1 David, hanua pavapavana, ese hebou taudia iboudiai e hamaorodia, eto, Natugu Solomon sibona na Dirava ena abi-hidi tauna, to ia na eregabe, bona ḡaukara ai do asine manada; ḡaukara danu bada herea, badina be ina ruma badana na dia taunimanima edia, a Dirava Iehova ena. 2 Taunabunai, egu Dirava ena dubu kohudia vada na heḡaeḡaelai, egu goada heḡereḡerena: gold, gold gaudia edia; silver, silver ḡaudia edia; bronze, bronze ḡaudia edia; auri, auri ḡaudia edia; au, au ḡaudia edia; bona onuku nadidia, bona herahera nadidia haida, puku*“Bronze” na auri labora-laborana ta ladana. “Onuku” bona “puku” na herahera nadidia rua ladadia, Heberu gado ai. nadidia, oromadia idau-idau nadidia, dava-bada nadidia idau-idau, bona nadi hururu-hururudia. 3 Ina danu, egu Dirava ena dubu na lalokau heniamu dainai, ini ruma helaḡa kohuna iboudiai na habou latadiai lauegu kohu korikori, gold bona silver, na egu Dirava ena dubu na heniamu: 4 gold talent daha-toi, Ofiri gold-na, bona silver ḡoeva-daena talent daha-hitu,†Talent daha-toi = 150 tonnes sisivana. Talent daha-hitu = 350 tonnes sisivana. dubu habana igovalaidia; 5 bona karakara ai ima-namo taudia edia ḡaukara iboudiai ikaralaidia gaudia, gold, gold ḡaudia edia, bona silver, silver ḡaudia edia. Daika na hari ina dina ai mai ura-kwalimuna ida sibona baine heato lasi Iehova enai?

6 Bena iduhu kwaradia ese edia herahia ḡaudia e heni, bona iduhu lohiadia bona daha bona sinahu lohiadia bona hanua pavapavana ena ḡaukara itataona taudia danu. 7 Dirava ena dubu gaukaradia ikaralaidia totona e heni ḡaudia na gold talent daha-ima bona golddarikidia gerebu-ta, ‡Talent daha-ima = 250 tonnes sisivana. Talent gerebu-ta = 500 tonnes sisivana. Talent gerebu-ta daha-taurahani = 900 tonnes sisivana. Talent domaga-ta = 5000 tonnes sisivana. “Dariki” na Parasa taudia edia moni ta ladana. Golddarikidia gerebu-ta na readia K22,000 heḡereḡeredia ita eda moni ai. silver talent gerebu-ta, bronze talent gerebu-ta daha-taurahani, bona auri talent domaga-ta. 8 Bona mai edia dava-bada nadidia ese e heni, Iehova ena dubu habou-habou rumadia ai e ato, Iehiele, tau Gereson, imana ai. 9 Bena taunimanima na e moale, badina be vada e heni mai lalo-uradia ida; badina be idia ese mai lalodia idoidiai Iehova vada e henia dudukau. David, hanua pavapavana, danu e moale bada herea.

10 Taunabunai, David ese Iehova e hanamoa, hebou taudia iboudiai vairadiai. David eto:

Iehova e, senemai Israel ena Dirava, oi bae hanamomu hanaihanai. 11 Iehova e, goada bona siahu bona hairai bona kwalimu bona herea-dae na oiemu; badina be ḡau iboudiai guba ai bona tanobada ai na oiemu. Iehova e, basileia na oiemu; vada e imodaimumu, ḡau iboudiai ikwaradia. 12 Taḡa bona hemataurai e maimu daladia na oiemu amo; oi ese ḡau iboudiai o biagudiamu. Siahu bona goada na oi imamu ai; oi imamu ai na ḡau iboudiai ihabadadia bona ihagoadadia. 13 Dirava e, harihari a hanamomumu, bona oi ladamu herea-daena a imodaiamu.

14 A lau be daika, bona egu orea taudia be daidia, bena mai emai dala emai lalo-ura ai herahia baia heni? Badina be ḡau iboudiai na oiemu amo e maimu, bena oi sibomu emu ḡau ma vada a henimu lou. 15 Badina be oi vairamu ai ai na idau taumai bona noho-hedoa taumai, senemai iboudiai heḡereḡeredia; emai dina tanobada ai na laulau na heto, asi emai helaro. 16 Iehova e, ai emai Dirava, ini kohu momo ai ese vada a heḡaeḡaelai, dubu auta, oi ladamu helaḡana ena, ihaginina totona, na oi sibomu imamu amo bona oi sibomu emu ḡau. 17 Egu Dirava e, lau dibagu oi ese taunimanima lalodia o tohodiamu, bona kara maoromaoro o moalelaiamu; mai lalogu maoromaorona ida ini ḡau iboudiai vada na heni dudukau, bona harihari oiemu orea taudia hahidaosi iniseni ai nonoho vada na itadia, idia na edia herahia ḡaudia e henimu dudukaumu mai moaledia ida.

18 Iehova e, senemai Abraham bona Isaak bona Israel edia Dirava, ura bona lalo-hadai unuhetomadia na emu orea taudia lalodia ai ba hamiadia hanaihanai, bona lalodia ba ha-uradia, idia na oi mo bae haḡeremu. 19 Natugu Solomon danu ba ha-uraia, bena ia ese mai lalona idoinai emu haheḡani bona emu hahediba herevadia bona emu taravatu baine badinadia, iboudiai na anidia baine kara, bona ruma badana, kohuna na lau ese vada na heḡaeḡaelai ḡauna, na ia ese baine haginia.

20 Bena David ese hebou taudia iboudiai e haḡanidia, eto, Iehova, emui Dirava, ha hanamoa. Bena hebou taudia iboudiai ese Iehova, senedia edia Dirava, e hanamoa, e igo diho, Iehova e toma henia diho; bona hanua pavapavana vairanai danu e igo diho. 21 Bena boubou ḡaudia e hahelaḡadia, Iehova ena; bona daba-rerena ai ḡole-oho bouboudia na e hahelaḡadia. Iehova ena, boromakau mamaruanedia daha-ta, bona mamoe natudia daha-ta; edia inuinu bouboudia danu e hahelaḡadia, bona boubou ḡaudia momo herea, Israel taudia iboudiai daidiai. 22 Bena una dina ai idia na Iehova vairanai e aniani bona e inuinu, mai moale badadia ida.

Bena Solomon, David natuna, na pavapava ai ma e halaoa, nega iharuana, bona ma e horoa, bese pavapavana, Iehova ena. Bona Sadok danu e horoa, hahelaḡa tauna ai e halaoa. 23 Bena Solomon na Iehova ena terono ai e helai, tamana David gabuna ai e lohia; ena namo e habadaia e laova, bona Israel idoinai ese ia erena e kamonai. 24 Lohia iboudiai bona goada taudia iboudiai bona King David natuna iboudiai ese edia gwauhamata na King Solomon e henia. 25 Bena Iehova ese Solomon harina e habadaia, Israel taudia iboudiai vairadiai, bona siahu herea-daena e henia; Israel pavapavana ta, ia e gunalaia taudia bogaragidia amo, na siahu unuhetomana asie henia.

26 David, Iese natuna, ese Israel idoinai unu e lohiaia toma. 27 Ena lohia laḡanidia Israel ai na hari-ahui; laḡani hitu ia ese Heberon ai e lohiaia, bona laḡani toi-ahui toi Ierusalem ai. 28 Bena burukana ai e mase; ena dina na hoho, ena taḡa bona imatauraina danu na bada herea. Bena natuna Solomon na ia gabuna ai e lohia.

29 King David ena kara, matamana amo ela bona dokona, na mata-hanai tauna Samuel bona peroveta tauna Natan bona mata-hanai tauna Gad Sisigadia bukadia ai e hetore; 30 ena lohia karadia, bona ena siahu, bona ienai bona Israel enai bona unu tano basileiadia iboudiai ediai e vara ḡaudia, sivaraidia danu.