3
Yona Ila Ninibe
1 Baing Toxoratamona sina haruanga na Yona muli ba: 2 “Umesa ula mana long sabangga Ninibe, ubaxanga na lipuxindi haruangua ngasina naung ba.”
3 Baing ina naga, Yona lungu Toxoratamona haruanganoa saing mesa ila Ninibe. Ne Ninibe long sabanga sibuna sangaʼm uhaxa xaidap luwa hiliana. 4 Xaidap mugamugangam Yona luxu mana longa, baxanga baxanga ba, “Xaidap 40 disup, baing Ninibe bagula hanggalang masup!” 5 Baing Ninibedi dahatum haringina mana Urana haruanganoa. Dahau hatumingua ba disaha mana angingua saing ding longgalo—yanamdi xaung xoliandi—ding disau imang usingangamdi bu dahatanga ba duxugia hatumingadingdi.
6 Bungina Ninibe xaitamoxidinga lungu Yona haruanganoa, mesa kabukabung xaitamoxiamia, unia imanging xaitamoxiamdi, sau imang usingangamdi, saing rung hayatia. 7 Baing habatia hanaunaunga tela na Ninibeamdi ba:
“Xaitamoxi gabu yanamigudi am gatabina nang ba:
“Ang mana, labu angia tela xang nung axamang telau tai. Asaxaim nangnangdi xauna, labu daxang dinunggu tai. 8 Ning asau imang usingangamdi. Atadi mana asaxaimdi xauna. Ang longgalo asabu haringina na Urana. Ayamu kuboluim diandi xaung kuboluimdi alibu doa mang. 9 Nabu talibu bila ba, bola Urana xugia hatuminganoa makira xaung sauya ating salianoa, bu tamati te.”
10 Urana bagu dilibu baru, bagu disauya kuboluding diandi baru, baing xugia hatuminganoa mana daxap doa bila hau manadi ba, saing libu te.