Ulek Xaiya Matyu Bung
Matyu
Namua Matyu Bung Xailonginoa
Matyu bung xailongina mala rangua Yudadi bu hatanga maxung sibuna Yesu ina Urana Lipuxing Mogunganama xaung xaitamoxidinga. Waleu sibuna Urana lipuxing suxunguxunguamdi dibung haruangadinga Urana Xuang Mugamugangamia, daharua ba Urana bagula soxi Lipuxing Mogunganama ma bu xap lipu Isreliamdi muli. Baing Matyu hatanga ba Yesu libu haruangadinga aningona baru.
Matyu xailongina ila muga mana ulek xaiya luwadi luwadi namua na xailongina xai sibuna mana sigi Urana Xuang Mugamugangama xaung Urana Xuang Hauna.
Lipu Buningama
Aposel Matyu bung xailongga li. Bung mana Grik xuana. Ina lipu takis xabinganam tela muga mana Yesu wagi (Matyu 9:9-13). Kimuya Yesu mogu ina Aposel 12 tela (10:1-4). Yuda tela, yan tela Libai (Mak 2:14-15). Bung xailonginoa liwe mana niani AD 60-70.
Haruanga Tuandi
• Yesu bauna hayau xaung bungina wa gara (1:1–2:23)
• Yesu oxatang unggutinganoa (3:1–4:11)
• Yesu tuxu oxatanoa titia Galili (4:12–14:12)
• Yesu yunga Galili saing tubatuba mana titi teladi (14:13–17:20)
• Yesu goxoya mala Galili saing tubatuba muli (17:22–18:35)
• Yesu tuxu oxatanoa titiadi Yudia xaung Peria (19:1–20:34)
• Axamandi disok xaidap teladi muga mana Yesu mati makira (21:1–27:66)
• Urana iti Yesu mesa muli (28:1-20)
1
Yesu Mugangandi
(Luk 3:23-38)
1 Alali harua mana Yesu, Urana Lipuxing Mogunganama, mugangandi. Yesu mugangandi Xaitamoxi Debit xaung Ebraham tang.*Ebraham Yudadi mugangading mugamugangama. Niani xumana kimu mana Ebraham mati, Yuda xumana baing Urana mogu Xaitamoxi Debit bu wa etua manadi. Urana baladi ba bagula mogu Debit sibing tela ma kimu mana bu wa etua manadi, saing lipua ba haringinganoa bagula sabanga mana Debit. Haruanga baguli hatanga ba Yesu Kristo lipua naga Urana mogu.
2 Ebraham Aisak tibuna.
Aisak Yekop tibuna.
Yekop Yuda gabu sabangandi xaung kixingindi tibuding.
3 Yuda Peres Sera tang tibuding (ne tang bauding Tema).
Peres Hesron tibuna.
Hesron Ram tibuna.
4 Ram Aminadap tibuna.
Aminadap Nason tibuna.
Nason Salmon tibuna.
5 Salmon Boas tibuna (bauna Rehap).
Boas Obet tibuna (bauna Rut).
Obet Yesi tibuna.
6 Yesi Xaitamoxi Debit tibuna.
Debit Solomon tibuna (bauna Batsiba, muga Yuraya haininoa).
7 Solomon Rehaboam tibuna.
Rehaboam Abitsa tibuna.
Abitsa Asa tibuna.
8 Asa Yehosapat tibuna.
Yehosapat Yehoram tibuna.
Yehoram Usaya muganganoa.
9 Usaya Yotam tibuna.
Yotam Ahas tibuna.
Ahas Hesakaya tibuna.
10 Hesakaya Manasa tibuna.
Manasa Amon tibuna.
Amon Yosaya tibuna.
11 Yosaya Yekonaya xaung kixingindi tibuding (duwa bungina Babilondi didali Isreldi, daxaidi mala titidingia bu duwa lipuxiding salak yabanamdi).
12 Kimuya mana Babilondi daxai Isreldi mala Babilon bu duwa lipuxiding salak yabanamdi:
Yekonaya Sealtiel tibuna.
Sealtiel Serubabel tibuna.
13 Serubabel Abiud tibuna.
Abiud Eliakim tibuna.
Eliakim Aso tibuna.
14 Aso Sedok tibuna.
Sedok Akim tibuna.
Akim Eliud tibuna.
15 Eliud Eliesa tibuna.
Eliesa Matan tibuna.
Matan Yekop tibuna.
16 Yekop Yosep tibuna. Yosep Maria ayuana.
Maria hayau Yesu, ina duxu ba Urana Lipuxing Mogunganama.
17 Baing ina naga, bakbakkadi mana Ebraham laing Xaitamoxi Debit bing 14, baing 14 mana bungina Debit laing Babilondi daxai Isreldi mala Babilon bu duwa lipuxiding salak yabanamdi, baing 14 mana bungina Babilondi daxai Isreldi mala Babilon laing bungina Urana Lipuxing Mogunganama.
Yesu Hayauxinganoa
(Luk 2:1-7)
18 Naxuyanga mana Yesu Kristo sok bing bila li. Bauna Maria dahau gabisia mana ba bagula yau Yosep. Ne muga mana tang duwa xauna teguyu, Maria bagu ina ba gamona. Ne Urana Aningonoa haringinganoa libu. 19 Yosep, lipua lipudi dibagu bila ayuanoa, bing lipu maringing tela. Binabu hau hatumingua ba taxiti haruanga dahau ba. Ne bo ba sina memeya na te, binabu hatum ba taxiti lipudi maxadingia te.
20 Hatum mana malauyu, baing Toxoratamona uleginam tela†Muga mana Urana tongtongia lipudi, tongtongia uleginamdi bu duwa lipuxing oxatanamdi long xaiya. sok mana maluxu mibingia. Harua ba, “Yosep, Xaitamoxi Debit garanoa, labu umaxuwau tai mana ulibu doa nabu uyau Maria. Bila ba te. Namua na gara ba wa gamonia bing Urana Aningonoa haringinganoa xap masok. Binabu oxop hainima. 21 Baing bagula hayau gara lup tela, saing usina yaya Yesu‡Yesu—Mana Yudadi xuadinga, Yesu namuxina bing Urana xapdi muli. na, namua na bagula xap lipudi muli sangua kuboluding diandi.”
22 Axadi bagudi li disok bu libu Toxoratamona haruanganoa aningona, harua waleu lipuxing suxunguxunguama§Urana lipuxing suxunguxunguama Aisaya—Aisaya bung haruanga li niani 700 muga mana Yesu hayauxinganoa. Urana lipuxing suxunguxunguama bing lipu tela baxanga Urana haruanganoa. Bunging teladi baxanga muga mana axamang tela sok teguyu. Aisaya suxungunia ba:
23 “Alungu to! Haing nanung tela xabia luba teguyu bagula gamona!
Bagula hayau gara lup tela,
saing bagula duxu ba Imanyuel,✡Aisaya (Aisaia) 7:14
namuxina ba, ‘Urana wa rangua kira.’ ”
24 Bungina Yosep mesa, libu haruanga Toxoratamona uleginama tabina, saing xap Maria ila numia bila haininoa. 25 Ne kinu rangua te laing hayau garang lup. Baing sina yaya Yesu na.
*1:1 Ebraham Yudadi mugangading mugamugangama. Niani xumana kimu mana Ebraham mati, Yuda xumana baing Urana mogu Xaitamoxi Debit bu wa etua manadi. Urana baladi ba bagula mogu Debit sibing tela ma kimu mana bu wa etua manadi, saing lipua ba haringinganoa bagula sabanga mana Debit. Haruanga baguli hatanga ba Yesu Kristo lipua naga Urana mogu.
†1:20 Muga mana Urana tongtongia lipudi, tongtongia uleginamdi bu duwa lipuxing oxatanamdi long xaiya.
‡1:21 Yesu—Mana Yudadi xuadinga, Yesu namuxina bing Urana xapdi muli.
§1:22 Urana lipuxing suxunguxunguama Aisaya—Aisaya bung haruanga li niani 700 muga mana Yesu hayauxinganoa. Urana lipuxing suxunguxunguama bing lipu tela baxanga Urana haruanganoa. Bunging teladi baxanga muga mana axamang tela sok teguyu.
✡1:23 Aisaya (Aisaia) 7:14