Satan tomo nge ilengare o el selele kerengaing
12
(Vonge 12:1–20:15)
Jon i thepol seng tomo nge telenga pokin.
Lama paatealing aolonga e ako tokokoere o kukuk nge kene i velpol a sepsa. Na i vene: Ini seng ako i seltunu ini nge nang theki, na ngov i voth a ieve sa thewo, na i ur vevea ako sivemit or mule pa omole pothoi or aini o sop nge. Na iopo ol ma i toth ako aro i pop ma popong a sisisong i velpol a i nge, mako i wal ol. Lamako paatealing mun aolonga e ako i velpol mun a sepsa, na i vene: Ini telenga pokin aolonga ako ini peti selele, na ipounga or limai, na ia sagar or mule, na vevea posposengae areko o men men a ipounga omole omole. Na ile pupo i lelegairpot sivemit pelie, na i ranga ve ako i pamatu epee omole a ulue me, ave epee or aini rongan o voth a sepsa. Na i mit toth a seng aken nge mo aro i an itun tova i poppot i. Na seng aken i poppot itun ma ini totomone. Ini toko ako God i ateal i ve aro i theal toko alavusnga ake ru a ulue, na ile thealing aken aro i engeng rintet ranga ve ini ain. Ma o maneteta i na o pasong i a God nge mo aro i men tomo nge i a ile nepes a menonga nge. Lamako seng aken i lo a pen polpolnga la. Ini pen ako God i monsi nge lale mo aro i voth nge. Naro o theal i nge i pavurvur nge nang or 1,260.
Lamako punpeling i velpol a Pen a Urvet, ensel Maikel ome ile enselre o pun tomo nge telenga pokin ome ile enselre. Aveto Maikel ome ile enselre ole mong or, mako i pavurvur aro o voth ol a Pen a Urvet avele. Na telenga pokin aolonga aken ini ingop nomenganga ako iion mun a Satan ako i paleklek toko alavusnga ake ru a ulue. Na o asespot i a ulue me tomo nge ile enselre.
10 Lama tho nongpol lenging ako i espot a Pen a Urvet me ma i leng viringa na i vo vene:
“Ponange re ake God aro i el werer ile tokokoere
na i pathengal ol ile engenging lale
ma i velpol ol ini nepes.
Na toko ako i ateal i ve aro i el werer ile tokokoere,
kene i pathengal mun ile engenging.
Eneke o asespot titeirre oteltunnga a Pen a Urvet,
ini a Satan ako nomenga i mit a God itheki
nge nang na mlik elonga mo i teltun oa.
11 Na titeirre ole mong i nge Sipsip Tun ia mla
tomo nge Panongpolong Sivenga ako o panongpol nge.
Na o sungpot ole mimiong,
na o ngeip nge ole rinong avele.
12 Maken Pen a Urvet
tomo nge thomu areko o voth nge,
aro lomumu ngo senu.
Aveto patongti re thomu areken ru o voth a ulue na rua,
eneke Satan i esu a thomu nge wot lale.
Na i vual nge lemi klingong,
eneke ilemi mire lale ako aro i voth lollo avele.”
13 Ma nge ako telenga pokin aken i thopol ako o asespot i a ulue me lale, mako i patea nge seng aken iwisnga, ini seng ako i pop wain tomonnga aken. 14 Aveto God i sungu viso aolonga ini giniti or aini a i nge mo aro i rer mo i lo lelpot telenga pokin aken. Ma i rer a pen polpolnga aken nge ako aro o theal i nge, i pavurvur nge tovu po or me na ngov or limae. 15 Lamako telenga pokin aken i mutpot thei mo i lel a seng aken nge la, mo aro thei awonga aken aro i theltetpot i la. 16 Aveto ulue i opoal seng aken ma i woa ma i onu thei ako i espot a telenga pokin iwo nge. 17 Lama telenga pokin i thopol i veno ako, ma ilemi kling rintet nge seng aken, mako i eso la mo aro i pun tomo ol nge itutun rel relnga elonga, ini areko o nongal a God ile patorong, na o panes senu riong nunganga ako