8
Aja Iropu Noꞌoji Rasaꞌeme Onaꞌojiꞌina Tauja Iropu Noꞌo ꞌEkara
Vea kaꞌene aja túchamaa iropu noꞌo ijí Hu rasamajaho ira noꞌa mahoꞌo paꞌarena naꞌeme vea oma kwinu paranana. Na kiꞌeme ꞌona ojiꞌina iropu noꞌo Godoni unaꞌi namijajaho tauja iropu noꞌo vajihana. ꞌEꞌeme ꞌona ojiꞌina pina roe swasa vejuri tini korutia tevua ꞌunanama naminana. Uneka kaꞌene jae amua mamaa ꞌuhunijaho nihoꞌo mapoka mapoka vajahana. ꞌEjakame hura ijí ꞌeke Godoni ehiji jihipuni siporua kaꞌene toronu huni unaꞌi koruti ꞌaiju kaꞌene swasa vejuri ꞌahi navuji ahuma irechaꞌamarono vajahana. ꞌEꞌeme inisenisia huni uꞌa ꞌee Godoni eijihipuni siporujiꞌi ahuma ꞌona ojiꞌina huni ija tahi ajima Godoni unaꞌi vaꞌana. ꞌEꞌeme ꞌona ojiꞌini tevua apene swasa vejuri ꞌahi vena ꞌeke vaji irechavume ituꞌoꞌunana. ꞌEjumakaviꞌi hu apene mwei piꞌonavume niꞌaha kwinu akúpi ꞌanúꞌeme vea niꞌimaꞌura piꞌime ira ani ani reꞌeme mwevarivura niꞌimaꞌuri roana.
Tauja Hwasihara
ꞌEꞌeme ꞌona ojiꞌina iropu noꞌo tauja iropu noꞌo ꞌekajija hwasiꞌiro amairiaravara. Tauja amurijara ꞌumenajino muna vena ꞌaijiꞌi ahuvajaho mwei piꞌonavara. ꞌEjume mwea pwinanaꞌa rena paranana. ꞌEne icha ꞌee ija pwinanaꞌa rene paranana. ꞌEꞌeme ꞌona ojiꞌina amurijihuni rorijara tauja hwasiꞌeme unenu pina huriꞌa niꞌimaꞌura saꞌina veni rejiꞌinijaho apene sohi vaji piꞌonavara. ꞌEjumakame soha pwinanaꞌa ꞌaa renana. ꞌEjumakame ijí soha vaji uneunecha kaꞌene maiꞌo hijiꞌinijija pwinanaꞌa kwamasahume sisima pwinanaꞌa siserasahara. 10 Onaꞌojiꞌina noꞌopisu ijara tauja hwasiꞌeme akúpi ꞌahi china nihoꞌo niꞌimaꞌura tajaheꞌune naheha punaꞌi reꞌeme toa ꞌee toúja pwinanaꞌa ꞌahi ꞌonana. 11 China kajihuni ihijaho Umupaviꞌina. ꞌEnaꞌomo toa Umupaviꞌina rejumakame ea mapoka toa kaji ine tirahara. Ijihuni maijaho toa umupaviꞌina. 12 Onaꞌojiꞌini noꞌona noꞌonijara tauja hwasiꞌeme vea masapa ꞌee china pwinanaꞌa vejume nutumana. Ijihuni hahi vea hamia parenana ꞌee masapa hamia pahananana. 13 ꞌEꞌeme na ꞌaꞌama niriꞌi kavume akúpa ꞌaha kahino púrúha niꞌimaꞌurijaho emojiꞌi ira ajira ikaꞌina ꞌumenana. Joni eha sisea namu! Joni eha sisea namu! Joni eha sisea namu! Ea mapoka kaꞌene ja mweꞌi hiju jihija eha sisea apehuna. Ijihuni maijaho ꞌona ojiꞌina noꞌopisu tauja hwasiꞌavaji ja ꞌeka mapoka kaꞌene mweꞌakaki hijujija sisea niꞌimaꞌura joni haha ꞌahi reꞌena ꞌumenana.