5
Jon i thopol erere omole ako o patetun i.
1 Lama tho thopol erere omole ako i voth alapinmolnga a toko ako i men nge nepes a menonga aken, a imeni sivenga nge, na wating i voth epee epee, na o patetun i nge sthong pa or limai. 2 Na tho thopol ensel engenga omole ako i presa viringa ve, “Toko kathnga i sivenga rintet mo i pavurvur ako aro i paglokpot sthong or limai aken mo i thep erere aken, e?” 3 Aveto toko e avele ako a Pen a Urvet, eve a malang po, eve a ulue, eve a Wali, kene i pavurvur ako aro i paglokpot sthong or limai aken mo i thep erere aken mo i the a lemi. 4 Mako tho tang rintet, eneke toko e avele i pavurvur aro i thep erere aken mo i the a lemi. 5 Lama mukalinga omole i ria tho nge ve, “Mothong tanging, thepol toko engenga omole ako o apet i ve ini ‘Laion,*O thepol laion ia sei nge pes 632. ako ile net Juda’ na ini a nepes a Devit ako i voth nomenga itevinga, na i ranga ve ini mun i ilongo, na ile mong a God ile ngarangre, make i pavurvur ako aro i paglokpot sthong or limai aken mo i thep erere aken.”
6 Lama tho thopol Sipsip Tun omole ako i mit na i ranga ve ako o so rin i lale, na i mito totho nge nepes a menonga aken. Na ur miminga or penel aken tomo nge mukalinga areken o voth kalalual i. Na ia sagar or limai, na itheki or limai mun ako i paateal Oni Riringa ile engenging ako i mukal nge ur alavusnga. Na God i pakepot Oni Riringa aken a pen elonga ake ru a ulue lale. 7 Lamako Sipsip Tun aken i es la ma i ela erere aken ru i voth a toko ako i men nge nepes a menonga aken, a imeni sivenga nge. 8 Ma nge ako i ela erere aken, ur miminga or penel tomo nge mukalinga or mule paini pothoi or penel o koru oeve a Sipsip Tun aken nge. Na mukalinga areken or omole omole o krim won agolu ako i pavurvur nge velnga, na o krim mun oto ako o oma i nge gol ako ur una vrongare i voth nge, ma o pasiseo i ma i klunga na won klunga aken i paateal toko lemioongare ole nongongre. 9 Na mukalinga areken o vo voing ponganga ako i ri vene:
“Ong pavurvur ako aro ong ela erere aken
mo ong paglokpot sthong areken nge, na ong thep i.
Eneke o so rin ong,
na lom rinong aken i ol werer tokokoere a God nge me,
tokokoe areko o voth a pen elonga ake ru a ulue
ako okei rel rel,
na oni peti rel rel,
na ole net rel rel.
10 Na ong oma or
mo o velpol ini toko avlung
ako ini a God ile umongare ranga ve ini prisre,
naro o voth ranga ve ini nepesre,
naro o theal tokokoere ake ru a ulue.”
11 Lama tho thopol mun, na tho nongpol ensel pulua rintet ole lenging na i pavurvur nge otitalnga avele. Na o mit kalalual nepes a menonga aken tomo nge ur miminga o penel aken tomo mun nge mukalinga areken. 12 Na o pres a viringa na o vo vene:
“Sipsip tun ako o so rin i nomenga
i sivenga inga na i pavurvur aro te risea i,
eneke iion i kima, na ile ur elonga pom,
na ile mire aolonga, na ile engenging aolonga.
Na i pavurvur ako aro toko alavusngare o risea i,
na o papomnga i, na o paaolonga i.”
13 Na tho nongpol ur alavusnga ake ru o mimi, na o voth a Pen a Urvet, na a malang po, na a ulue, na a Wali, na a rua, o vo vene:
“Toko ako i men nge nepes a menonga
tomo mun nge Sipsip Tun aken,
aro te risea or paini, na papomnga or,
na paaolonga or, na pakima oion evelelnga,
naro ile vusonga avele.”
14 Na ur miminga or penel aken o ri ve, “I nunganga.” Na mukalinga areken o koru oeve a or paini nge, na o lotual or paini.