1 Ikoukou igimadia taudia edia orea bini. Kora taudia edia amo: Meselemia Kore, Asaf natuna ta. 2 Meselemia na mai natuna haida: tau-roboana na Sekaria, iharuana na lediaele, ihatoina na Sebadia, ihahanina na Iataniele, 3 iha-imana na Elam, ihatauratoina na Iehohanan, ihahituna na Eliehoenai. 4 Obed-edom danu na mai natuna haida: tau-roboana na Semaia, iharuana na Iehosabad, ihatoina na Ioa, ihahanina na Sakara, iha-imana na Netanele, 5 ihatauratoina na Amiele, ihahituna na Isakara, ihataurahanina na Peuletai; badina be Dirava ese e hanamoa. 6 Ia natuna Semaia ese danu natuna mamaruanedia haida e havaradia; idia na edia iduhu kwaradia, badina be idia na mai dibadia momo taudia. 7 Semaia natuna: Otni, Refaele, Obed, Elsabad; Elsabad tadikakana Elihu bona Semakia na mai dibadia momo taudia. 8 Ini iboudiai na Obed-edom natuna, bona idia natudia bona tadikakadia, mai dibadia momo taudia, edia diba vada e heḡereḡere ḡaukara ikarana ai, iboudiai na tauratoi-ahui rua, Obed-edom garana amo. 9 Meselemia na mai natuna bona tadikakana, mai dibadia momo taudia, gwauta-taurahani. 10 Bona Hosa, Merari garana ta, danu na mai natuna haida: Simri, tau lohia, (ia na dia tau-roboana, a tamana ese lohia tauna ai e halaoa); 11 ihararuana na Hilkia; ihatatoina na Tebalia; ihahahanina na Sekaria. Hosa natuna bona tadikakana iboudiai na gwauta-toi.

12 Ini ikoukou igimadia taudia edia orea, ta ta mai edia lohia taudia, na mai edia ḡaukara Iehova ena dubu ḡaukaradia ikaradia ai, tadikakadia heḡereḡeredia. 13 Iduhu ta ta ai, edia ikoukou iduanai-henidia totona, mari e abi, maraḡidia bona badadia heḡereḡere. 14 Mari ese Selemia e duanaia, laurabada kahana ena. Ia natuna Sekaria danu, hahealo tauna ta mai aonegana, na mari ese e duanaia, mirigini kahana ena. 15 Obed-edom na e duanaia, diho kahana ena, bona natuna na habou-habou rumana ena. 16 Supim bona Hosa na e duanaidia, lahara kahana ena; Salekete ikoukouna na unuseni ai, e dae laomu dalana ai. Edia nega edia nega ai e gima. 17 Laurabada kahana ai na tatau tauratoi, dina ta ta ai; mirigini kahana ai na hahani, dina ta ta ai; diho kahana ai danu hahani, dina ta ta ai; bona habou-habou rumana ai rarua rarua amo. 18 Lahara kahana dehena ai na tatau hahani dala ai bona rarua dehe ai. 19 Ikoukou igimadia taudia edia orea bunu; idia na Kora taudia bona Merari garana.

20 Ahia, Levi iduhuna tauna, ese Dirava ena dubu kohudia bona herahia helaḡadia ihaboudia rumadia e nariva. 21 Ladan natuna, Gereson iduhuna taudia Ladan ena amo e vara, Gereson iduhuna ikwarana taudia Ladan, tau Gereson, ena amo e vara: Iehieli.

22 Iehieli natuna, Setama bona tadina Ioel ese Iehova ena dubu kohudia ihaboudia rumadia e nariva. 23 Amram bona Isahara bona Heberon bona Usiele iduhudia amo: 24 Sebuele (ia na Geresom garana bona Geresom na Mose garana) na habou-habou rumadia itataodia tauna badana. 25 Ia tadikakana: Eliesere ena amo, natuna Rehabia; ia natuna Iesaia; ia natuna Ioram; ia natuna Sikri; ia natuna Selomoto. 26 Hari Selomoto bona tadikakana ese herahia helaḡadia hanua pavapavana David bona iduhu kwaradia bona daha biagudia bona sinahu biagudia bona tuari oreadia biagudia ese e hahelaḡadia gaudia, ihaboudia rumadia iboudiai na e itadia taova. 27 Tuari ai e abi kohudia amo idia ese herahia ḡaudia e hahelaḡadia, Iehova ena dubu inanatalaina ḡaudia ai baela. 28 Bona mata-hanai tauna Samuel, bona Saulo Kisa, bona Abnere Nere, bona Ioab Seruia, ese e hahelaḡadia ḡaudia danu; herahia helaḡadia iboudiai na Selomoto mai tadikakana ida ese e nariva.

29 Isihara iduhuna amo, Kenania mai natuna ida e duanaidia, murimuri kahana ḡaukaradia bae kara, Israel ena; heitatao taudia bona hahemaoro taudia ai baela. 30 Heberon iduhuna amo, Hasabia mai tadikakana ida, mai dibadia momo taudia daha-ta sinahu-hitu, ese Israel tanona Ioridane sinavaina lahara kahana e itaia taova, Iehova ena ḡaukara iboudiai lalodiai, bona hanua pavapavana isiaina ilao-henina danu. 31 Heberon iduhuna lalona amo leria na Heberon iduhudia idau-idau iboudiai edia lohia. (David ena lohia laḡanina ihahari-ahuina ai hetahu e karaia, bena mai dibadia momo taudia haida na idia bogaragidiai e davaridia, lasere, Gilead hanuana ta, ai.) 32 King David ese ia mai tadikakana ida e duanaidia, mai dibadia momo taudia daha-rua sinahu-hitu, iduhu kwaradia, Ruben bona Gad iduhudia bona Manase iduhu-kahana taudia na idia ese bae itadia tao, Dirava ena ḡaukara iboudiai lalodiai, bona hanua pavapavana ena ḡaukara ai danu.