11
Yesu Luxu Yerusalem Bila Xaitamoxi
(Matyu 21:1-9; Luk 19:29-38; Yon 12:12-15)
1 Yesu gabu lipuxindi dinaxu mana dima haxek monga mana long sabangga Yerusalem, baing disok haxek mana long luwa Betpets, Betani duwa Xaxagania Olip. Yesu soxi lipuxing luwa dinaxu mana mala, 2 harua nadi ba, “Tang galuxu mana longga wa mugamugangia to. Haxek sibuna ba aluxu, bagula abagu donki*donki asaxa tela xoxi lipudi. haun tela digoti la ba, lipu tela rung mana teguyu. Tang galuba saing axai ma. 3 Nabu lipu tela xusungang ba, ‘Baruta tang galibu bila ba?’, bing tang gabala ba, ‘Toxoratamona oxatana mana. Bagula soxi ma muli sap.’ ”
4 Baing dilauba, dibagu donki hauna lipudi digoti numa tela xaluxing singia, wa daxanga sabangia. Bungina diluba, 5 lipu teladi dili mua la ba duxusunga ba, “Tang garaxata? Baruta aluba donki ba?” 6 Baing tang dahaxuya bila Yesu harua nadi ba. Dilungudi baing tang dilauba. 7 Baing daxap donki ma rangua Yesu, diting imangiding sabangadi mahaing, saking Yesu rung etua mana. 8 Lipu xumana duxa imangiding sabangadi daxangia bu dahatanga ba lipu yayam sabanga, saing teladi ditaxiti xai rimandi umangia saing duxadi daxangia. 9 Baing lipudi dimuga mana gabu lipudi disu mana ding duwagi ba,
“Taiti Urana yanoa!”
“Urana sina guxama na lipua li ma mana Toxoratamona yanoa ba!”✡Olaidi (Buk Song) 118:25-26
10 “Urana sina guxama na mugangaroa Debit Yonggaxinoa, bagula sok muli!”
“Taiti Urana Eta Loam Sibuna yanoa!”
11 Baing Yesu luxu Yerusalem saing luxu Urana Numang yabania. Haxa mauli maluxu, bagu axamandi laing sup baing yambongguba. Binabu gabu Lipu 12 dila disok mala Betani.
Yesu Suka Lipu Siang Oxatanamdi Sangua Urana Numanoa
(Matyu 21:12-16,18-22; Luk 19:45-47; Yon 2:13-16)
12 Buragina baing diyunga Betani, dilauba saing Yesu gesagina. 13 Bagu mala saing bagu xai xangingam tela duxu ba pik, lonam. Ila haxek mana bu sai mana marandi. Sok mana, baing tegu, long ding ganiding duwa namua na xaiya pik nianinoa teguyu. 14 Baing harua na xaiya ba, “Sanga ba lipu tela xang maramdi muli te.” Baing lipuxindi dinaxu mana dilungu haruanga baguba.
15 Bungina disok Yerusalem, Yesu luxu Urana Numang yabania saing suka lipuadi digim disina axamandi mana sianga maluxu Urana Numania masokkuba. Matuxuya lipu siang hakhaxuyanganamdi kabukabudingdi xaung lipu gumak sinaikkamdi kabukabuding rungingamdi. 16 Baing bili lipudi mana disiasia axamandi mala ma makisi Urana Numang yabaniau tai. 17 Baing tubatubadi, harua nadi ba, “Aisaya bung Urana Xuania ba Urana harua ba,
“ ‘Numagua bagula duxu ba
numa sabungam mana numanuma longgalo.’✡Aisaya (Aisaia) 56:7
Ne ang gaxugia mala bila ‘guha tela lipu hanaunggamdi dihisa maluxu mana!’✡Yeremaya (Jeremaia) 7:11 ”
18 Lipu hananiangamdi yanamidingdi digabu lipu hanaunaunga tubatubainganamdi dilungu haruanga baguba, baing dungguti disai daxanga tela bu dung Yesu mati. Dimaxuwa mana, namua na lipu buranga dihixi mana tubatubainganoa.
19 Yambong baing disok sangua long sabangga ba.
Xaiya Pik Mutuxu Ba
(Matyu 21:19-22)
20 Buraragina bungina dahaxa malau, dibagu xaiya pik. Mutuxu masup, oxaxandi xauna. 21 Pita hatum muli saing harua na Yesu ba, “Lipu Tubatubaingam, ubagu lo! Xaiya pik ugamia ba, mutuxu ba!”
22 Yesu haxuya nadi ba, “Ahatum haringina mana Urana. 23 Maxung sibuna ngabalang ba, lipu gaxarea harua na bimbia li ba, ‘Umesa, utinggung mari tegia’, xaung hatumingang luwa te, ne hatum haringina mana axa harua mana ba bagula sok, bing bagula Urana libu mana. 24 Binabu ngabalang ba, baraxing baraxinta axusunga sabungia, nabu ahatum haringina bila axap masup ba, bing bagula axap. 25-26 Baing bungina ali asabu mua, nabu ahatum muli mana axamang diana lipu tela libu mang, bing ayunga kubolunoa. Baing ina naga Tibuim, ina wa long xaiya, bagula yunga kuboluim diandi xauna.”†Buninga teladi daharua ba …xauna. 26 Ne, nabu ayunga te, bing Tibuim, ina wa long xaiya, bagula yunga kuboluim diandi te.
Gaxarea Sina Haringinga Na Yesu?
(Matyu 21:23-27; Luk 20:1-8)
27 Yesu gabu lipudi dinaxu mana disok Yerusalem muli. Bungina Yesu haxa mua maluxu Urana Numang yabania, lipu hananiangamdi yanamidingdi, lipu hanaunaunga tubatubainganamdi xaung lipu haringindi dima rangua, 28 duxusunga ba, “Oxop yaya ba rangua gaxarea bu ulibu axadi bagudi li? Gaxarea mogung ba ulibudi?”
29 Yesu haxuya ba, “Bagula ngaxusungang xusunganga tela to. Ahaxuya xusungangagua, bing bagula ngabaxanga ngaxap yaya ba rangua gaxarea bu ngalibu axadi bagudi li. 30 Tauna, bungina Yon sugua lipudi—Gaxarea sina yaya na bu libu? Urana kimbo lipudi? Abaxanga nanga!”
31 Dahangixaya liwe mading ba, “Nabu taharua ba, ‘Urana sina,’ bing bagula xusunga kira ba, ‘Ne baruta ahatum haringina mana Yon te?’ 32 Ne nabu taharua ba, ‘Lipudi disina,’ bing laku!” (Dimaxuwa lipudi, namua na lipu longgalo dahatum ba Yon ba Urana lipuxing suxunguxunguam sibung tela.)
33 Baing ina naga, dahaxuya ba, “Am gaxabia te.”
Baing Yesu haxuya ba, “Tauna, nga xauna, bagula ngabalang te ba gaxarea sina yaya nanga bu ngalibu axadi bagudi li.”