Pairimani
1
Vuꞌa Anejijihina
Poru Jesu Keriso oni tipurea ꞌee núni vwea Timotiꞌi Pairimani núni vwea kaꞌene nú oja mahe ꞌee nú puꞌúmo kaukara vejiꞌini jihunaꞌe veju. ꞌEe Apia kaꞌene núni maꞌinijaho ꞌee Achipasi sorutia kaꞌene núni napurijaho ꞌee oni sea vaji sosijihi punaꞌe veju. ꞌEnakúne areve Godi kaꞌene núni Oma ꞌee núni Natohwa Jesu Kerisora maiji vwihanúe ꞌee matauviꞌinijaho mihama.
Pairimoni Oja Kaꞌene Mahajine ꞌEe Huni Nimaaroijina
Na naꞌia mapokaꞌe nuni Godiji teimani ꞌwaviꞌi oni iha ꞌurahe siporua ꞌojura. Ijihuni maijaho ara Godoni ehijaꞌe mahoꞌo oja mihe ꞌee núni Natohwa Jesu nimaa ronuji henare avajura. Nara siporua kaꞌene ꞌojujaho raka kaꞌene ara nimaa ronuji ea ꞌahoꞌa ꞌwaraꞌamajaho maa rukinaꞌe rehuna. ꞌEne Keriso onijihunaꞌe henaka mapoka mamaa kaꞌene oni vaji navujaho roe maa rukina rehuna. Vwea nune ara ea oja mihujara rejuꞌe na nihoꞌo teamanime oja sonahie ꞌee Godoni ehija mapoka ijara niꞌajihu.
Onesimasi Onaꞌe ꞌOna Vejajina
ꞌEnajihunaꞌe na Keriso oni vaji nimaa vejiꞌi ꞌwaravukúne ꞌunama mamaa aririjiru veꞌamana. Emaa oja mihujihuni hurijihunaꞌe na a jarirame ꞌwaravu. Na Poru kaꞌene iviamaa Jesu Keriso oni tipurea rena hiꞌeme ema rejujara ꞌwaravu. 10 Na nuni hariha Onesimasi kaꞌene na tipurai hijiꞌi nahume Godoni ea renanaꞌomo na hunijihunaꞌe jarirame a ꞌwaravu. 11 Hu nimarakuijaho oni unaꞌa areri pavenana. ꞌEnakaivo hu iviamaa oni unaꞌa ꞌee nuni unaꞌa areri vehuna. 12 ꞌEnaꞌomo na hu ranavuꞌe ꞌunama vuꞌu. Na oja mahuri eiji ranavuꞌe vuꞌukúne teamanaꞌeje aheꞌamana. 13 Na vuꞌa maiuꞌini jihuni hahi tipurai hiju. ꞌEne na ura hu ranave nú huꞌúmo hine oni tiniji apene na niꞌajihunaꞌe ura reniu. 14 ꞌEnakaivo a patea manaꞌeje nara unenu pina ijaꞌina vehuna arira paꞌajihunaꞌe na paꞌejahaukúne a ichaꞌinaꞌe mamaa vwihanu jaꞌinaꞌe veꞌamana. 15 ꞌEne vi ijihunaꞌe hu a maꞌuako ranamaꞌi ani ru vaꞌana. ꞌEjakame a kúꞌo huaꞌe apeꞌamajaho ranave ani pavahuna. 16 ꞌEnaꞌomo hu iviamaakaho pwea kaivo pwea puni ꞌunami jaꞌina pana vo nuni vwea kaꞌene na oja mahujina. Ikaho nara hu oja mahujina vo iviamaa hu oni vuꞌujaho haharu pana vo Natohwi jihuni vaji vuꞌujihunaꞌe ijara marana asima paranana. 17 ꞌEnajihunaꞌe a nuni napura reꞌamajaho areri nara vuꞌakame a naaꞌe aheꞌama jaꞌinaꞌe hu ahaamana. 18 ꞌEne hu oni unenuꞌu pina siseꞌi vene ꞌee hu oni unenuꞌu pina apenana reꞌamajaho nuni chimua ꞌahi munaꞌamana. 19 Na Porura ike asura kaho nuni iji vejujihunaꞌe nara ijihuni eha vehuna kaivo areꞌeje na ike ꞌwaravuma nuni chimua onunaꞌi namu ijaho oni hiijina. 20 Iꞌa nuni vwee! Natohwi jihuni vaji na niꞌajiꞌamana. ꞌEje Keriso oni vaji na oja sonahiꞌamana. 21 Na ara hene vehuniji nimaa rojiꞌi pasia ikaho onaꞌe vejujihunaꞌe na nihejujaho nara ꞌwaravukaho a venareje ꞌahoꞌa huri vehuna. 22 ꞌEne ijaꞌinaꞌe vejiꞌi nuni tinia amairiꞌamana. ꞌEjakame Godira oni siporua eha veje na vuꞌe a kauta.
Túchamaa ꞌAjoramajina
23 Iparasi nuni napura Jesu Keriso oni tipureijara hinujara ꞌajoramu. 24 ꞌEne Maka ho Arisitakasi ho Timasi ho ꞌee Ruku kaꞌene nú puꞌúmo kaukara vejiꞌinijipo ꞌajoravu. 25 Natohwa Jesu Keriso oni maiji vwihaniiꞌinijaho oni ꞌavenijiꞌi hinama.