Pol ile malueng ako i wat i a toko lemioongare nge ako o voth a rem pomnga a Rom
Rom
Ritetong nge a Rom
Na nge a Pol ile panongpolong a esong menga i es a pen epee ako ini a Gris na iion aininga ini a Akaia, na i wat malueng ake a toko lemioongare nge ako o voth a Rom. (Aro o thepol Pakekere ole Omaing 20:2-3) Na rem pomnga a Rom ini rem ako i aolonga nge rem alavusnga ake ru a ulue, nge wop lemi aken. Na Pol i sis ve aro i es a or nge mo aro i opoal or. (1:11-15) Aveto i sis ve aro i es tel a Jerusalem mo i sung umtun pelie a toko lemioongare nge. (15:25-28) Mako Pol i wat malueng ake a or nge mo aro olemi mire ako ve, aro i porum tel or nge ile esong a Spen la. (15:23-24) Na Pol i thepol vet toko lemioongare ako o voth a Rom rongan, na i sis ve aro i ritet tel or nge a God ile sovengalo ako aro o velpol ini toko riringa a itheki. Na toko lemioonga pulua ako a Rom or ini Judare avele, aveto pelie a or nge ini Judare. Na Pol i sis ve aro i panine olemi ako ve, ur ako God i kin ile riong nge tomo nge Judare kene ilemi simikal i avele. Avele, God ini God vengvenga, na i panes vengveng ile riong elonga, na ini God vengvenga venen aken nge ako i apet toko ini toko vengvenga a itheki, tova i lemio nge a Jisas. (1:17-17) Na aro ve God i apet toko ini toko vengvenga a itheki, aken aro i pamimi toko aken. Na Pol i ri ve, toko alavusnga, areko ini Judare tomo mun nge areko or ini Judare avele, or alavusnga o oma vothung kerenga, (1:18–3:20) na o pavurvur ako aro o velpol ini toko vengvengare a God itheki nge a Moses ile patorong panesnga, kene avele. Aveto aro ve toko e ilemio nge a Jisas Krais, God aro i themosal i naro i apet i ve ini toko vengvenga a itheki, eneke Krais eltetpot ile vothung kerenga lale. (3:21-26) Na aro ve God i pamimi it venen aken, aken i pathengal it ako ve, ini God vengvenga na i panes ile riong ako i kin tomo i nge Judare nomenga. (3:21, 26) Aveto toko e avele i pavurvur aro i velpol ini toko vengvenga a God itheki nge a Moses ile patorong panesnga. Avele, aro ilemio nge a Jisas ranga ve ako Abraham ilemio nge a God. (3:27–4:25) Maken aro ve God i apet it ini toko vengvengare a itheki, ako nge ler teoong a Krais nge, aken ile lemi klingong i voth ol a it nge avele. Avele, te voth lemi moring tomo nge a God, eneke it toko kerenga te velpol ini a God ilengare nge a Jisas ile omaing. (5:1-11) Na i nunganga ako nomenga te voth a rinong lemi, eneke te oma vothung kerenga, aveto God ile sungong ako i sung polpol i a it nge, kene i aolonga rintet nge ler vothung kerenga areken, mako i sung mimiong ako aro ile vusonga avele a it nge. (5:12-21) Na aro ve God i eltetpot it a vothung kerenga lemi, te mothong tova te panes werer mun vothung kerenga, aveto aro te panes inga a Krais na vothung sivenga ako i sis ve aro te oma i. (6:1-23) Na i nunganga ako nomenga toko alavusnga olemi i voth nge vothung kerenga omanga, (7:7-25) aveto te voth ol a Moses ile patorong lemi avele, (7:1-6) mako te pavurvur ol ako aro te mimi a Oni Riringa ile thealing lemi. (8:1-39) Na Judare o engeng nge a Moses ile patorong panesnga mo o velpol ini toko vengvenga a God itheki, aveto o pavurvur avele, mako God i pakeu a Krais me, na aro ve lemiro a i nge, aro te velpol ini toko vengvenga a God itheki, ranga ve ako i pator or nge nomenga. (9:1–11:36) Na God i apet it ini toko vengvenga venen aken, mako aro te panes inga vothung vengvenga ako i sis ve aro te oma i. (12:1–15:13)
Sovengalo ako toko i velpol ini toko vengvenga a God itheki, ini inga nge ile lemioong inga
1
(Vonge 1:1–4:25)
Pol i ritet nge ile omaing ako ini pakeke.
1 Tho a Pol ako tho wat malueng ake, na tho ini a Krais Jisas ile umonga, na i leng tho ve tho ini ile pakeke, na i paateal tho ve aro tho panongpol nge ile Panongpolong Sivenga. 2 Nomenga God i kin ile riong nge Panongpolong Sivenga aken, na ile riong elngare o wat nge, ako a ile erere riringa lemi. 3 Na i ritet nge Itun ako i velpol ini toko, na ini nepes a Devit itevinga, 4 na ioni i riri rintet, aken i pathengal it ako ve, ini a God Itun ako ile engenging i aolonga, eneke i los werera nge rinong, ini ar Pomnga a Jisas Krais. 5 Na nge a Jisas, God i themosal them, mako tho velpol ini ile pakeke mo aro tho papomnga iion, naro tho panongpol toko alavusnga areko or ini Judare avele, mo aro o nongal ile riong na olemio a i nge. 6 Na thomu ini toko pelie a or nge ako God i leng thomu mo o velpol ini a Jisas Krais ile.
7 Tho wat malueng ake a thomu toko lemioonga alavusnga ako o voth a Rom. Thomu ini areko God ia sagu thomu, na i leng thomu mo thomu ini ile. Aro thomu o el themosaling na lemi moring a Titemer a God tomo nge ar Pomnga a Jisas Krais nge.
Pol i sis ve aro i porum vet Rom angare.
8 Tho sis ve aro tho ri tel a thomu nge vene: Nge a Jisas Krais tho ri sivengaing a lek God nge, nge thomu alavusnga, eneke lomu lemioong i kima a pen elonga ake ru a ulue. 9 Tho sung lek mimiong alavusnga ako tho betet nge a God ile omaing ako tho panongpol nge Itun ile Panongpolong Sivenga. Na God aken ilemi mire ako ve, lek riong ake i nunganga ako tho ri ve, tho nong evelelnga nge thomu, 10 nge lek nongong alavusnga.
Nang pulua lale ako lemik ve aro tho porum vet thomu, aveto lek so i thep rongan, na tho nong engeng tova ve God i sis ve aro i oma i, ako aro i thep ol sovengalo ako aro tho es a thomu nge wot. 11 Na tho nong venen aken, eneke tho sis rintet ve aro tho thopol thomu mo aro tho sung Oni Riringa ile sungong pelie a thomu nge, mo aro i paengeng thomu. 12 Na lek riong aken i mirenga ve, nge lek lemioong na nge lomu lemioong mun, aro te paengeng pel nge, nge ako tho voth tomo nge thomu. 13 Na titeikre, tho sis ve aro lomumu mire senu ako, tho monsi nge nang pulua ako aro tho es a thomu nge wot, ave i pavurvur nge ponange ur pelie rongan i mit roal tho. Tho sis ve aro tho um a omu wop, mo aro tho pavelpol mun monngomu sivenga ranga ve ako tho pavelpol i a rem elonga ako or mun ini Judare avele. 14 Eneke God i pavurpol lemik ve aro tho panongpol nge toko alavusnga, ranga ve ini areko or ini Grikre ako o el pamirealing, tomo mun nge areko or ini Grikre avele ako o el pamirealing avele, na toko powe ninengare tomo mun nge toko powe ninengare avele. 15 Mako lemik engeng ve aro tho panongpol mun Panongpolong Sivenga a thomu Rom angare nge.
Tokokoere o velpol ini toko vengvenga a God itheki nge Panongpolong Sivenga panesnga.
16 Na lemik engeng venen aken, eneke lek maral nge a Krais ile Panongpolong Sivenga panongpolnga avele, eneke God ile engenging i voth nge, ako aro i pamimi toko alavusnga tova ve olemio nge i. Them Judare them nongpol tel i, lamako areko or ini Judare avele o nongpol mun i. 17 Na lek riong aken i mirenga ve, nge Panongpolong Sivenga aken God i pathengal it nge sovengalo ako aro tokokoere o velpol ini toko vengvenga a itheki, ako nge ole lemioong inga. Na evelelnga God i oma venen aken, aro ve toko e ilemio nge a God ile riong, God aro i apet i ve ini toko vengvenga. Na i ranga ve ako ile erere i ri nge ako i ri vene:
“God aro i apet toko ini toko vengvenga
nge ile lemioong inga,
maken aro i el mimiong sivenga.” Habakuk 2:4
Toko alavusnga okime lelalpot a God.
18 Na riong aken i nunganga, eneke God ako i voth a Pen a Urvet i pathengal it ako ve, ilemi klingtun, naro i paomelal, areko o papompom i avele, na o oma vothung kerenga a tokokoere nge, nge ako o mit roal riong nunganga nge ile omaing. 19 Eneke ur kathnga ako God isa wom i a tokokoere nge mo olemi mire nge i, kene olemi mire nge lale, eneke God i pango pat i a or nge lale. 20 Riong aken i nunganga, eneke nomenga nge nang ako God i pamenu ur alavusnga na i mulu ponange, tokokoe areko o thopol a God nge otheki avele, o pavurvur ako aro olemi mire nge ako i voth ini a God, na nge ile engenging ako aro ile vusonga avele, eneke o thopol ur alavusnga ako i oma i, maken ole riong tepun e avele ako aro o ri ve, “Lemik mire nge a God avele.”
21 Na ole riong tepun e avele, eneke nomenga olemi mire nge a God, aveto o papompom i ranga ve ini God avele, na o ri sivengaing a i nge avele. Na o patea lemi pelekpolong nge a God, mako olemi i nine avele, na olemi a mideng. 22 Na o ri ve, “Them ini toko powe ninengare.” Aveto o velpol ini toko ngongongre. 23 Mako o lel okime nge a God ako aro ile vusonga avele ilotualnga, na o tepolal i nge avalare olotualnga ako o te ir ma o velpol ranga ve ini toko ako i rin, na men, na mekerem, na ur reingare oa seire.
24 O oma venen aken, mako God isa wompot or mo o oma ol vothung kerenga kathnga ako i mita a olemi, ranga ve ini toko na seng aomngare, mako o oma ol vothung ako o palemara pel oni peti nge. 25 Na o ela riong ako i ri nunganga nge a God, ma o tepolal i nge riong le apaltetonga, na o lotual ur areko Patenger i pamenu ir, na o sung ole sungong a or nge, aveto o oma venen aken a Patenger nge avele, ini God ako aro te risea i evelelnga ako aro ile vusonga avele. I nunganga.
26 Na tokokoere o oma venen aken, mako God isa wompot or mo o panes inga vothung le maralongare ako i voth engeng a olemi, ranga ve ako sengre o lel okime nge peangeong a menong vengvenga, na o tepolal ol i nge vothung ako sengre o ngo tomo nge pel. 27 Na i vene mun ako, totomonere o lel mun okime nge ngo tomoing nge sengre, na olemi vel rintet nge ngo tomopeling nge osivenga. Totomonere o oma vothung le maralonga tomo nge totomonere, mako osivenga o el ol ole vothung kerenga aken olalnga, i pavurvur nge ole omaing kerenga ako o oma i.
28 Na oni plong ve aro God ile mire nunganga i ngoo a olemi, mako God isa wompot or mo o panes osivenga ole lemi rumong kerenga, na o oma vothung kerenga ako i sivenga avele ako aro tokokoere o oma i. 29 Na o vual rintet nge vothung kerenga elonga omanga, na vothung ako i vengveng avele, ranga ve ako o theseal tokokoere ole ur elonga, na ole ngarang tokokoere, na oni plong ve aro ur sivesivengare aro i velpol a tokokoere nge, na o so rin polpol tokokoere, na o vol pel, na ole apaltet, na o pamen kerere tokokoere, na o ri ngunngun, 30 na o pakerenga tokokoere oion, na oni silal a God, na o ri tangatun nge tokokoere, na o magon, na o paroro osivenga oion, na olemi rum nge vothung kerenga ponganga omanga, na o avsa otemaere ome oninaere ole riong, 31 na lemi rumong sivenga i voth ol a or nge avele, na ole lemioong avele, na ole olotet tokokoere, na olemi esal werer nge olengare avele. 32 Na olemi mire lale ako God ile torong vengvenga i ri ve, areko o oma venen aken, i sivenga ako aro o pun rin or nge ole vothung areken, aveto o kenkeno inga nge omanga, na e mun e ako o risea nge areko o oma mun vothung ako i venen aken.