1 PITA
KUIMP TEPA IK KɄⱠ
Ya Buk Ei Nga Puⱡ Ei:
Jisas mondʉk pʉtʉng wamp mbʉ, mbun mindil mbʉ tʉk ronduⱡ mundʉk, numan kai pilik kongun mbʉ, rʉk rʉk etʉk mint ping.
Ya Buk Ei, Nam Ndi Rurum:
Wu Pita ei, Jisas nga kitip kʉni wu ei ndi, ya mon ei rurum.
Mon Ropa Nam Ngurum:
Mon ei ropa, Jura wamp kʉⱡ kʉn, wamp rʉⱡaip elpa kʉⱡ kʉn, Eisiya kona ou ei nga, kona kel elpa elpa mbila mormun wamp kʉⱡ ngurum.
Ui Nant Ila Rurum:
AD 62-64 ui ei kʉn, Rom kona ila, Pita moⱡpa, mon ei rurum. Wu nuim mumuk Niro murum ui ei kʉn, Pita koⱡmba ui ei nondpa elinga, mon ei rurum.
Ik Ronduⱡ - 1Pita 1:7
Mbun mindil mbʉ ndi, tʉn nga mondpa pili orunga ronduⱡ mbun kun kai muⱡmin, muna mon, ei tʉn kanʉmba orum. Tʉn pʉtmʉn ni, ku gol pora nimba mel ei, ndip ila ruk nduk kalk, wote ekit tʉtmin. Ei mel, tʉn nga mondpa pili uⱡ ei, gol mel, kapⱡa mon. Ei nga, tʉn nga mondpa pili uⱡ ei, ndip mel ila ruk mba, wote kai etpa ekit omba. Wote, Jisas Kraist omba pena ila moⱡmba ui ou ila, enim nga mondpa pili uⱡ ei, rom kaip mbi ou ti uⱡ, tʉpa ou ndui uⱡ mbʉ, enim kapⱡa ting.
IK PENG KɄⱠ
Rump
1:1-2 - Pita nga mon kuimp tepa rurum kʉⱡ
1: 3-12 - Tʉn kont muⱡmin uⱡ ei, muⱡ kona nokundpa tetum
1:13-25 - Enim wamp Wingti ralk muⱡʉi
2:1-8 - Nuim ei, kont mul ku kai ei
2:9-10 - Enim, Got nga wamp rʉⱡaip mormin
2:11-17 - Got nga kongun kindmant wamp
2:18-25 - Tʉn mbun koma ropun, Kraist pep ramin
3:1-7 - Wu amp mbʉ nga man ik
3:8-22 - Tʉn numan tenda pangga muⱡʉmin
4: 1-6 - Kraist pep ruimin uⱡ ei mindil petʉm
4:7-11 - Kongun wu kai ei ndi Got nga kongun mbʉ rʉp etʉm
4:12-19 - Kraist kʉn mbʉn koma ruimin uⱡ ei
5:1-4 - Enim rʉp wu mbʉ ndi, Got nga wamp mbʉ rʉp itʉi!
5:5-11 - Tʉndʉn mep mana mbun, numan tenda pilamun
5:12-14 - Rawe ik kʉⱡ
1
Pita Nga Mon Kuimp Tepa Rurum Kʉⱡ
Na Pita, Jisas Kraist nga nombuⱡa rung wu. Na ndi, mon ei rop, enim Got nga wamp kat, mbi ropa, en enim nga mʉi mang kona ila wak rok, mbuⱡ mbaⱡ nʉk puk, kona Pontas, Galesiya, Kaparosiya, Eisiya na Bitiniya, kona mormin wamp kʉⱡ kʉn, mon rop ngunt. Enim Got Tipam ei ndi, unt kor nga pilpa pora ndupa, mbi ropa elim kʉn rukʉr titim. Muⱡnga Wingti ei ndi, enim etpa wamp wingti mbʉ mundangga, Jisas Kraist nga ik ei, teng nduk tangina, wote elim nga mema ei ndi, enim ⱡumʉi rangga. Got nga wamp poⱡ ti uⱡ, wote moⱡpa kundi uⱡ mbʉ, enim nga ruk ting ila tepa, peka ropa kuimba kuⱡangga!
Tʉn Kont Muⱡmin Uⱡ Ei, Muⱡ Kona Nokundpa Tetʉm
Tʉn pʉtmʉn ei, Got ndi tʉn wi ropa, ruk rung titim ei, elim nga uⱡ eng nui tetʉm ei kʉn, wote elim nga uⱡ kun kai tetʉm ila, kunda muⱡeimʉn nimba itim. Ei nga, Got elim nga ronduⱡ ila, tʉn uⱡ kun kai mbʉ, elim pʉtʉm ei mel pep rʉmin nimba, tʉn mel minal ngurum. Wote tʉn ndi, Got elim nga wamp mbʉ nga memp kai teing nimba tʉndʉtʉm mbʉ timin ei nga, nokundʉp mormun. Memp kai ei, wi muⱡ kona tʉndʉtʉm ei, purpa kit moⱡpa, wei ai iti natʉtʉm mon! Enim Got kʉn mondʉk pilingina, wote elim nga ronduⱡ ei ndi, enim nokundʉk nga molk kai mondunmin. Enim etpa tʉmba uⱡ ei, muⱡ mʉi raⱡ pora nimba ui ou ila, ekit omba ei nga tʉpa kun etpa tetʉm. Uⱡ ei nga, numan kai pilik muⱡʉi! Akup ya mʉi kona ila ui onunga kʉⱡ ila, oⱡa tʉpa, kʉni uⱡ mbila ou ndupa, mbun mindil tʉnmʉn. Mbun mindil mbʉ ndi, tʉn nga mondpa pili orunga, ronduⱡ mbun kun kai muⱡmin, muna mon, ei tʉn kanʉmba orum. Tʉn pʉtmʉn ni, ku gol pora nimba mel ei, ndip ila ruk nduk kalk, wote ekit tʉtmin. Ei mel, tʉn nga mondpa pili uⱡ ei, gol mel, kapⱡa mon! Ei nga, tʉn nga mondpa pili uⱡ ei, ndip mel ila ruk mba, wote kai etpa ekit omba. Wote, Jisas Kraist omba pena ila moⱡmba ui ou ila, enim nga mondpa pili uⱡ ei, rom kaip, mbi ou ti uⱡ, tʉpa ou ndui uⱡ mbʉ, enim kapⱡa ting. 8-9 Enim Jisas kʉni nakʉndʉrmin kep, enim nga numan ei, elim kʉn tetmin. Enim akup elim kʉni nakʉnmin, wote mondpa pili uⱡ ei, ambulk mormin. Ei ndi, enim nga mondpa pili orunga, ting mel ei, tʉnmin ei, min orunga etpa ti uⱡ ei, uⱡ i etʉk, ambulk palk, numan ti elpa elinga mormin. 10 Painui wu kʉⱡ ndi, etpa ti uⱡ ei nga ik puⱡ ei, etʉp pilmin nʉk pilik, kongundʉk kurʉk puk, wote Got nga wamp gem ui uⱡ ei, enim ngumba ei nga, ik pai nok nʉtʉng. 11 Ni kʉn, etpa ti uⱡ ei, ui nant kʉn omba, wote etpa omba mel nant, ik puⱡ ei nga kombulk pʉtʉng ku. Ui ei kʉn, Kraist nga Muⱡnga ei, ik painui wu mbʉ kʉn, omba moⱡpa, Kraist wote omba, mindil nomba, mbi ou tʉpa etmba ei nga, kuimp tepa Muⱡnga ei ndi, oⱡa tʉpa unt nitim. 12 Got ndi, painui wu kʉⱡ, en enim nga uⱡ ti enmin nʉk, pili nʉpʉlʉi nimba, para ndupa ngurum. Ei mon, akup enim wamp mormin kʉⱡ nga ik nʉndʉtʉng. Ei nombuⱡa rung wu mbʉ ndi, Rʉnang Ik Kai ei, muⱡ kona Muⱡnga Wingti tenda ei nga ronduⱡ ila ku, uⱡ mbʉ nga nʉk nguⱡungina pʉnmʉn. Wote anggelo mbʉ, ndi kunda uⱡ mbʉ pilip tamʉn, ka nʉk pʉtmʉn ku.
Enim Wamp Wingti Ralk Muⱡʉi
13 Ei nga, enim nga numan orunga tʉk kun mundʉk, tʉk mendʉk muⱡʉi! Enim nga numan tenda pendʉk, Jisas Kraist omba pena ila moⱡum ei, Got nga pol ti uⱡ nʉk nokundʉk muⱡʉi! 14 Unt enim pilik kun iti natʉk, uⱡ kit mbila ki nguk, uⱡ kit mbʉ nga numan nguk etʉng. Uⱡ mbʉ wak rok, akup Got nga kangambuⱡa ralk molk, elim nga ik ei teng ndʉi! 15 Wote Got ndi, enim wi ropa rukʉr tʉpa, wamp wingti kʉⱡ muⱡʉi nʉtʉm. Ei mel uⱡ, namba uⱡ eng mbila, wamp wingti ralk muⱡʉi! 16 Buk Wingti ei ndi, nimba mel,
“Na wingti mor ei mel, enim wingti ku muⱡʉi!” nʉtʉm.
17 Enim Got kʉn atinga rok, mbi tek, Wuta nʉtmin ei ndi, wamp pora, en enim nga namba uⱡ etmin mbʉ, to tenda ila mint kʉmp tʉtʉm. Ei nga, ya mʉi kona ila ui onunga monmʉn kʉⱡ ila, Got nga mundmong endʉk, pek muⱡʉi! 18 Enim pʉtmin ni, unt enim nga anda kouwʉ kʉⱡ nga uⱡ kit mbo rondrʉng uⱡ mbila, kandʉk tʉk pep rok morung. Ei kʉn, namba mel ti ndi, enim etpa kan pilinga ndurum ei, pilik mormin. Ku gol, silpa mel mbʉ nga ronduⱡ pi purum. Wote ei ndi, iti nʉtʉtʉm mon! 19 Wote, Kraist nga mema ei, ronduⱡ minal petʉm ei ndi, enim etpa titim. Kraist ei, kng sipsip waⱡ na ti, kʉng nit pi nʉpi, ni mel ku. 20 Unt Got ndi, mel kanmʉn mbʉ pora, mim iti nʉti kʉn, Kraist mbi ropa oⱡa tʉpa, kongun ei tangga nitim. Akup ui pora ninim ila, enim nga nʉndpa kʉn, Kraist enim kʉn etpa mot ndunʉm. 21 Ei kʉn, Kraist ndi, enim tʉpa rapundʉⱡnga, Got kʉn mondʉk pʉnmʉn. Got elim ndi, Kraist on kona ila ⱡoporpa oⱡa tʉpa, mbi ou oⱡa orunga ngurum. Ei nga, enim Got mondʉk pilik, omba tʉmba ei nga numan kai pilik, kel rondʉk nokundʉk mormin.
22 Akup, enim ik kupa ei pilik tʉk, pep rok enmin ei ndi, enim nga uⱡ kit mbʉ, ⱡumʉi roⱡnga, min orunga etʉk kai mondunmin. Wote, enim nga mondpa pili wamp mormin mbʉ, numan ngunmin. Ei mel ku, ronduⱡ mundʉk angmʉn mbʉ pora, numan nguk muⱡʉi! 23 Ei kʉn, Got nga ik kont mba, uⱡ nga kʉnt nga tetʉm ik ila, enim rʉng mbo na, ni mel kont paka mila rong. Enim kangambuⱡa kel mel, kokila meng kʉⱡ, tipam ei, kuⱡi nakʉrʉm kont mba moⱡpa mint purum. 24 Buk Wingti ndi, ei nimba mel,
“Wamp mbʉ pora, ʉi ongum na mel penʉm mbʉ mel kapⱡa, Wote, wamp nga kʉng orunga mel tetʉm mbʉ, ʉi ongum kuk ronum ei mel kapⱡa. Wote, ʉi ongum ei, korum ei kʉn, elim nga kuk ropa, ekit ndurum ei, koⱡpa mana purum. 25 Wote, Nuim ei nga ik ei, uⱡ nga kʉnt nga kont tepa mint purum,” nʉtʉm.
Ik ei, Rʉnang Ik Kai int enim kʉn, urum ik waⱡʉm ei.