1 ꞌEnakúne ja ea kaꞌene uneunecha rukimaꞌurakije sisea kaꞌene joni haha ꞌahi reꞌi venujihunaꞌe iviamaa roe niramarume ꞌee úchia eha. 2 Joni kukua uneunechijija sakarasa raname ꞌee joni ateha tiriapo uhusa ranavara. 3 Joni korutia ꞌee siriva tihejara. ꞌEne ijí tiheja kajipo ja rone ꞌwarahuna. ꞌEne ijipo veje ja areri veni renau jaꞌinaꞌe renahuna. Ike vea túchamaa ikino ja joni uneunecha hine tamua vejara. 4 Heha! Ea kaꞌene oni juara meja jihipuni eha kaꞌene a pavajiꞌi ꞌuninamie hinujihunaꞌe pu ninamaꞌe hine ꞌumeju. ꞌEne ea kaꞌene juara savajipo hine emavajujaho ajime Natohwa Sapaoti kaꞌene uneunecha mahoꞌo ꞌAjohiꞌini jihuni ataa vaji arumu. 5 ꞌEnakaivo ja ikino mweꞌi hijujaho uneunecha mamaa ꞌee mapoka ani renavumakame ijihuni toi hami hine ꞌee joni hiijaho joni hahijara ura renajaꞌinaꞌe vejiꞌi hijara. ꞌEne ijihuni vei reje ꞌanihuni jihunaꞌe joni oja siseiji piravume emarejara. 6 Ja ea arimaa kaꞌene ja patanuꞌurihujaho namahe ꞌee ꞌanaume kwamana.

7 ꞌEnajihunaꞌe vwehu nune masuani ajuarasahe hina vaꞌeje Natohwijaho roꞌamana. Ea kaꞌene juara ꞌojiꞌinijara huni uja mavarasaꞌina kaꞌene mweꞌa vaji irechavuꞌe navujipo nehi pine sonaꞌeje marasaꞌavarono masuani ꞌajiha hinujaho kaha. 8 Ja ꞌuꞌo masuani ajuarasahe joni oja veje harura renaꞌamana. Ijihuni maijaho Natohwijara rohuna nituranu. 9 ꞌEnakúne vwehu nune pasuꞌarame ninakaraꞌavara. ꞌEjakame ja panamaꞌavara. Heha! ꞌOtua hejiꞌinijaho vwicha jiamai naminu. 10 Vwehu nune areri poropetiepo Natohwi jihuni iha toi vejajaꞌinaꞌe siseisei hiꞌavajaho masuani ajuarasahe pura vene najaha kajaꞌinaꞌe hiꞌavara. 11 Heha! Ea kaꞌene kirasahe vaꞌujija nú punijihunaꞌe teamanuhuna. Jopura kirane vaꞌajaho ja nihejura. ꞌEne túnaꞌi roe icháꞌina kaꞌene Natohwijara venajaho nikavara. Natohwijaho nihoꞌo temuki rarejiꞌine ꞌee numisarai rarejiꞌina. 12 ꞌEnavo vwehu nune niꞌimaꞌurijaho akúpa ꞌee mweꞌa ho unenuꞌu pina paꞌurahiꞌi ichutoa pikiꞌavara. ꞌEnakaivo iꞌa ꞌiꞌi veꞌavajaho iꞌa ꞌiame ꞌee pana ꞌiꞌi veꞌavajaho pana ꞌiꞌavara. ꞌEꞌirakúne ja ꞌotua vaja panamiꞌavara. 13 ꞌÚ ja ea pina joni vaja ahijijiꞌi vi hino? Hu makaꞌeje siporua ꞌoꞌamana. ꞌEne ea irara oja sonama paraꞌeje hiꞌamajaho makaꞌeje javaa kaꞌene Godi taꞌarohujaho vejiꞌi hinama. 14 ꞌÚ joni vaja vi ea pina atami ꞌunaꞌejuꞌe hino? Ijinakú makaꞌeje sosi huni erutaꞌe ꞌwarave roa ꞌee makiꞌeje pu huni siporua ꞌonaha ꞌee Natohwi jihuni iha toi ꞌwerua ꞌonaha. 15 ꞌEne siporua kaꞌene nimaa rojiꞌi ꞌojujara reje ea kaꞌene atami ꞌunamujaho marahuna. ꞌEne Natohwijara veje ꞌurihuna. ꞌEne hu sisea venanaꞌe reꞌamajaho huni sisea vwihane areve paꞌarehuna. 16 Ijihuni hahi joni sisea ꞌwame nahatiꞌaraꞌavara. ꞌEne niꞌajarame siporua ꞌojakame ja maraniꞌamana. Ea kaꞌene arimai jihuni siporuijaho harura rukimaꞌure ꞌee maaru rejiꞌina. 17 Iraijaho emaa ꞌee huni kara ijaho núnijaꞌina kaivo hu siporua nimaa nimaijino neha papiꞌamarono ꞌojume mweꞌa neha papiꞌeme juara noꞌopisune ꞌee masapa iropune kwinu paꞌarejara. 18 ꞌEjume hu kúꞌo siporua ꞌojume ichutoa neha roe pijume mweꞌa ꞌiruma marasahara. 19 ꞌEne vwehu nune ei pini joni vaja kajino ꞌunama nimaiji areꞌikaꞌi vaꞌamajaho ei pini vaꞌe ahema apene roꞌamana. 20 Makaꞌeje ea kajaho hena kaꞌamana. Ea irara ea kaꞌene sisea vejiꞌiniji ꞌwaravuꞌe huni ꞌunama sisei jihuniji aremujaho hu huni ꞌavena kaꞌene kwahuni ꞌunamiji vaꞌajaho niꞌajahana. ꞌEne huni sisea mapokijaho vahamana.