15
ꞌOna Ojiꞌinapo Sisea Túchamaa Rehuniji ꞌEka Roajivajina
ꞌEꞌeme na kaꞌeme kahi akúpa ꞌahi unenuꞌu pina niꞌimaꞌura mavarasaꞌini renana. ꞌEꞌejume na kivume ꞌona ojiꞌina iropu noꞌo túchamaa huni siseiji iropu noꞌo ꞌuninamiara. Ijihuni maijaho ijaho Godoni senijara paꞌare parahunijina. ꞌEꞌejume na kavume soha maneꞌa ꞌee vena punaꞌi renana. ꞌEjumakaviꞌi ea kaꞌene hanuhiji pataarohe huaꞌina kaꞌene iji vejaji pataarohe ꞌee huni ihijihuni asura kaꞌene vejaji harura vena pataarohajija pu soha kaꞌene maneꞌa saꞌina ꞌahiji Godoni hurisia ꞌuninamie namijara. ꞌEne pu Mosisi kaꞌene Godoni kaukara vejiꞌini jihuni javaa vejara. ꞌEne Remui jihuni javaa ꞌuꞌo venareja ikaꞌina vejara.
Raka kaꞌene A venujaho niꞌimaꞌura ꞌee mavarasaꞌina. Oo Godi Natohwa A harusimaꞌura ariramaa ꞌee Oni ꞌunama nimaa nimaa ꞌee A kwaa kwaa kihipuni Kinia. ꞌEne ea irara Oni iha taꞌarorahe ꞌee A pajuhaꞌena? A aꞌasu nimaa arira maa. ꞌEne kwaa kwaakija Oni unaꞌi roe oja mahuna. Ara ariramaa kaꞌene venujara roe samaahirahuna ꞌwame vejara.
Uneunecha ikihipuni túnaꞌijino na niriꞌi kavume Hu Godi icháꞌini jihuni vuꞌa Temiporu kaꞌene harai vejaraꞌomo akúpa ꞌahi namujaho jarausahana. ꞌEꞌeme ꞌona ojiꞌina iropu noꞌo puni ija vaji sisea iropu noꞌo ꞌuninamie Temiporu vaji rene roe usevara. ꞌEne pu ateha nihoꞌo sajasaꞌini same ꞌee túra hwana kaꞌene korutia vejajino puni túra hwavara. ꞌEjume unenuꞌu ꞌahoꞌa maiꞌo hijiꞌina noꞌona noꞌo puni vajijino pini ꞌona ojiꞌina iropu noꞌo ijihija tevua korutia vejiꞌina iropu noꞌo vajihana. Ijí tevua kajaho Godi kaꞌene majama hijiꞌini jihuni seni ituꞌoꞌuma naviꞌina. ꞌEjumakame Temiporu vajijaho Godoni hanajiꞌina ꞌee Huni harurijara uꞌa punaꞌi ituꞌoꞌuna paranana. Ea pina Temiporu vaja kajaho nihoꞌo areri pavaꞌeje sisea iropu noꞌo kaꞌene ꞌona ojiꞌina iropu noꞌo ijipo ꞌuninamiajaho paꞌareꞌeje ijiꞌa túnaꞌi ea va aruhuna areri reꞌena.