2
Hana ena Ḡuriḡuri
1 Hana danu e ḡuriḡuri, eto:
Lalogu ese Iehova e imodaiamu;
egu goada vada e herea Iehova dainai.
Udugu ese inaigu e kirikirilaidiamu,
badina be emu hahemauri na moalelaiamu.
2 Ta dia helaḡa Iehova heḡereḡerena,
asi dirava ta, oi mo sibomu,
asi nadi-gini ta emai Dirava heḡereḡerena.
3 Heaḡi herevadia basio gwaurai lou,
hekokoroku herevadia na udumu amo basie lasi;
badina be Iehova na aonega Diravana,
ia ese kara iboudiai e hahetohodiamu.
4 Goada taudia edia peva e hakwaidudiamu,
a manoka taudia na goada e hariolaimu.
5 Bogadia e kunuva taudia na aniani idavalaina ḡaukaradia vada e kara,
a e hitolodiava taudia na edia hitolo vada e doko.
Gabani hahinena ese natuna hahitu vada e havaradia,
a natuna hoho e havaradia hahinena na vada e dabu.
6 Iehova ese e healamu bona e hahemaurimu;
mase taudia edia gabu ai e hakaudia dihomu bona e hakaudia daemu.
7 Iehova ese taunimanima na e ha-ogoḡamidiamu bona e hataḡadiamu;
e atodia dihomu bona e abidia isimu.
8 Ogoḡami tauna na ḡahu amo e abia isimu;
e dabumu tauna na kahu e negeamu gabuna amo e abia daemu;
lohia ida e hahelaidiamu,
bona helai ḡauna hereana e henidiarnu.
Badina be tanobada dudia na Iehova ena,
idia latadiai ia ese tanobada vada e hadaia.
9 Ia ese ena helaḡa taudia aedia baine gimadia,
a kara dika taudia na dibura ai baine negedia daure;
badina be dia goada amo tau ta baine kwalimu.
10 Iehova inaina bae hehuari kohi;
ia ese guba baine harahurahu henidia.
Iehova ese tanobada dokodia baine hahemaoro henidia;
e duanaia pavapavana na ia ese goada baine henia,
bona e horoa tauna na ia ese ena siahu baine habadaia.
Samuel na dubu ai
11 Una negana ai Elkana na Rama e lou lao. A hari mero na Iehova isiaina e lao heniva, hahelaḡa tauna Eli vairanai.
12 Eli natuna na lebulebu taudia; idia ese Iehova asie matauraia. 13 Hari hahelaḡa taudia edia kara taunimanima ediai na iniheto. Tau ta ena boubou ḡauna e mailaia negana ai, hahelaḡa tauna ena hesiai tauna na ema, vamu dounu e naduava negana ai, diniga mai matana toi na imana ai e abia; 14 bena oburo eiava uro eiava tohe eiava keikei lalonai e kodoa dobi, bena hari diniga amo e kodo isi ḡaudia iboudiai na hahelaḡa tauna ana. Israel taudia iboudiai na Silo ela negadia ai na unu e karadia tomava. 15 Ma ina danu: digara do se haḡolea oho negana ai, hahelaḡa tauna ena hesiai tauna na bema mai, boubou ḡauna e mailaia tauna bema hereva henia, bema toma, Vamu taina na hahelaḡa tauna ba henia, baine gabua; badina be o naduamu ḡauna na oiemu amo basine abia, kasirina mo e uramu. 16 Bena una tau bema toma “Mani digara bae haḡolea oho guna, bena emu ura heḡereḡerena bavabia”, ia na bema haere, bema toma “Lasi, harihari ba henigu; bema lasi, lau ese baina dadihaia”. 17 Taunabunai, hari eregabe edia kara havara na bada herea Iehova vairanai; badina be idia ese Iehova ena ihaboulaina ḡaudia na asie matauraidia.
18 Hari mero Samuel ese Iehova isiaina e lao heniva. Ena hahedoki helaḡana na dabua aukana amo e karaia. 19 Laḡani ta ta amo sinana ese ena hahedoki maraḡina ta e turia, bena e laohaia, e henia, adavana ida laḡani boubouna ihahelaḡana totona ela negana ai. 20 Unu negadia ai, Eli ese Elkana mai adavana ida e hanamodia, eto, Iehova ese natumu na ina hahine ena amo baine henimu, ina mero na Iehova vada o henia davana. Bena idia na edia ruma e lou lao.
21 Iehova ese Hana e vadivadi henia; bena e rogorogo, natuna haida e abidia, memero tatoi bona kekeni rarua. A Samuel na Iehova vairanai e bada oho bada oho.
22 Eli na vada e buruka herea. Ia ese natuna mamaruanedia edia kara iboudiai, Israel taudia iboudiai e kara henidiava karadia, na haridia e kamonai. E kamonai danu, idia na hebou kalagana iduarana ai hesiai karadia e karava hahinedia ida e eno bouva. 23 Bena ia ese e gvvau henidia, eto, Dahaka dainai ene kara o karamu? Emui kara havara haridia na taunimanima iboudiai edia amo na kamonaimu. 24 Lasi, natugu, Iehova ena orea taudia e hapiuamu sivaraina na dia namo. 25 Tau ta ese tau ta baine kara dika henia, Dirava ese baine hahemaoro henia; a tau ta ese Iehova baine kara dika henia, daika ese baine hamauria? A idia ese tamadia erena na asie kamonai; badina be Iehova ena ura na baine aladia mase.
26 Samuel na e bada oho bada oho; Iehova bona taunimanima edia uraheni ienai e bada e laova danu.
27 Una negana ai Dirava ena hesiai tauna ta be Eli dekena ela, e hereva henia, eto, Iehova na ini e gwau tomamu: senemu ena iduhu taudia na hahedinarai henidia, Aigupto ai Farao mai ena orea taudia ida isiaidia e lao heniva negana ai. 28 Ia na abia hidi, Israel iduhudia iboudiai bogaragidia amo, egu hahelaḡa tauna ai na halaoa, egu ihaboulaina patana baine raka henia kahi, muramura mai bonadia baine gabu, bona hahedoki helaḡana na lau vairagu ai baine hadokia. Egu lahi boubou ḡaudia iboudiai Israel taudia ese e henigu danu lau ese oi senemu ena iduhu taudia na henidia. 29 Dahaka dainai lauegu ihaboulaina ḡaudia, bona herahia ḡaudia egu hahegani heḡereḡeredia e mailaimu, na o mata ḡaniḡani henidiamu? Dahaka dainai natumu o matauraidia badamu, lau o matauraigu maraḡimu? Dahaka dainai egu bese Israel ese e mailaidiamu bouboudia na umui ese kaha namodia o abimu, bogamui o hakunulaimu?
30 Taunabunai Iehova, Israel Diravana, na ini e gwau tomamu: lau na gwau hamata nato emu ruma taudia bona senemu ena iduhu taudia na lau vairagu ai bae raka vareai bona bae raka lasi ela bona hanaihanai. A harihari Iehova na ini e gwau tomamu: unu basina karaia toma; badina be e matauraigumu taudia na baina matauraidia, bona e dadaraigumu taudia na basina lalodia bada. 31 A kamonai: dinadia be maimu lau ese emu goada baina abia oho, bona tamamu ena ruma taudia edia goada baina abia oho. bena iahu ta basine noho emu ruma ai. 32 Bena emu ogoḡami ai Israel taudia edia taḡa ba haḡerea bona ba ḡahusia; a oiemu ruma ai na iahu ta basine noho, ela bona hanaihanai. 33 Umui bogaragimui ai tau tamona na egu ihaboulaina patana amo basina negea daure, a ia na iruru-matana baine diho bona lalona baine hisihisi. A emu ruma memerodia iboudiai na taunimanima edia dare ai bae mase. 34 Toana binai emu ai: natumu raruosi, Hofni bona Fineha, na dina tamona ai bae mase. 35 Bena lau ese egu hahelaḡa tauna namona ta baina haginia; egu ura bona egu lalo-hadai idoinai ia ese baine karaia; lau ese ena iduhu baina haginia; bonaia ese baina horoa tauna vairanai baine raka vareai bona baine raka lasi ela bona hanaihanai. 36 Bena oiemu iduhu taudia kwabukwabudia na ienai bae noi hegame, silver monina ta eiava flaoa igabu ta baine henidia; baeto, Mani emu kara hahelaḡa tauna ta gabuna ai bavatogu, bena aniani taina baina ania.