10
1 Riagu hatuminga haringinam mana, murungagu sabangua xaung axa ngasabu na Urana haringina mana bing xap Isreldi muli. 2 Maxung sibuna ngabaxanga ba dahaxi mana dilibu Urana murunganoa. Ning daxabia Urana daxanganoa rangrang te. 3 Dahasuxi mana Urana daxanganoa mana libu lipudi disok maringina maxania, binabu dituba ba ditongtongia ding daxangadinga. Bila balau dila hawa mana Urana daxangang maringinama te. 4 Ne hanaunaungua ma xung mana Kristo, bu lipu gaxarea dahatum haringina mana bagula disok maringina Urana maxania.
5 Hatuminga mana daxanga mana lipudi disok maringina mana disu mana hanaunaungua, Moses bung mana ba, “Lipu gaxarea disu maringing sibuna mana hanaunaunga longgalo bagula daxap walinga subingang teguama.”✡Lipu Hananiangam Oxatanoa (Wok Pris) 18:5 6 Ning Urana Xuanoa harua mana daxanga hatuminga haringinama mana lipudi disok maringina bila li: “Labu uharua hatumingamia bila liu tai: ‘Gaxarea bagula haing mala long xaiya?’ ”✡Hanaunaunga (Lo) 30:13 (Xusunganga baguba namuxina bing gaxarea bagula haing mala saing xap Kristo mari.) 7 “Kimbo labu uharua hatumingamia bila liu tai: ‘Gaxarea bagula ri mala lipu matiandi Mabidingia?’ ”✡Hanaunaunga (Lo) 30:13 (Xusunganga baguba namuxina bing gaxarea bagula ri mala bu iti Kristo mesa muli.) 8 Ning lipu gaxarea wa maringina mana daxanga hatuminga haringinama harua ba, “Ulega mosi mana usu mana. Wa suxungumia xaung hatumingamia.”✡Hanaunaunga (Lo) 30:14 Ulekka ba harua mana daxanga hatuminga haringinama am gabaxanga. 9 Haruanga ba bing nabu ubaxanga suxungumia ba, “Yesu ina Toxoratamona,” xaung uhatum haringina hatumingamia ba Urana iti mesa mana matiyua, bing Urana bagula xapkung muli. 10 Namua na mana hatumingama uhatum haringina bing usok maringina Urana maxania, xaung mana suxunguma ubaxanga bing Urana xapkung muli. 11 Namua na Urana Xuanoa harua mana Lipuxing Mogunganama ba, “Lipu gaxarea dahatum haringina mana bagula memeyading te.”✡Aisaya (Aisaia) 28:16 12 Yudadi xaung Yuda Teguamdi duwa hasusu mana haruanga baguba. Ding Toxoratamona dingia taininau. Ina Toxoratamona mana lipu longgalo, saing hatuminganoa mesa sabanga mana lipu gaxarea duwagi mana ba haulidi. 13 Namua na “Lipu gaxarea duwagi mana Toxoratamona ba haulidi, Toxoratamona bagula xapdi muli.”✡Yoel (Joel) 2:32
14 Ne sanga ba duxusunga ba haulidi baru nabu dahatum haringina mana te? Baing sanga ba dahatum haringina mana baru, nabu dilungu te? Baing sanga ba dilungu baru, nabu lipu tela baxanga nadi te? 15 Baing sanga ba dibaxanga nadi baru, nabu Urana soxidi mala te? Bila haruanga wa Urana Xuania ba, “Lipudi dibaxanga ulek xaiyua bing malingadinga xai sibuna!”✡Aisaya (Aisaia) 52:7
16 Ning Isrel longgalo daxap ulek xaiya ba te! Namua na Aisaya harua ba, “Toxoratamona, lipu tela hatum haringina mana haruangamamdi te!”✡Aisaya (Aisaia) 53:1 17 Baing ina naga, lipudi dahatum haringina mana Kristo namua na dilungu ulega, saing dilungu ulega namua na lipudi dibaxanga Kristo nadi. 18 Ne ngaxusunga ba, maxuna dilungu ulek xaiya ba, lo? Wane, maxung sibuna dilungu ba! Bila dibung mana Olaidi ba:
“Waxudingtuandi*Waxudingtuandi…haruangadingdi—Haruanga ba harua mana xaidaba, sobaga xaung hatungdi disina mari mana long longgalo, binabu bila waxudingtuandi xaung haruangadingdi dibaxagi mana long longgalo titia. disup mala mana long longgalo,
haruangadingdi dila mana titi subingandi ba.”✡Olaidi (Buk Song) 19:4
19 Ne ngaxusunga muli ba, maxuna Isreldi daxabia Urana uleginoa rangrang ba? Wane, maxung sibuna daxabia ba! Ne dududing. Moses lipu mugamugangam harua mana alaba bungina bung haruangua Urana harua na Isreldi ba:
“Bagula ngalibuang ahatum doa mana lipuadi doxola yaya maxagia,
bagula ngalibuang ba atim disala mana lipuadi ahagaxa ba lipu kakahandi.”✡Hanaunaunga (Lo) 32:21
20 Baing kimuya Aisaya harua haringina bungina bung Urana haruanganoa ba:
“Lipuadi disai manga te, ding disok manga.
Baing ngahatanga nga na lipuadi duxusunga manga te.”✡Aisaya (Aisaia) 65:1
21 Ning mana Isreldi, Aisaya bung Urana haruanganoa manadi ba:
“Buraraging sibuna ila bungbung ngata rimagudi mala rangua lipuadi ba xapdi ma muli,
ne dududing xaung toxodingdi daharing.”✡Aisaya (Aisaia) 65:2
✡10:5 Lipu Hananiangam Oxatanoa (Wok Pris) 18:5
✡10:6 Hanaunaunga (Lo) 30:13
✡10:7 Hanaunaunga (Lo) 30:13
✡10:8 Hanaunaunga (Lo) 30:14
✡10:11 Aisaya (Aisaia) 28:16
✡10:13 Yoel (Joel) 2:32
✡10:15 Aisaya (Aisaia) 52:7
✡10:16 Aisaya (Aisaia) 53:1
*10:18 Waxudingtuandi…haruangadingdi—Haruanga ba harua mana xaidaba, sobaga xaung hatungdi disina mari mana long longgalo, binabu bila waxudingtuandi xaung haruangadingdi dibaxagi mana long longgalo titia.
✡10:18 Olaidi (Buk Song) 19:4
✡10:19 Hanaunaunga (Lo) 32:21
✡10:20 Aisaya (Aisaia) 65:1
✡10:21 Aisaya (Aisaia) 65:2