el meum nge opoalngek, eneke tho voth a mang a midenga nge Panongpolong Sivenga panongpolnga. 14 Aveto nik plong ve aro tho ovulal wong nge opoalngek. Aveto tho sis ve aro wong oma opoaling a tho nge ako i panes inga lom lowoming. Na aken aro tho oma ur e avele i pavurvur ako aro som wompot ol i a tho nge. 15 I nunganga ako Onesimus i lo lelpot om palolo avele. Na ava i lo lelpot om venen aken mo aro i velpol ini lom toko werer ol. 16 Na ponange mothong tova lomum ol ve ini inga lom toko um polpolonga. I nunganga ako ini lom toko um polpolonga, aveto i sivenga nge toko um polpolonga, eneke i velpol ini teum sivenga mun ako nge thomu paini lomu teoong a Krais nge. Na ok sagu i, aveto aro om sagu rintet i ranga ve ini lom toko um polpolonga, na ranga ve ini mun i teum ako nge lomu teoong a Krais nge.
17 Na aro ve wong ate tho ve ini teum sivenga ako ler omaing i thun, tho nin ong ve aro wong nongpo werero a Onesimus ranga ve ako wong nongpoo tho nge. 18 Na aro ve i oma vothung kerenga e a wong nge, eve ia thangaroong i voth a ong nge, i sivenga ako aro ong eksing iion ma ong watu iok nge, ve aro tho pavengveng i a wong nge.
19 Naro tho wat ol riong ake nge sivengek menik, tho a Pol, aro tho olal ia thangaroong a ong nge.
Aveto aro tho ri ur e avele nge om thangaroong a tho nge, na om thangaroong aken ini sivengom lom mimiong, eneke ong eksing lom mimiong nge panongpolong ako tho panongpol nge. 20 I nunganga teik, tho sis ve aro wong oma vothung sivenga aken a tho nge, eneke it aini te voth ini a Toko Pomnga ile toko. Naro ong palemi senu werer lemik nge lom vothung aken, eneke te teo a Krais nge. 21 Na nge ako tho wat malueng ake a wong nge, lemik mire ako aro wong panes senu lek ninong aken, na e mun e ako lemik mire mun ako aro lom omaing aro i aolo leltun ur ake ru tho nin ong nge.
22 Na lek riong mun e i vene: Aro wong monsi meik e a lom vel, eneke lemik mire ako ve, God aro i olal lomu nongong mo tho vthopot nge kinong ake, naro tho lo werer a thomu nge wot.
Pol ile riong patopalalnga.
23 Na Epapras i voth tomo nge tho a mang a midenga ake, eneke i mun kene i panongpol nge a Krais Jisas ile panongpolong, na i pasungalu ile nang sivenga a wong nge. 24 Na thengengek areko them um tomo nge pel ako ini a Mak, Aristarkus, Demas na Luk, or mun kene o pasungalu mun ole nang sivenga a wong nge.
25 Na tho nong ve aro Toko Pomnga a Jisas Krais ile themosaling aro i voth tomo nge thomu.
Na i re aken. I vus.